Mateo 7:1-29
-
LI SEERAQʼ LI KIXKʼE SAʼ LI TZUUL (1-27)
-
«Kanabʼomaq raqok aatin» (1-6)
-
Meekanabʼ patzʼok, sikʼok ut xchʼeʼbʼal li okebʼaal (7-11)
-
Bʼaanumaq rehebʼ li junchʼol li teeraj naq tbʼaanumanq eere (12)
-
Li okebʼaal li kachʼin ru (13, 14)
-
«Teʼnawmanq ru rikʼinebʼ li xbʼaanuhom» (15-23)
-
Li ochoch li wank saʼ xbʼeen pek ut li ochoch li wank saʼ xbʼeen samahibʼ (24-27)
-
-
Sachsokebʼ xchʼool nekeʼkanaak naq nekeʼrabʼi li Jesús (28, 29)
7 »Kanabʼomaq raqok aatin saʼ xbʼeenebʼ li junchʼol re naq li Yos inkʼaʼ traqoq aatin saʼ eebʼeen.
2 Xbʼaan naq, joʼ naq texraqoq aatin saʼ xbʼeenebʼ li junchʼol joʼkan traqmanq aatin saʼ eebʼeen, ut li bʼislebʼ li teeroksi rikʼinebʼ li junchʼol aʼan li t-oksimanq eerikʼin.
3 Kʼaʼut nakaawil li kʼaj cheʼ li wank saʼ ru laawas aawiitzʼin* abʼan inkʼaʼ nakaakʼe reetal li tzʼambʼa li wank saʼ laawu?
4 Ut chanru nakatruuk xyeebʼal re laawas aawiitzʼin,* “wisihaq li kʼaj cheʼ li wank saʼ laawu”, ut laaʼat inkʼaʼ nakaawil li tzʼambʼa li wank saʼ laawu?
5 At aj kaʼpakʼal u! Xbʼeenwa isi li tzʼambʼa li wank saʼ laawu, tojaʼ naq tatruuq rilbʼal chiʼus chanru taawisi li kʼaj cheʼ li wank saʼ ru laawas aawiitzʼin.*
6 »Meekʼe li qʼaxal saant rehebʼ li tzʼiʼ. Chi moko teekʼe li chʼinaʼusil pek rehebʼ li aaq* xbʼaan naq maare teʼxyeqʼi, ut teʼxkut ribʼ saʼ eebʼeen ut texrahobʼtesiiq xbʼaanebʼ.
7 »Meekanabʼ patzʼok ut tkʼemanq eere, meekanabʼ sikʼok ut teetaw, meekanabʼ xchʼeʼbʼal li okebʼaal ut tteemanq cheeru.
8 Xbʼaan naq li napatzʼok, nakʼuluk; li nasikʼok, natawok; ut li naxchʼeʼ li okebʼaal, nateemank chiru.
9 Ma wank tawiʼ junaq li winq tixkʼe junaq pek re li ralal naq tixpatzʼ xkaxlanwa re?
10 Ut wi tixpatzʼ junaq xkar, ma tixkʼe re junaq li kʼantiʼ?
11 Joʼkan bʼiʼ, wi laaʼex nekeenaw xkʼebʼal li chaabʼil maatan rehebʼ leeralal eekʼajol usta laaʼex aj maak, ma tojaʼ ta chik leechoxahil Yuwaʼ inkʼaʼ tixkʼe li chaabʼil maatan rehebʼ li teʼpatzʼoq re!
12 »Joʼkan naq bʼaanumaq rehebʼ li junchʼol li teeraj naq tbʼaanumanq eere. Relik chi yaal naq aʼin li naraj xyeebʼal li Xchaqʼrabʼ laj Moisés ut li xeʼxtzʼiibʼa chaq ebʼ li propeet.
13 »Okanqex saʼ li okebʼaal kachʼin ru. Xbʼaan naq nim li okebʼaal ut nim ru li bʼe nakʼamok saʼ li kamk, ut naabʼalebʼ nekeʼok saʼ li okebʼaal aʼin;
14 abʼan laatzʼ ru li okebʼaal ut kachʼin ru li bʼe nakʼamok saʼ li yuʼam, ut moko kʼihebʼ ta nekeʼtawok re.
