Mateo 6:1-34
-
LI SEERAQʼ LI KIXKʼE SAʼ LI TZUUL (1-34)
-
Weent teebʼaanu rikʼin xbʼaanunkil li us yal re naq texʼileʼq (1-4)
-
Chanru textijoq (5-15)
-
Naxkʼut chiruhebʼ li xtzolom chanru teʼtijoq (9-13)
-
-
Li ayuun (16-18)
-
Li bʼihomal saʼ ruuchichʼochʼ ut saʼ choxa (19-24)
-
«Miʼok chik eekʼaʼuxl» (25-34)
-
«Meekanabʼ xsikʼbʼal xbʼeenwa li Xʼawabʼejilal li Yos» (33)
-
-
6 »Weent teebʼaanu rikʼin xbʼaanunkil li us* yal re naq texʼileʼq xbʼaanebʼ li junchʼol. Xbʼaan naq wi nekeebʼaanu aʼin, maajun leeqʼajkamunkil teekʼul rikʼin leechoxahil Yuwaʼ.
2 Naq taatenqʼa li nebʼaʼ, maajap aawe chi xyeebʼal saʼebʼ li naʼaj re loqʼonink ut saʼebʼ li bʼe joʼ nekeʼxbʼaanu ebʼ laj kaʼpakʼal u, ebʼ aʼan nekeʼraj naq teʼkʼeheʼq xwankil xbʼaanebʼ li junchʼol. Relik chi yaal ninye eere naq ebʼ aʼan ak xeʼxkʼul chi tzʼaqal re ru li xqʼajkamunkil.
3 Naq taatenqʼa bʼan li nebʼaʼ, mixnaw laatzʼe li naxbʼaanu laanim;
4 chi joʼkan maaʼani tnawoq re, naq yookat xtenqʼankilebʼ li nebʼaʼ. Tojaʼ naq Laayuwaʼ li naril chixjunil tatxqʼajkamu.
5 »Joʼkan ajwiʼ, naq textijoq, mexnaʼlebʼak joʼebʼ laj kaʼpakʼal u. Ebʼ aʼan nekeʼwulak chiru tijok chi xaqxo saʼebʼ li naʼaj re loqʼonink ut saʼ xxuk ebʼ li xnimal ru bʼe re naq teʼileʼq xbʼaanebʼ li junchʼol. Relik chi yaal ninye eere naq ebʼ aʼan ak xeʼxkʼul chi tzʼaqal re ru li xqʼajkamunkil.
6 Abʼan, naq tattijoq, okan saʼ jun rehebʼ li naʼaj li wank saʼ laawochoch ut naq ak xaatzʼap li okebʼaal, tattijoq chiru Laayuwaʼ li inkʼaʼ nakaawil ru. Tojaʼ naq Laayuwaʼ li naril chixjunil, tatxqʼajkamu.
7 Naq tattijoq, moko taaye ta naabʼal sut jun ajwiʼ li naʼlebʼ, joʼ nekeʼxbʼaanu ebʼ li junchʼol chi tenamit. Ebʼ aʼan nekeʼxkʼoxla naq teʼabʼiiq xbʼaan naq nekeʼxye kʼiila aatin.
8 Mexnaʼlebʼak joʼebʼ aʼan. Leeyuwaʼ ak naxnaw li nekeeraj usta toj maajiʼ nekeepatzʼ re.
9 »Laaʼex tento textijoq chi joʼkaʼin:
»“At Qayuwaʼ li wankat saʼ choxa, santobʼresinbʼil taxaq laakʼabʼaʼ.
10 Chichalq ta Laaʼawabʼejilal. Chiʼuxq ta laawajom, joʼ saʼ choxa joʼ ajwiʼ saʼ ruuchichʼochʼ.
11 Chaakʼe taxaq qawa* choʼq re li kutan aʼin;
12 chaakuy chaasach li qamaak,* joʼ naq laaʼo naqakuyebʼ xmaak li nekeʼmaakobʼk chiqu.*
13 Ut mooʼaakanabʼ chi tʼaneʼk saʼ li aaleek, chooʼaakol bʼan chiru li Maaʼus”.
14 »Xbʼaan naq, wi laaʼex nekeekuy xmaak ebʼ li junchʼol, leechoxahil Yuwaʼ tixkuy ajwiʼ leemaak.
15 Abʼan, wi inkʼaʼ nekeekuy xmaak ebʼ li junchʼol, Leeyuwaʼ inkʼaʼ ajwiʼ tixkuy leemaak.
16 »Naq texʼayuuniq,* meekʼut rikʼin xnaqʼ eeru naq ra saʼ leechʼool joʼ nekeʼxbʼaanu ebʼ laj kaʼpakʼal u xbʼaan naq ebʼ aʼan nekeʼxkʼut rikʼinebʼ li xnaqʼ ru naq rahebʼ saʼ xchʼool yal re naq ebʼ li junchʼol teʼxkʼe reetal naq yookebʼ chi ayuunik.* Relik chi yaal ninye eere naq ebʼ aʼan ak xeʼxkʼul chi tzʼaqal re ru li xqʼajkamunkil.
17 Abʼan laaʼat, naq tat-ayuuniq,* taakʼe sununkil aseeyt saʼ laajolom ut tchʼaj xnaqʼ aawu
18 re naq Laayuwaʼ li inkʼaʼ nakaawil ru tixkʼe reetal naq yookat chi ayuunik* ut maawaʼ ebʼ li qas qiitzʼin. Tojaʼ naq Laayuwaʼ li naril chixjunil, tatxqʼajkamu.
