Mateo 9:1-38
-
Li Jesús naxkʼirtasi jun li sik (1-8)
-
Li Jesús naxye re laj Mateo naq tixtaqe (9-13)
-
Nekeʼxpatzʼ re chirix li ayuun (14-17)
-
Li xrabʼin laj Jairo; jun li ixq kixchʼeʼ li xtʼikr li Jesús (18-26)
-
Li Jesús naxkʼirtasi wiibʼ li mutzʼ ut jun li winq li inkʼaʼ naru chi aatinak (27-34)
-
Numtajenaq ru li awimq, moko kʼihebʼ ta laj kʼanjel (35-38)
9 Li Jesús kitaqeʼk saʼ li jukubʼ,* kixtoq ru li palaw ut kiʼok saʼ li xtenamit.
2 Ut ebʼ li qas qiitzʼin xeʼxkʼam chaq re li Jesús jun li sik, xeʼxpaqo chaq saʼ jun li chʼaat. Naq li Jesús kiril naq wankebʼ xpaabʼal chirix li Yos, kixye re li sik: «Matxuwak at walal! Kuybʼil sachbʼil chik laamaak».
3 Tojaʼ naq wiibʼ oxibʼ laj tzʼiibʼ xeʼxye chiribʼilebʼ ribʼ: «Li winq aʼin inkʼaʼ us kixye chirix li Yos».*
4 Li Jesús naxnaw li nekeʼxkʼoxla joʼkan naq kixye rehebʼ: «Kʼaʼut yookex xkʼoxlankil li maaʼusilal?
5 Yeemaq we, kʼaru qʼaxal sa xyeebʼal “kuybʼil sachbʼil laamaak” malaj xyeebʼal “waklin ut bʼeen?”.
6 Abʼan, re naq teekʼe reetal naq li Ralal li Winq wank xwankil saʼ ruuchichʼochʼ re kuyuk ut sachok maak...». Ut kixye re li sik: «Waklin, xok laachʼaat ut ayu saʼ laawochoch».
7 Ut li winq xwakliik ut xkoho saʼ rochoch.
8 Naq ebʼ li qas qiitzʼin xeʼril aʼin, sachsokebʼ xchʼool xeʼkanaak ut xeʼxkʼe xloqʼal li Yos xbʼaan naq kixkʼe xwankilebʼ li winq.
9 Naq li Jesús kiʼelk aran, kiril jun li winq aj Mateo xkʼabʼaʼ chunchu saʼ li ochoch bʼarwiʼ nekeʼxchʼutubʼ li toj choʼq re li awabʼej, ut kixye re: «Taaqehin». Saʼ junpaat kiwakliik laj Mateo ut kixtaqe.
10 Moqon chik naq li Jesús yook chi waʼak* saʼ rochoch laj Mateo, xeʼwulak naabʼalebʼ li winq li nekeʼxchʼutubʼ li toj choʼq re li awabʼej ut ebʼ laj maak ut xeʼok chi waʼak rochbʼeen ut rochbʼeenebʼ li xtzolom.
11 Naq ebʼ laj pariseey xeʼril aʼin, xeʼxpatzʼ re li xtzolom li Jesús: «Kʼaʼut naq li nakʼutuk eere nawaʼak rikʼinebʼ li nekeʼxchʼutubʼ li toj choʼq re li awabʼej ut ebʼ laj maak?».
12 Saʼ xkʼabʼaʼ naq li Jesús kirabʼihebʼ, kixye rehebʼ: «Li kawebʼ inkʼaʼ nekeʼraj aj bʼanonel abʼan ebʼ li yaj nekeʼajok re.
13 Joʼkan naq ayuqex ut twomaq ru kʼaru xyaalalil ebʼ li aatin aʼin: “Inkʼaʼ nawaj naq texmayejaq xul, nawaj bʼan naq teetoqʼobʼa ruhebʼ* li junchʼol”. Xbʼaan naq inkʼaʼ xinchalk chi xbʼoqbʼalebʼ li tiikebʼ xchʼool, xinchalk bʼan chi xbʼoqbʼalebʼ laj maak».