15 »Weent teebʼaanu rikʼinebʼ li bʼalaqʼ aj propeet. Xbʼaan naq chanchanebʼ li karneer naq nekeʼjilok cheekʼatq abʼan ebʼ li xchʼool chanchan josqʼ aj xul li qʼaxal yookebʼ xtzʼokajik.
16 Teʼnawmanq ru rikʼin li nekeʼruuchi.* Peʼyaal naq inkʼaʼ naxokmank ebʼ li uubʼ saʼebʼ li kʼix chi moko ebʼ li iig saʼebʼ li kʼix?
17 Joʼkan ajwiʼ, li chaabʼil cheʼ, chaabʼil naruuchi; li qʼumet cheʼ, moko chaabʼil ta naruuchi.
18 Li chaabʼil cheʼ moko qʼajenaq ta naruuchi, ut li qʼumet cheʼ moko chaabʼil ta naruuchi.
19 Li cheʼ li moko us ta naruuchi, nayokʼmank ut nakutmank saʼ xaml.
20 Joʼkan bʼiʼ, ebʼ li winq aʼin teʼnawmanq ru rikʼinebʼ li xbʼaanuhom.
21 »Moko chixjunilebʼ ta li nekeʼxye we “Qaawaʼ, Qaawaʼ”, teʼoq saʼ li Xʼawabʼejilal li choxa. Kaʼajwiʼ teʼoq li nekeʼxbʼaanu li rajom* linchoxahil Yuwaʼ.
22 Saʼ li kutan aʼan, naabʼalebʼ teʼxye we: “Qaawaʼ, Qaawaʼ, ma inkʼaʼ tabʼiʼ xqoksi laakʼabʼaʼ naq xooʼaatinak joʼ propeet ut xqoksi laakʼabʼaʼ naq xooʼisink maaʼus aj musiqʼej, ut xqoksi laakʼabʼaʼ naq xqabʼaanu naabʼal li sachbʼachʼoolej?”.
23 Tojaʼ naq tinye rehebʼ: “Maajunwa xinnaw eeru. Elenqex chiwu laaʼex aj qʼetol chaqʼrabʼ!”.
24 »Joʼkan bʼiʼ, li narabʼi li waatin ut naxyuʼami, chanchanaq li winq li wank xnaʼlebʼ li kixyiibʼ li rochoch saʼ xbʼeen pek.
25 Kichalk li habʼ, kiʼelk chaq li nimaʼ, kichalk li kawil iqʼ ut kixsakʼ ribʼ chiru li ochoch..., abʼan li ochoch inkʼaʼ kitʼaneʼk xbʼaan naq li rubʼelankil wank saʼ xbʼeen pek.
26 Aʼut li narabʼi li waatin ut inkʼaʼ naxyuʼami, chanchanaq li winq li maakʼaʼ xnaʼlebʼ li naxyiibʼ li rochoch saʼ xbʼeen samahibʼ.
27 Ut kichalk li habʼ, kiʼelk li nimaʼ, ut li kawil iqʼ kixsakʼ ribʼ chiru li ochoch..., tojaʼ naq li ochoch aʼin kitʼaneʼk ut kijukʼeʼk chi junajwa».
28 Naq li Jesús kiraqeʼk xyeebʼal ebʼ li aatin aʼin, sachsokebʼ xchʼool xeʼkanaak ebʼ li qas qiitzʼin rikʼin li xkʼutum
29 xbʼaan naq inkʼaʼ nakʼutuk joʼebʼ laj tzʼiibʼ, li xkʼutum chalenaq rikʼin li Yos.
Xtzʼaqobʼ ebʼ li naʼlebʼ
^ Arin yook chi aatinak chirix li rechpaabʼanelil.
^ Arin yook chi aatinak chirix li rechpaabʼanelil.
^ Arin yook chi aatinak chirix li rechpaabʼanelil.
^ Malaj «rehebʼ li kuy».
^ Malaj «li xbʼaanuhomebʼ».
^ Malaj «li naraj».
