Romanos 1:1-32
1 Li esilhu aʼin kixtzʼiibʼa laj Pablo, xmoos li Kristo Jesús. Kixaqabʼaak choʼq apóstol ut kisikʼeʼk ru re xkʼebʼal chi naweʼk li chaabʼil esil chirix li Yos.
2 Aʼin li chaabʼil esil li kixye chaq li Yos junxil saʼ li Raatin saʼ xkʼabʼaʼebʼ li xpropeet.
3 Li esil aʼin naʼaatinak chirix li Ralal, li kichalk saʼ xjunkabʼal laj David,
4 saʼ xkʼabʼaʼ li xwankil li santil musiqʼej, li Alalbʼej kiwaklesiik chi yoʼyo saʼ xyanqebʼ li kamenaq ut aʼin kixkʼutbʼesi naq aʼan li Ralal li Yos aʼ li Qaawaʼ Jesukriist.
5 Saʼ xkʼabʼaʼ aʼan, li Yos kixkʼut chiwu* li xnimal rusilal. Li Jesús kixaqabʼank we choʼq apóstol re naq ebʼ li qas qiitzʼin re chixjunil li tenamit teʼoq chi paabʼank ut teʼabʼinq chiru re xkʼebʼal xloqʼal li xkʼabʼaʼ.
6 Ut laaʼex ajwiʼ wankex saʼ xyanqebʼ li tenamit li bʼoqbʼilebʼ chi xtaqenkil li Jesukriist.
7 Li esilhu aʼin rehebʼ chixjunil li wankebʼ aran Roma li raarokebʼ xbʼaan li Yos ut bʼoqbʼilebʼ re naq santaqebʼ:
Chiwanq taxaq eerikʼin li xnimal rusilal ut li xtuqtuukilal li Yos, li Qayuwaʼ, ut li Qaawaʼ Jesukriist.
8 Xbʼeenwa ninbʼanyoxink cheerix chiru Linyos saʼ xkʼabʼaʼ li Jesukriist xbʼaan naq yalaq bʼar yookebʼ chi aatinak chirix leepaabʼal.
9 Yookin chi kʼanjelak chiru li Yos chi anchal linchʼool rikʼin xkʼebʼal chi naweʼk li chaabʼil esil chirix li Ralal. Li Yos naxnaw naq junelik nekexinjultika saʼ lintij ut inkʼaʼ ninlubʼk chi xbʼaanunkil.
10 Ut nintzʼaama chiru li Yos naq wi naruhank ut naxkʼul xchʼool, anaqwan tinruuq chik eerulaʼaninkil.
11 Qʼaxal nawaj rilbʼal eeru re xwotzbʼal eerikʼin li maatan li nachalk rikʼin li Yos re xkawresinkil leepaabʼal
12 ut nawaj ajwiʼ rilbʼal eeru re xwaklesinkil qachʼool chiqibʼil qibʼ saʼ xkʼabʼaʼ leepaabʼal ut linpaabʼal.
13 Nawaj xyeebʼal eere, ex wechpaabʼanel, naabʼal sut xwaj wulak eerikʼin abʼan inkʼaʼ xinruuk xbʼaanunkil. Xwaj rilbʼal li xchaabʼilal ru li qakʼanjel joʼ yook chi kʼulmank saʼebʼ li junchʼol chi tenamit.
14 Wankin saʼ kʼas rikʼinebʼ laj griego ut rikʼin li jalanebʼ xtenamit,* rikʼinebʼ li wankebʼ xnaʼlebʼ ut rikʼinebʼ li maakʼaʼebʼ xnaʼlebʼ.
15 Joʼkan naq nawaj ajwiʼ xyeebʼal eere li chaabʼil esil, laaʼex li wankex aran Roma
16 xbʼaan naq inkʼaʼ ninxutaanak chi xyeebʼal li chaabʼil esil. Li Yos naroksi li chaabʼil esil re xkʼutbʼesinkil li xwankil ut rikʼin aʼin naru nekeʼkoleʼk li wankebʼ xpaabʼal, xbʼeenwa ebʼ laj judiiy ut chirix chik aʼan ebʼ laj griego.
17 Saʼ xkʼabʼaʼ li chaabʼil esil yook chi kʼutbʼesimank li xtiikilal li Yos chiruhebʼ li nekeʼpaabʼank re ut aʼin naxkawubʼresi li xpaabʼalebʼ joʼ chanru tzʼiibʼanbʼil: «Abʼan li tiik xchʼool twanq xyuʼam saʼ xkʼabʼaʼ li xpaabʼal».
18 Saʼ choxa li Yos yook chaq xkʼutbʼal li xjosqʼil chiruhebʼ li inkʼaʼ nekeʼpaabʼank re ut chiruhebʼ li inkʼaʼ tiikebʼ xchʼool. Ebʼ li qas qiitzʼin aʼin nekeʼxbʼaanu li inkʼaʼ us re xrambʼal chiruhebʼ li junchʼol xnawbʼal li yaal
19 xbʼaan naq li naʼajmank xnawbʼal chirix li Yos wank chiruhebʼ chi kutankil, li Yos ak xkʼut chi tzʼaqal re ru.