14 Tojaʼ naq ebʼ li xtzolom laj Juan xeʼnachʼok rikʼin li Jesús ut xeʼxye re: «Kʼaʼut naq laaʼo ut ebʼ laj pariseey kʼaynaqo chi ayuunik* ut ebʼ laatzolom inkʼaʼ nekeʼxbʼaanu?».
15 Li Jesús kixye rehebʼ: «Naq nawank junaq li sumlaak ebʼ li ramiiw li winq li ok re chi sumlaak moko rahebʼ ta saʼ xchʼool xbʼaan naq toj wank rikʼinebʼ, peʼyaal? Abʼan twulaq xkutankil naq teʼmaqʼeʼq chiru li winq li ok re chi sumlaak ut toj aran teʼayuuniq.*
16 Maaʼani naxbʼoj jun peraas li akʼil tʼikr chiru junaq li qʼeel tʼikr. Xbʼaan naq li qʼeel tʼikr tjiseʼq naq tixmoch ribʼ li akʼil tʼikr, ut tnimanq li xqʼichilal.
17 Maaʼani naxkʼe li akʼ bʼiin saʼ qʼeel tzʼuum. Wi tbʼaanumanq raj, li tzʼuum tpukʼeʼq ut li bʼiin tjoyeʼq, ut li tzʼuum maakʼaʼ chik t-oq wiʼ. Joʼkan naq ebʼ li qas qiitzʼin nekeʼxkʼe li akʼ bʼiin saʼ akʼil tzʼuum ut chi joʼkan li bʼiin ut li tzʼuum maakʼaʼ nekeʼxkʼul».
18 Naq yook xyeebʼal aʼin, kijilok rikʼin jun rehebʼ li najolomink re li naʼaj bʼarwiʼ nekeʼloqʼonink ebʼ laj judiiy, kixwiqʼibʼ ribʼ chiru li Jesús ut kixye re: «Ak xkamk tana linrabʼin, abʼan chalqat, kʼe laawuqʼ saʼ xbʼeen ut twanq wiʼ chik xyuʼam».
19 Tojaʼ naq li Jesús kiwakliik ut xkoho chirix ut ebʼ li xtzolom xeʼtaqenk re.
20 Ut jun li ixq li nakubʼeek xkikʼel kijilok chirix li Jesús ut kixchʼeʼ chire li xtʼikr. Kabʼlaju chihabʼ kirahobʼtesiik li ixq aʼin xbʼaan li yajel,
21 ut kixye saʼ xchʼool: «Yal rikʼin xchʼeʼbʼal li xtʼikr tinkʼiraaq».
22 Naq li Jesús kixbʼalqʼusi ribʼ ut kiril li ixq kixye re: «Matxuwak at inrabʼin! Xatkʼiraak xbʼaan naq nakaapaabʼ naq li Yos tatxtenqʼa». Ut saʼ li hoonal ajwiʼ aʼan li ixq kikʼiraak.
23 Chirix chik aʼan, naq li Jesús kiʼok saʼ rochoch laj jolominel, kirilebʼ laj xolbʼ ut ebʼ li qas qiitzʼin li yookebʼ xpoqoqinkil ribʼebʼ.
24 Li Jesús kixye rehebʼ: «Elenqex arin xbʼaan naq li chʼina ixqaʼal moko kamenaq ta yal yook chi wark». Naq xeʼrabʼi aʼin, xeʼxjap re chi xseʼenkil.
25 Naq xeʼelk ebʼ li qas qiitzʼin, li Jesús kiʼok bʼarwiʼ wank li chʼina ixqaʼal kixchap chi ruqʼ ut li chʼina ixqaʼal kiwakliik.
