Romanos 16:1-27
-
Laj Pablo naxtaqla li xFebe, jun laj paabʼanel chiru li Yos (1, 2)
-
Naxtaqla xsahilebʼ xchʼool ebʼ laj paabʼanel re Roma (3-16)
-
Naxtzʼaama chiruhebʼ naq ajʼooq ruhebʼ chi rilbʼal li nekeʼxjach ebʼ li chʼuut (17-20)
-
Li nekeʼtzʼaqonk rochbʼeen laj Pablo nekeʼtaqlank sahil chʼoolejil (21-24)
-
Kikʼemank chi naweʼk li muqmukil naʼlebʼ li nachalk rikʼin li Yos (25-27)
16 Nintaqla eerikʼin li xFebe, jun li qechpaabʼanel li nakʼanjelak saʼ li chʼuut li wank Cencreas
2 re naq teekʼul chi anchal eechʼool saʼ xkʼabʼaʼ li Qaawaʼ joʼ xkʼulubʼebʼ li santil paabʼanel ut teetenqʼa rikʼin li t-ajmanq chiru xbʼaan naq aʼan kixkol ajwiʼ rix naabʼal ebʼ li qechpaabʼanel ut saʼ xyanqebʼ wankin laaʼin.
3 Teekʼe xsahil xchʼool li xPrisca ut laj Áquila li nekeʼtzʼaqonk wochbʼeen saʼ xkʼanjel li Kristo Jesús,
4 li kachʼin chik ma xeʼkamk saʼ inkʼabʼaʼ. Laaʼin ut chixjunilebʼ li chʼuut li maawaʼebʼ aj judiiy naqabʼanyoxi rehebʼ.
5 Teekʼe ajwiʼ xsahil xchʼool li chʼuut li wank saʼ rochochebʼ. Teekʼe xsahil xchʼool laj Epéneto, li raaro inbʼaan, jun rehebʼ li xbʼeen li kiʼok xpaabʼankil li Kriist aran Asia.
6 Teekʼe xsahil xchʼool xMaría, li kaw xkʼanjelak cheerix.
7 Teekʼe xsahil xchʼool laj Andrónico ut laj Junias. Aʼanebʼ linkomon ut wechpreexil, nawbʼilebʼ ru chiʼus xbʼaanebʼ li apóstol ut ak junxil nekeʼok xtaqenkil li Kriist chiwu laaʼin.
8 Teekʼe xsahil xchʼool laj Ampliato, li raaro inbʼaan, ut naxtaqe ajwiʼ li Qaawaʼ.
9 Teekʼe xsahil xchʼool laj Urbano, li natzʼaqonk qochbʼeen saʼ xkʼanjel li Kriist, ut laj Estaquis, li raaro inbʼaan.
10 Teekʼe xsahil xchʼool laj Apeles, li kʼulubʼanbʼil xbʼaan li Kriist. Teekʼe xsahilebʼ xchʼool li wankebʼ saʼ rochoch laj Aristóbulo.
11 Teekʼe xsahil xchʼool laj Herodión, linkomon. Teekʼe xsahilebʼ xchʼool li wankebʼ saʼ rochoch laj Narciso, li nekeʼxtaqe li Qaawaʼ.
12 Teekʼe xsahil xchʼool li xTrifena ut li xTrifosa, ebʼ li ixq aʼin yookebʼ chi kʼanjelak chi kaw saʼ xkʼanjel li Qaawaʼ. Teekʼe xsahil xchʼool li xPérsida, li raaro qabʼaan, xbʼaan naq yook chi kʼanjelak chi kaw saʼ xkʼanjel li Qaawaʼ.
13 Teekʼe xsahil xchʼool laj Rufo, li qʼaxal chaabʼil nakʼanjelak chiru li Qaawaʼ, teekʼe ajwiʼ xsahil xchʼool li xnaʼ li nawil ajwiʼ joʼ innaʼ.
14 Teekʼe xsahil xchʼool laj Asíncrito, laj Flegonte, laj Hermes, laj Patrobas, laj Hermas ut ebʼ laj paabʼanel li wankebʼ rikʼinebʼ.
