Mateo 8:1-34
-
Li Jesús naxkʼirtasi jun li winq saqlep rix (1-4)
-
Jun li winq li nataqlank rehebʼ laj puubʼ naxpaabʼ li Yos (5-13)
-
Naabʼalebʼ naxkʼirtasi li Jesús aran Capernaúm (14-17)
-
Chanru xtaqenkil li Jesús (18-22)
-
Li Jesús naxtuqubʼ ru li kawil iqʼ (23-27)
-
Naxtaqla chi ok wiibʼ oxibʼ li maaʼus aj musiqʼej rikʼin wiibʼ oxibʼ li aaq (28-34)
8 Naq ak xkubʼeek chaq saʼ li tzuul, li kʼiila tenamit kiʼok xtaqenkil.
2 Tojaʼ naq kiwulak jun li winq saqlep rix, kixwiqʼibʼ ribʼ chiru ut kixye re: «Qaawaʼ, laaʼin ninnaw naq wi laaʼat nakaawaj, tatruuq inkʼirtasinkil».
3 Joʼkan naq li Jesús kixyeʼ li ruqʼ, kixchʼeʼ ut kixye re: «Nawaj naq tatkʼiraaq». Ut saʼ junpaat kiʼelk li saqlep chirix li winq ut kikʼiraak.
4 Chirix chik aʼan li Jesús kixye re: «Weent taabʼaanu ut maaʼani ajʼe taaseeraqʼi. Abʼan, tento tatxik rikʼin laj tij ut taakʼam li mayej li kixye laj Moisés joʼ reetalil chiruhebʼ naq xatkʼiraak».
5 Naq li Jesús kiʼok Capernaúm, kiwulak rikʼin jun li winq li nataqlank rehebʼ laj puubʼ* ut li winq aʼin kixpatzʼ xtenqʼankil re.
6 Kixye re: «At Qaawaʼ, sik linmoos. Wank saʼ ochoch, yokyo ut qʼaxal ra wank».
7 Li Jesús kixye re: «Naq tinwulaq aran, tinkʼirtasi».
8 Abʼan li winq li nataqlank rehebʼ laj puubʼ* kixye re: «At Qaawaʼ moko inkʼulubʼ ta naq tat-oq saʼ wochoch. Yal taaye junaq laawaatin ut linmoos tkʼiraaq.
9 Xbʼaan naq laaʼin ajwiʼ ninpaabʼ naq nikineʼxtaqla ut nintaqlahebʼ laj puubʼ li wankebʼ rubʼel inwankil. Re jun ninye “Ayu!” ut naxik, ut re li jun chik ninye “Kim” ut nachalk, ut re linmoos ninye “Bʼaanu aʼin” ut naxbʼaanu».
10 Naq kirabʼi aʼin, li Jesús kisach xchʼool ut kixye rehebʼ li yookebʼ chi taqenk re: «Relik chi yaal ninye eere naq moko xintaw ta junaq winq saʼ Israel li qʼaxal nim li xpaabʼal chirix li Yos.
11 Ninye eere naq naabʼalebʼ teʼchalq bʼarwiʼ naʼelk ut naʼok li saqʼe, ut teʼchunlaaq saʼ meex rochbʼeen laj Abrahán, laj Isaac ut laj Jacob saʼ li Xnimajwal wankilal li choxa,
12 abʼan li xeʼbʼoqeʼk chi ok saʼ li Awabʼejilal aʼin, teʼkuteʼq chirix kabʼl saʼ qʼoqyink. Aran teʼyaabʼaq ut teʼxkʼuxuxi li ruch re».*
13 Tojaʼ naq li Jesús kixye re li winq li nataqlank rehebʼ laj puubʼ:* «Sutqʼin saʼ laawochoch. Ut chiʼuxq joʼ xaapatzʼ saʼ xkʼabʼaʼ naq xaakʼutbʼesi naq nakaapaabʼ li Yos». Ut saʼ li hoonal ajwiʼ aʼan li xmoos kikʼiraak.
14 Naq kiʼok saʼ rochoch laj Pedro, li Jesús kiril naq li xnaʼ li rixaqil laj Pedro wank chiru chʼaat ut yook xtiq.
15 Joʼkan naq li Jesús kixchʼeʼ li ruqʼ ut kiʼelk li xtiq. Chirix chik aʼan li qanaʼchin kiwakliik ut kiʼok xkʼubʼankil li xtzekemqebʼ.
16 Naq kiʼewuuk, li tenamit kixkʼam chaq re li Jesús naabʼal li qas qiitzʼin li echaninbʼil xbʼaanebʼ li maaʼus aj musiqʼej ut yal rikʼin jun raatin kirisihebʼ li maaʼus aj musiqʼej aʼin. Kixkʼirtasi ajwiʼ naabʼal li qas qiitzʼin li ra wankebʼ.
17 Aʼin kikʼulmank re naq ttzʼaqloq ru li kixye chaq li Yos saʼ xkʼabʼaʼ li propeet Isaías: «Aʼan kikʼuluk re li qayajel ut kiriiqani li qarahilal».
