Mateo 3:1-17
3 Chiruhebʼ li kutan aʼan, laj Juan, aj Kubʼsihomhaʼ, kiʼok xkʼebʼal chi naweʼk saʼ li chaqichʼochʼ re Judea jun li esil li chalenaq rikʼin li Yos.
2 Yook chaq xyeebʼal: «Yotʼomaq eechʼool ut jalomaq eekʼaʼuxl xbʼaan naq li Xʼawabʼejilal li choxa ak xnachʼok chaq».
3 Relik chi yaal naq chirix laj Juan yook chaq chi aatinak li propeet Isaías naq kixye: «Saʼ li chaqichʼochʼ naʼabʼimank jun li kawil kuxej li yook xyeebʼal: “Kawresimaq xbʼe li Jehobʼa!* Tiikobʼresimaq li xbʼe”».
4 Laj Juan naxtiqibʼ chaq ribʼ rikʼin rix kameey* ut li xkʼaamal xsaʼ yiibʼanbʼil rikʼin tzʼuum. Naxtzeka li saakʼ* ut li xyaʼal kabʼ.
5 Ut ebʼ li qas qiitzʼin li wankebʼ Jerusalén ut Judea joʼ ajwiʼ saʼ chixjunil Jordán nekeʼwulak chi rilbʼal.
6 Laj Juan naxkubʼsihebʼ chaq xhaʼ saʼ li nimaʼ Jordán ut aʼanebʼ nekeʼxye chi kutankil li xmaakebʼ.
7 Naq laj Juan kiril chixjunilebʼ laj pariseey ut laj saduseey saʼ li naʼaj bʼarwiʼ yook chi kubʼsink haʼ, kixye rehebʼ: «Ex ral kʼantiʼ li wank eemay, ani xyeehok eere naq texʼeleliq chiru xjosqʼil li Yos?
8 Xbʼeenwa kʼutbʼesihomaq rikʼin leebʼaanuhom naq xeeyotʼ eechʼool ut xeejal eenaʼlebʼ.
9 Ut meeye “Li qayuwaʼ aʼan laj Abrahán”. Xbʼaan naq li Yos naru xbʼaanunkil naq teʼelq chaq ralal xkʼajol laj Abrahán rikʼinebʼ li pek aʼin.
10 Li maal ak wank saʼ xtoonal li cheʼ. Ut wi junaq li cheʼ inkʼaʼ naʼuuchink chiʼus, tyokʼmanq ut tkutmanq saʼ xaml.
11 Laaʼin nawoksi li haʼ re xkubʼsinkil eehaʼ xbʼaan naq xeeyotʼ eechʼool ut xeejal eenaʼlebʼ. Abʼan li tchalq chiwix qʼaxal wank xwankil chiwu ut laaʼin moko wank ta inkʼulubʼ re risinkil li xxaabʼ.* Aʼan troksi li santil musiqʼej ut li xaml re xkubʼsinkil eehaʼ.
12 Saʼ ruqʼ wank li kʼanjelobʼaal ut tixyamtesi li xnaʼaj li triiw bʼarwiʼ nachiqʼmank ru. Tixxok ut tixkʼula, abʼan li rix li triiw tixkʼat rikʼin jun li xaml li inkʼaʼ nachup».
13 Tojaʼ naq li Jesús kiʼelk Galilea ut xkoho saʼ li nimaʼ Jordán re naq tkubʼsiiq xhaʼ xbʼaan laj Juan.
14 Abʼan laj Juan kixyal xrambʼal chiru. Kixye re: «Laaʼat raj tento taakubʼsi inhaʼ, aʼut laaʼat chik nakatchalk wikʼin?».
15 Li Jesús kixye re laj Juan: «Maaram chiwu, chi joʼkan ttzʼaqloq ru li naraj li Yos». Tojaʼ naq laj Juan kixkanabʼ xrambʼal chiru.
16 Naq ak xkubʼsiik xhaʼ li Jesús, tikto kiʼelk saʼ haʼ ut saʼ li hoonal aʼan kiteehonk li choxa ut aʼan* kiril li xsantil musiqʼej li Yos yook chaq chi kubʼeek kamaʼ jun li mukuy saʼ xbʼeen li Jesús.*
17 Tojaʼ naq kiʼabʼimank jun xyaabʼ kuxej saʼ choxa ut kixye: «Aʼin li Walal li ninra, aʼan naxsahobʼresi linchʼool».
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Jehobʼa.
^ Aʼin jun li nimla xul li wank xbʼuqʼulal rix.
^ Malaj «li chiliʼ».
^ Malaj «li xperxaabʼ».
^ Arin yook chi aatinak tana chirix laj Juan.
^ Saʼ griego «aʼan».