15 Teekʼe xsahil xchʼool laj Filólogo ut li xJulia, laj Nereo ut li ranabʼ, laj Olimpas ut chixjunilebʼ li santil paabʼanel li wankebʼ rikʼinebʼ.
16 Naq teekʼe xsahil eechʼool chiribʼil eeribʼ, teetzʼubʼ eeru. Chixjunilebʼ li nekeʼtaqenk re li Kriist li wankebʼ saʼ chixjunil ebʼ li chʼuut nekeʼxtaqla xsahil leechʼool.
17 Ex wechpaabʼanel, chi chʼolchʼo ru nintzʼaama cheeru naq ajʼooq eeru chi rilbʼal li nekeʼxjach ebʼ li chʼuut ut nekeʼxbʼaanu naq ebʼ li junchʼol teʼxkanabʼ paabʼank. Aʼin moko naxchap ta ribʼ rikʼin li xeetzol. Meejunaji eeribʼ rikʼinebʼ.
18 Xbʼaan naq ebʼ li winq aʼin moko xmoosebʼ ta li Kriist, li Qaawaʼ, xmoosebʼ bʼan li nekeʼxrahi ru ut nekeʼxbʼalaqʼi ebʼ li qas qiitzʼin rikʼin qʼunil aatin ut chʼinaʼusil aatin.
19 Chixjunilebʼ xeʼrabʼi resil naq laaʼex nekexʼabʼink ut nasahoʼk inchʼool eebʼaan. Nawaj naq wanq eenaʼlebʼ re naq teenaw bʼar wank li us ut saqaq eeru chiru li inkʼaʼ us.
20 Ut li Yos li nakʼehok tuqtuukilal chi seebʼ tixpitzʼ laj Tza rubʼel leeroq. Aʼ taxaq li xnimal rusilal li Qaawaʼ Jesús chiwanq eerikʼin.
21 Laj Timoteo, li natzʼaqonk wochbʼeen, naxtaqla xsahil eechʼool. Nekeʼxtaqla ajwiʼ xsahil leechʼool laj Lucio, laj Jasón ut laj Sosípatro, ebʼ linkomon.
22 Laaʼin laj Tercio, li xintzʼiibʼa li esilhu aʼin nintaqla xsahil eechʼool saʼ xkʼabʼaʼ li Qaawaʼ.
23 Laj Gayo, li nikinxkʼul saʼ rochoch ut naxkʼul ajwiʼ li chʼuut, naxtaqla xsahil leechʼool. Laj Erasto li naxkʼul xtuminal li tenamit ut laj Cuarto, li riitzʼin, nekeʼxtaqla xsahil eechʼool.
24 *
25 Li Yos naru naxbʼaanu naq kawaqex saʼ xkʼabʼaʼ li chaabʼil esil li ninkʼe chi naweʼk ut saʼ xkʼabʼaʼ li esil chirix li Jesukriist. Li esil aʼin kikʼemank chi naweʼk saʼ xkʼabʼaʼ li muqmukil naʼlebʼ li nachalk rikʼin li Yos li kiwank chi muqmu chiru naabʼal chihabʼ.
26 Anaqwan ak xkʼemank chi naweʼk li muqmukil naʼlebʼ aʼin ut saʼ xkʼabʼaʼ li kixye chaq li Raatin li Yos, chixjunilebʼ li tenamit ak nekeʼxnaw chirix. Aʼin naxchap ribʼ rikʼin li xtaql li Yos li wank chi junelik. Aʼan naraj naq chixjunilebʼ li tenamit teʼabʼinq chiru ut teʼxpaabʼ.
27 Kaʼajwiʼ li Yos wank xnaʼlebʼ ut xkʼulubʼ naq tixkʼul li loqʼal chi junelik saʼ xkʼabʼaʼ li Jesukriist. Joʼkan taxaq.
Xtzʼaqobʼ ebʼ li naʼlebʼ
^ Li raqal aʼin natawmank saʼ wiibʼ oxibʼ li Santil Hu. Abʼan moko natawmank ta saʼ chixjunil ebʼ li najteril hu li tzʼaqal re ru li wank saʼ griego.
