Romanos 13:1-14
13 Chiqajunilo tento tooʼabʼinq chiruhebʼ li nekeʼtaqlank saʼ qabʼeen. Maakʼaʼ junaq li awabʼejilal li naru chi taqlank wi inkʼaʼ kʼebʼil xleseens xbʼaan li Yos. Li Yos kixxaqabʼ saʼebʼ li xwankil ebʼ li qas qiitzʼin li nekeʼtaqlank saʼ qabʼeen.
2 Joʼkan bʼiʼ, li naxqʼet ribʼ chiruhebʼ li wankebʼ xwankil yook xqʼetbʼal ribʼ chiru li Yos. Li nekeʼxqʼet ribʼ chiru li xkʼubʼahom li Yos, teʼxtoj xmaak.
3 Li nekeʼxbʼaanu li us inkʼaʼ nekeʼxuwak chiruhebʼ li wankebʼ xwankil, abʼan li nekeʼxbʼaanu li inkʼaʼ us nekeʼxuwak chiruhebʼ. Moko tento ta taaxuwahebʼ li wankebʼ xwankil. Wi nakaabʼaanu li us, teʼxnima aawu.
4 Aʼanebʼ yookebʼ chi kʼanjelak saʼ xkʼabʼaʼ li Yos re aatenqʼankil. Abʼan wi nakaabʼaanu li inkʼaʼ us, wank xyaalal naq tatxuwaq. Aʼanebʼ kʼebʼilebʼ xwankil re naq ebʼ li qas qiitzʼin teʼxtoj xmaak ut inkʼaʼ teʼkʼeheʼq chi xtojbʼal xmaak chi maakʼaʼ xyaalal. Li wankebʼ xwankil yookebʼ chi kʼanjelak chiru li Yos re xkʼebʼalebʼ chi xtojbʼal xmaak li nekeʼxbʼaanu li inkʼaʼ us.
5 Wank tzʼaqal xyaalal naq texʼabʼinq. Maawaʼ yal saʼ xkʼabʼaʼ naq texkʼeheʼq chi xtojbʼal eemaak, teebʼaanu bʼan re naq maakʼaʼ tchʼiʼchʼiʼinq re leechʼool.
6 Joʼkan naq laaʼex ajwiʼ nekeekʼe li tumin li nachʼutubʼamank choʼq rehebʼ li awabʼej xbʼaan naq li Yos naroksihebʼ re naq junelik teʼkʼanjelaq chirix li tenamit.
7 Kʼehomaq rehebʼ li junjunq li tento teʼxkʼul. Li naxpatzʼ eere li toj li nachʼutubʼamank choʼq re li awabʼej, kʼehomaq re; li naxpatzʼ eere li toj li nachʼutubʼamank choʼq re li awabʼej, kʼehomaq re; li naraj naq tat-abʼinq chiru, abʼink chiru; li naraj naq taawoxloqʼi ru, oxloqʼi ru.
8 Mexkʼasok wi inkʼaʼ texruuq xtojbʼal, li tento teebʼaanu aʼan xraabʼal eeribʼ cheeribʼil eeribʼ. Xbʼaan naq li naxra li ras riitzʼin yook xbʼaanunkil li naxpatzʼ li chaqʼrabʼ.
9 Xbʼaan naq li Chaqʼrabʼ naxye: «Matmuxuk sumlaak,* matkamsink, mat-elqʼak, maarahi ru li maawaʼ aawe», ebʼ li Chaqʼrabʼ aʼin ut ebʼ li junchʼol chi taql li wank saʼ li Chaqʼrabʼ, nayeemank rikʼin wiibʼ oxibʼ ajwiʼ li aatin: «Taara laawas aawiitzʼin joʼ naq nakaara aawibʼ».
10 Li qas qiitzʼin li narahok inkʼaʼ naxbʼaanu li maaʼusilal re li ras riitzʼin. Joʼkan bʼiʼ, li narahok yook xbʼaanunkil li naxpatzʼ li chaqʼrabʼ.
11 Tento raj teebʼaanu aʼin xbʼaan naq laaʼex nekeenaw naq ak xwulak xqʼehil naq t-ajq eeru. Li qakolbʼal jwal nachʼ wank chiru naq xooʼok chi paabʼank.
12 Ak raqeʼk re li qʼoqyink ut tiklaak re li kutan. Joʼkan naq qakanabʼaq xbʼaanunkil li xnaʼlebʼ li qʼoqyink ut qatiqibʼaq qibʼ rikʼin li xkʼanjelobʼaal li saqenk.
13 Choonaʼlebʼaq chiʼus chanchan tawiʼ toj kutan; inkʼaʼ tooninqʼehiq saʼ joʼmajoʼil, inkʼaʼ tookalaaq, inkʼaʼ tqamux qibʼ,* inkʼaʼ toonaʼlebʼaq joʼebʼ li nekeʼmaakobʼk chi maakʼaʼebʼ xxutaan,* inkʼaʼ toopleetiq, inkʼaʼ tookaqaliq.
14 Kʼamomaq bʼan eere rikʼin li Qaawaʼ Jesukriist ut meekʼoxla rubʼelaj chanru xyuʼaminkil li naraj li tibʼelej.
Xtzʼaqobʼ ebʼ li naʼlebʼ
^ Malaj «Matmuxuk kaxaar».
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Li aatin saʼ griego, asélgueia. Taawil xchʼolobʼankil li aatin, maakobʼk chi maakʼaʼ li xutaan.