18 Naq li Jesús kiril naq yook chi suteʼk xbʼaan li kʼiila tenamit, kixye rehebʼ li xtzolom naq tento teʼnumeʼq junpakʼal li palaw.
19 Tojaʼ naq jun laj tzʼiibʼ kijilok chixkʼatq ut kixye re: «At Kʼutunel, maakʼaʼ naxye bʼar tatxik, tatintaqe».
20 Abʼan li Jesús kixye re: «Ebʼ li xtzʼiʼ kʼicheʼ* wankebʼ xsok ut ebʼ li xul li nekeʼrupupik chiru choxa wankebʼ xsok, abʼan li Ralal li Winq maakʼaʼ xnaʼaj re xtolobʼankil xjolom».
21 Ut jun rehebʼ li xtzolom kixye re: «Qaawaʼ, kanabʼin chi xik xbʼeenwa chi xmuqbʼal linyuwaʼ».
22 Ut li Jesús kixye re: «Laaʼat maakanabʼ intaqenkil, ut kanabʼ naq ebʼ li kamenaq teʼxmuq li xkamenaq».
23 Naq li Jesús kitaqeʼk saʼ jun li jukubʼ,* ebʼ li xtzolom xkohebʼ chirix.
24 Chirix chik aʼan, kiwakliik chaq jun li kawil iqʼ saʼ palaw. Ut xkawil roq li haʼ naxsakʼ ribʼ chiru li jukubʼ* ut kiʼok xnujtesinkil xsaʼ. Abʼan li Jesús yook chi wark.
25 Ebʼ aʼan xkohebʼ rajsinkil ut xeʼxye re: «Qaawaʼ, chooʼaakol! Osoʼk qe!».
26 Abʼan li Jesús kixye rehebʼ: «Ex winq kachʼin ru leepaabʼal, kʼaʼut qʼaxal yook eexiw?». Tojaʼ naq kiwakliik ut kixqʼus li kawil iqʼ ut li palaw, ut chixjunil kituqlaak ru.
27 Ebʼ li xtzolom chi sachso xchʼool xeʼxye: «Kʼaʼ chi winqul aʼin xbʼaan naq li kawil iqʼ ut li palaw nekeʼabʼink ajwiʼ chiru?».
28 Naq kiwulak junpakʼal li palaw saʼ xteepalebʼ laj Gadara,* xeʼchalk chi xtawbʼal li Jesús wiibʼ li winq li echaninbʼilebʼ xbʼaan li maaʼus aj musiqʼej li xeʼelk chaq bʼarwiʼ wank li muqlebʼaal kamenaq. Qʼaxal xuwajelebʼ ru ut maaʼani naraj numeʼk saʼ li bʼe aʼan.
29 Tojaʼ naq xeʼok xjapbʼal rehebʼ ut xeʼxye: «Kʼaru wilom aawikʼin, at Ralal li Yos? Ma xatchalk qarahobʼtesinkil naq toj maajiʼ li hoonal li xaqabʼanbʼil?».
30 Ut nachʼ rikʼinebʼ, xeʼril jun chʼuut li aaq* li yookebʼ chi waʼak.
31 Joʼkan naq, ebʼ li maaʼus aj musiqʼej xeʼok xtzʼaamankil re li Jesús: «Wi tooʼaawisi arin, taqlaho chi ok rikʼin li chʼuut chi aaq».*
32 Ut aʼan kixye rehebʼ: «Ayuqex!». Tojaʼ naq ebʼ li maaʼus aj musiqʼej xeʼelk rikʼinebʼ li winq ut xeʼok rikʼinebʼ li aaq.* Ut ebʼ li aaq* xeʼxkut ribʼ saʼ xteram li uul, jun tʼanikebʼ saʼ palaw, ut aran xeʼkamk.
33 Ut ebʼ laj ilol aaq* xeʼelelik. Xkohebʼ saʼ tenamit chi xyeebʼal chixjunil li kikʼulmank joʼ ajwiʼ li xeʼxkʼul ebʼ li winq li echaninbʼil xbʼaanebʼ li maaʼus aj musiqʼej.
34 Tojaʼ naq chixjunilebʼ li qas qiitzʼin xeʼelk chi xsikʼbʼal li Jesús ut naq xeʼxtaw, xeʼxtzʼaama re, naq tixkanabʼ li teep.
Xtzʼaqobʼ ebʼ li naʼlebʼ
^ Li winq aʼin xaqabʼanbʼil re xtaqlankil jun siʼeent aj puubʼ.
^ Li winq aʼin xaqabʼanbʼil re xtaqlankil jun siʼeent aj puubʼ.
^ Aʼin reetalil naq yookebʼ xjosqʼil ut inkʼaʼ nekeʼxtaw ru kʼaru teʼxbʼaanu.
^ Li winq aʼin xaqabʼanbʼil re xtaqlankil jun siʼeent aj puubʼ.
^ Jun li xul li wank saʼ Israel li chanchan tzʼiʼ.
^ Malaj «li kayuuk».
^ Malaj «li kayuuk».
^ Malaj «li kuy».
^ Malaj «chi kuy».
^ Malaj «rikʼinebʼ li kuy».
^ Malaj «ebʼ li kuy».
^ Malaj «li kuy».