26 Ut li esil aʼin kisutunk saʼ chixjunil li teep.
27 Naq li Jesús kiʼelk saʼ rochoch laj jolominel, wiibʼ li mutzʼ xeʼtaqenk re ut japjokebʼ re chi xyeebʼal: «Toqʼobʼa qu* at ralal laj David!».
28 Naq li Jesús kiʼok saʼ jun li ochoch ebʼ li mutzʼ xeʼjilok rikʼin ut li Jesús kixpatzʼ rehebʼ: «Ma nekeepaabʼ naq tinruuq eekʼirtasinkil?». «Heeheʼ, Qaawaʼ» chankebʼ re.
29 Tojaʼ naq kixchʼeʼ saʼebʼ li ru ut kixye rehebʼ: «Chiʼuxq joʼ xeepatzʼ saʼ xkʼabʼaʼ naq nekeepaabʼ li Yos».
30 Ut xeʼok chi ilok. Abʼan li Jesús kixye rehebʼ chi chʼolchʼo ru: «Maaʼani ajʼe teeseeraqʼi aʼin».
31 Abʼan naq xeʼelk aran, xeʼok xseeraqʼinkil saʼ chixjunil li teep li kixbʼaanu li Jesús.
32 Joʼkan bʼiʼ, naq yookebʼ chi xik, ebʼ li qas qiitzʼin xeʼxkʼam chaq re li Jesús jun li winq li inkʼaʼ naru chi aatinak li echaninbʼil xbʼaan jun li maaʼus aj musiqʼej.
33 Naq li Jesús kirisi li maaʼus aj musiqʼej, li winq kiʼaatinak. Sachsokebʼ xchʼool xeʼkanaak ebʼ li tenamit ut xeʼxye: «Maajunwa ilbʼil junaq li naʼlebʼ joʼ aʼin saʼ Israel».
34 Ebʼ laj pariseey xeʼok xyeebʼal: «Li winq aʼin narisi ebʼ li maaʼus aj musiqʼej saʼ xkʼabʼaʼ li najolomink rehebʼ li maaʼus aj musiqʼej».
35 Li Jesús kiʼok xbʼeeninkil chixjunil li tenamit ut ebʼ li kʼalebʼaal. Yook chi kʼutuk saʼebʼ li naʼaj bʼarwiʼ nekeʼloqʼonink ebʼ laj judiiy, yook xyeebʼal resil li chaabʼil esil chirix li Xʼawabʼejilal li Yos, ut xkʼirtasinkil ebʼ li qas qiitzʼin li jalan jalanq xyajelebʼ ut xrahilalebʼ.
36 Naq kirilebʼ li qas qiitzʼin kʼajoʼ kixtoqʼobʼa ruhebʼ xbʼaan naq moko chʼolaninbʼilebʼ ta ut tzʼeqtaananbʼilebʼ* joʼebʼ li karneer li maakʼaʼ aj ilol rehebʼ.
37 Tojaʼ naq kixye rehebʼ li xtzolom: «Numtajenaq ru li awimq li xqʼanoʼk, abʼan moko kʼihebʼ ta laj kʼanjel.
38 Joʼkan naq cheetzʼaamaq re laj Echal awimq naq tixtaqlahebʼ laj kʼanjel re naq teʼxsikʼ ru li rawimq».
Xtzʼaqobʼ ebʼ li naʼlebʼ
^ Malaj «li kayuuk».
^ Malaj «kixhobʼ li Yos». Taawil xchʼolobʼankil li aatin, hobʼok.
^ Malaj «chunchu saʼ meex».
^ Malaj «teeruxtaana ruhebʼ».
^ Malaj «xkanabʼankil waʼak chiru jarubʼaq kutan».
^ Malaj «teʼxkanabʼ waʼak chiru jarubʼaq kutan».
^ Malaj «Uxtaana qu».
^ Saʼ griego «rahobʼtesinbʼilebʼ ut tʼantʼokebʼ».