20 Li xnaʼlebʼ li Yos li inkʼaʼ nokooruuk rilbʼal naru naqataw ru wi naqatzol chanru kixyobʼtesi li ruuchichʼochʼ. Tooruuq xnawbʼal ajwiʼ chanru aʼan rikʼin xtzʼilbʼal rix chixjunil li kixyobʼtesi. Chixjunil aʼin naxkʼutbʼesi li xwankil li maajunwa naʼosoʼk ut naxkʼutbʼesi naq aʼan li Yos. Joʼkan naq ebʼ aʼan inkʼaʼ naru nekeʼxye “moko xqanaw ta aʼin”.
21 Usta ebʼ li qas qiitzʼin aʼin nekeʼxnaw chaq ru li Yos inkʼaʼ xeʼxkʼe xloqʼal joʼ Xyosebʼ ut inkʼaʼ xeʼbʼanyoxink chiru, moko us ta chik nekeʼkʼoxlak ut li xchʼoolebʼ maakʼaʼ chik naxtaw ru.*
22 Usta nekeʼxye naq wankebʼ xnaʼlebʼ, maakʼaʼebʼ xnaʼlebʼ
23 ut inkʼaʼ chik xeʼxkʼe xloqʼal li Yos li wank chi junelik, xeʼxkʼe bʼan xloqʼal li xjalam u ebʼ li winq li nekeʼkamk, joʼ ajwiʼ ebʼ li xjalam u li xul li nekeʼrupupik, ebʼ li xul li kaahibʼ roq ut ebʼ li xul li nekeʼxjukuki ribʼ.
24 Joʼkan naq li Yos kixkanabʼ naq teʼxbʼaanu li tzʼaj aj naʼlebʼ li naʼalaak saʼ xchʼoolebʼ. Saʼ xkʼabʼaʼ aʼin nekeʼxbʼaanu li xutaanalil naʼlebʼ rikʼinebʼ li xtibʼel.
25 Xeʼxpaabʼ li tikʼtiʼ ut maawaʼ li yaal li nachalk rikʼin li Yos. Xeʼxkʼe xloqʼal li yobʼtesihom ut xeʼok chi kʼanjelak chiru ut maawaʼ chiru laj Yobʼtesinel li tento raj xnimankil ru chi junelik. Joʼkan taxaq.
26 Joʼkan naq li Yos kixkanabʼ naq li tzʼaj aj naʼlebʼ li nekeʼxrahi ru ttaqlanq saʼ xbʼeenebʼ. Ebʼ li ixq inkʼaʼ chik nekeʼraj wank rikʼin winq, xeʼok bʼan chi wank rikʼinebʼ li rech-ixqilal. Abʼan moko xeʼyobʼtesiik ta xbʼaan li Yos re naq teʼnaʼlebʼaq chi joʼkan.
27 Joʼkan ajwiʼ, ebʼ li winq inkʼaʼ chik nekeʼraj wank rikʼin ixq. Kʼajoʼ xeʼtiqwoʼk chiribʼilebʼ ribʼ, xeʼwank rikʼin rechwinqilal ut xeʼxbʼaanu li tzʼaj aj naʼlebʼ. Abʼan teʼxkʼul xtojbʼal xmaak joʼ tzʼaqal xkʼulubʼ li junjunq.
28 Xbʼaan naq xeʼxkʼoxla naq maakʼaʼ ajʼe xnawbʼal ru li Yos chi tzʼaqal re ru, li Yos kixkanabʼ naq teʼxkʼoxla li inkʼaʼ us re naq teʼxbʼaanu li moko uxk ta naraj.
29 Ebʼ li qas qiitzʼin aʼin inkʼaʼ nekeʼnaʼlebʼak saʼ tiikilal ut nekeʼxbʼaanu yalaq kʼaru li maak, inkʼaʼ nekeʼkʼojlaak xchʼool ut nekeʼxbʼaanu li maaʼusilal; nekeʼkaqalink, nekeʼkamsink, nekeʼpleetik, nekeʼbʼalaqʼik ut nekeʼxbʼaanu li inkʼaʼ us rehebʼ li junchʼol; nekeʼwulak chiru numsink aatin,
30 nekeʼyoobʼank aatin chirixebʼ li junchʼol, xikʼ nekeʼril li Yos, maakʼaʼebʼ xxutaan, nekeʼxqʼetqʼeti ribʼ, nekeʼxnima ribʼ; nekeʼxkʼubʼ li maaʼusilal, nekeʼxqʼet ribʼ chiru li xnaʼ xyuwaʼ,
31 maakʼaʼ nekeʼxtaw ru, inkʼaʼ nekeʼxbʼaanu li nekeʼxyeechiʼi, inkʼaʼ nekeʼxyuʼami li tzʼaqal rahok ut inkʼaʼ nekeʼuxtaanank u.
32 Usta chʼolchʼo chiruhebʼ naq li Yos kixye naq tento teʼkamq li nekeʼxbʼaanu aʼin, inkʼaʼ xeʼxkanabʼ xbʼaanunkil li yibʼ aj naʼlebʼ ut nekeʼxkʼulubʼa ajwiʼ naq ebʼ li junchʼol teʼxbʼaanu aʼin.
Xtzʼaqobʼ ebʼ li naʼlebʼ
^ Malaj «chiqu».
^ Malaj «li maawaʼebʼ aj griego».
^ Saʼ griego «kiqʼoqyinoʼk».