19 »Kanabʼomaq xtambʼresinkil leebʼihomal saʼ ruuchichʼochʼ xbʼaan naq tmaxenq ut tqʼolenq malaj teʼrelqʼa.
20 Tambʼresihomaq bʼan leebʼihomal saʼ choxa xbʼaan naq inkʼaʼ tmaxenq ut inkʼaʼ tqʼolenq chi moko teʼrelqʼa.
21 Xbʼaan naq bʼarwiʼ wanq leebʼihomal aran ajwiʼ wanq leechʼool.
22 »Saʼ laawu chanchan li kandil* li naxkutanobʼresi laatibʼel. Wi saʼ laawu nakʼanjelak chiʼus,* chixjunil laatibʼel tlemtzʼunq.
23 Abʼan, wi saʼ laawu nakaqalink,* chixjunil laatibʼel wanq saʼ qʼoqyink. Wi qʼoqyink ut maawaʼ saqenk li wank aawikʼin, qoqʼyinaq chixjunil laatibʼel.
24 »Jun li moos inkʼaʼ naru nakʼanjelak chiru wiibʼ aj echal re xbʼaan naq xikʼ tril li jun ut tixra li jun chik, malaj tixtenqʼa li jun ut tixtzʼeqtaana li jun chik. Inkʼaʼ naru nekexwank choʼq xmoos li Yos ut choʼq xmoos li Bʼihomal.
25 »Joʼkan naq ninye eere: miʼok chik eekʼaʼuxl chirix leeyuʼam, chirix li teewaʼ ut li teerukʼ; malaj chirix leetibʼel, chirix li teekʼe cheerix. Ma inkʼaʼ tabʼiʼ qʼaxal wank xwankil li yuʼam chiru li tzekemq, ut li tibʼelej chiru li aqʼej?
26 Kʼehomaq reetal ebʼ li xul li nekeʼrupupik chiru choxa. Inkʼaʼ nekeʼawk chi moko nekeʼxsikʼ ru li awimq chi moko nekeʼxxok saʼ li kʼulebʼaal, abʼan leechoxahil Yuwaʼ naxchʼolanihebʼ. Ma inkʼaʼ tabʼiʼ qʼaxal wank eewankil laaʼex chiruhebʼ aʼan?
27 Ani eere truuq xtiqbʼal bʼayaq chik roq li xyuʼam saʼ xkʼabʼaʼ naq yooq xkʼaʼuxl?
28 Joʼkan ajwiʼ, kʼaʼut naxik eechʼool chirix leetʼikr? Kʼehomaq reetal chanru nekeʼkʼiik ebʼ li uutzʼuʼuj li naʼelk saʼ pim. Inkʼaʼ nekeʼkʼanjelak chi kaw chi moko nekeʼkemok;*
29 aʼut laaʼin ninye eere naq chi moko laj Salomón kixtiqibʼ ribʼ joʼ jun rehebʼ aʼin, usta kʼajoʼ xchʼinaʼusal li kʼaru re kiwank chaq.
30 Joʼkan bʼiʼ, wi li Yos joʼkan naxtiqibʼ ebʼ li uutzʼuʼuj li naʼelk saʼ pim, li wank anaqwan ut wulaj tkutmanq saʼ xaml, ma inkʼaʼ tabʼiʼ textiqibʼ laaʼex li kachʼin ru leepaabʼal chirix li Yos?
31 Joʼkan naq maajunwa chi ok eekʼaʼuxl ut teeye: “Kʼaru tqawaʼ?”, malaj “Kʼaru tqukʼ?”, malaj “Kʼaru tqakʼe chiqix?”.
32 Xbʼaan naq ebʼ li junchʼol chi tenamit* nekeʼxkʼe xchʼool chi xsikʼbʼal chixjunil aʼin. Leechoxahil Yuwaʼ naxnaw naq nekeeraj chixjunil aʼin.
33 »Joʼkan bʼiʼ, meekanabʼ xsikʼbʼal xbʼeenwa li Xʼawabʼejilal li Yos ut li xtiikilal,* tojaʼ naq teekʼul ajwiʼ chixjunil aʼin.
34 Joʼkan naq, maajunwa t-oq eekʼaʼuxl chirix li tkʼulmanq wulaj xbʼaan naq li kutan wulaj tixkʼam chaq li xchʼaʼajkilal. Tzʼaqalaq li chʼaʼajkilal li naxkʼam chaq li junjunq chi kutan.
Xtzʼaqobʼ ebʼ li naʼlebʼ
^ Saʼ griego «xyuʼaminkil li tiikilal».
^ Saʼ griego «kaxlanwa». Arin yook chi aatinak chirix li jalan jalanq chi tzekemq.
^ Saʼ griego «kʼas».
^ Saʼ griego «li wankebʼ xkʼas qikʼin».
^ Malaj «teekanabʼ waʼak chiru jarubʼaq kutan».
^ Malaj «xeʼxkanabʼ waʼak chiru jarubʼaq kutan».
^ Malaj «taakanabʼ waʼak chiru jarubʼaq kutan».
^ Malaj «xaakanabʼ waʼak chiru jarubʼaq kutan».
^ Malaj «li lámpara».
^ Malaj «saqenk nakat-ilok».
^ Aʼin naraj xyeebʼal, naxsikʼ naabʼal li kʼaʼaq re ru. Saʼ griego «wi maaʼus xsaʼ laawu».
^ Aʼin naraj xyeebʼal, moko nekeʼxyiibʼ ta li noqʼ.
^ Aʼin naraj xyeebʼal, ebʼ li qas qiitzʼin li inkʼaʼ nekeʼxpaabʼ li Yos.
^ Taawil xchʼolobʼankil li aatin, tiikilal.
