Romanos 5:1-21
5 Joʼkan bʼiʼ, anaqwan naq yeebʼil naq tiik li qachʼool saʼ xkʼabʼaʼ li qapaabʼal, choowanq saʼ tuqtuukilal rikʼin li Yos saʼ xkʼabʼaʼ li Qaawaʼ Jesukriist.
2 Saʼ xkʼabʼaʼ ajwiʼ li qapaabʼal chirix li Jesús xoojilok chixkʼatq li Yos ut xqataw li xnimal rusilal. Ut chisahoʼq saʼ qachʼool chi roybʼeninkil naq li Yos tixtaqsi qawankil.
3 Ut moko kaʼaj tawiʼ aʼin, chisahoʼq saʼ qachʼool naq tqakʼul li chʼaʼajkilal xbʼaan naq naqanaw naq ebʼ li chʼaʼajkilal naxkʼam chaq li kuyum;
4 li kuyum naxbʼaanu naq sahaq saʼ xchʼool li Yos qikʼin; naq sa saʼ xchʼool li Yos qikʼin wank qoybʼenihom,
5 ut li oybʼenihom inkʼaʼ nokooxkʼe saʼ xutaan xbʼaan naq li Yos naroksi li xsantil musiqʼej li xqakʼul rikʼin re xkʼutbʼesinkil naq nokooxra.
6 Joʼkan ajwiʼ, naq laaʼo chaq aj maak, li Kriist kikamk saʼ xkʼabʼaʼebʼ li maaʼusebʼ xnaʼlebʼ saʼ li hoonal li xaqabʼanbʼil.
7 Moko yalaq ani ta naxkʼe xyuʼam chirix li tiik xchʼool, abʼan maare wank junaq li qas qiitzʼin li naraj kamk chirix li chaabʼil xnaʼlebʼ.
8 Abʼanan, li Yos kixkʼutbʼesi naq nokooxra chi joʼkaʼin: usta laaʼo chaq aj maak, li Kriist kikamk saʼ qakʼabʼaʼ.
9 Ut anaqwan naq yeebʼil naq tiik qachʼool saʼ xkʼabʼaʼ li xkikʼel li Jesús, chʼolchʼo tzʼaqal chiqu naq tookoleʼq chiru li xjosqʼil li Yos.
10 Usta xik’ naqil chaq li Yos, wanko wiʼ chik choʼq ramiiw saʼ xkʼabʼaʼ li xkamik li Ralal. Saʼ xkʼabʼaʼ aʼin chʼolchʼo tzʼaqal chiqu naq tookoleʼq saʼ xkʼabʼaʼ li xyuʼam li Jesús, anaqwan naq wanko wiʼ chik choʼq ramiiw li Yos.
11 Li kixbʼaanu chaq li Yos saʼ xkʼabʼaʼ li Qaawaʼ Jesukriist naxkʼe xsahil qachʼool xbʼaan naq saʼ xkʼabʼaʼ aʼan wanko wiʼ chik choʼq ramiiw li Yos.
12 Joʼkan bʼiʼ, saʼ xkʼabʼaʼ jun chi winq, li maak kiʼok chaq saʼ ruuchichʼochʼ ut saʼ xkʼabʼaʼ li maak kiʼok chaq li kamk. Ut chi joʼkaʼin li kamk kixjekʼi ribʼ saʼ xyanqebʼ li qas qiitzʼin xbʼaan naq chixjunilebʼ xeʼmaakobʼk...
13 Xbʼaan naq ak wank chaq li maak saʼ ruuchichʼochʼ naq toj maakʼaʼ chaq li Chaqʼrabʼ. Abʼan inkʼaʼ naru naqʼabʼaak chi maakobʼk junaq li qas qiitzʼin wi maakʼaʼ li chaqʼrabʼ.
14 Abʼanan, li kamk kijolomink joʼ awabʼej chalen chaq saʼ xkutankil laj Adán toj saʼ xkutankil laj Moisés. Kijolomink ajwiʼ saʼ xbʼeenebʼ li inkʼaʼ xeʼmaakobʼk joʼ kimaakobʼk laj Adán. Laj Adán chanchan li winq li tchalq moqon.
15 Abʼanan, li maatan li naxkʼe li Yos moko chanchan ta li xmaak laj Adán. Naabʼalebʼ xeʼkamk saʼ xkʼabʼaʼ li xmaak li winq aʼin. Abʼan li xnimal rusilal li Yos ut li maatan li naxkʼe saʼ xkʼabʼaʼ li xchaabʼilal xchʼool jun li winq aʼ li Jesukriist, qʼaxal naabʼal wiʼ chik chiru aʼin. Saʼ xkʼabʼaʼ li maatan aʼin, naabʼalebʼ li qas qiitzʼin qʼaxal nekeʼosobʼtesiik xbʼaan li Yos.
16 Joʼkan ajwiʼ, li rusilal li naxkʼam chaq li maatan li naxkʼe li Yos moko juntaqʼeet ta rikʼin li rahilal li naxkʼam chaq li xmaak jun li winq. Saʼ xkʼabʼaʼ jun chi maak nayeemank naq chixjunilebʼ wankebʼ xmaak. Abʼan naq li Yos kixkʼe li maatan, ak xeʼmaakobʼk naabʼalebʼ li qas qiitzʼin ut saʼ xkʼabʼaʼ aʼin, li Yos kixye naq tiikebʼ xchʼool.
17 Saʼ xkʼabʼaʼ li xmaak jun chi winq, li kamk kijolomink joʼ awabʼej. Abʼan li xnimal rusilal li Yos ut li maatan li naxkʼe qe re naq tiikaq qachʼool, qʼaxal naabʼal ut qʼaxal us wiʼ chik. Ut li teʼkʼuluq re aʼin, teʼwanq xyuʼam saʼ xkʼabʼaʼ li Jesukriist ut teʼjolominq joʼ awabʼej!
18 Joʼ chanru naq jun li maak kixkʼam chaq li kamk saʼ xbʼeen chixjunilebʼ li qas qiitzʼin, joʼkan ajwiʼ, xbʼaan jun ajwiʼ li bʼaanuhom li tiik ru nayeemank naq li jalan jalanq chi qas qiitzʼin tiikebʼ xchʼool ut teʼxkʼul li yuʼam.
19 Joʼ chanru naq naabʼalebʼ xeʼmaakobʼk xbʼaan naq jun li winq kixqʼet ribʼ, joʼkan ajwiʼ, naabʼalebʼ tiikaqebʼ xchʼool xbʼaan naq jun li winq kiʼabʼink.
20 Joʼkan bʼiʼ, kikʼemank li Chaqʼrabʼ re xkʼutbʼesinkil naq ebʼ li qas qiitzʼin qʼaxal aj maakebʼ, abʼan naq kikʼutunk xnumtajenaqil li xmaakebʼ, li Yos qʼaxal kixkʼutbʼesi wiʼ chik li xnimal rusilal.
21 Abʼan, kʼaru ajʼe? Joʼ chanru naq li maak ut li kamk xeʼjolomink joʼ awabʼej, joʼkan ajwiʼ li xnimal rusilal li Yos kijolomink joʼ awabʼej saʼ tiikilal re xkʼambʼal chaq li junelik yuʼam saʼ xkʼabʼaʼ li Qaawaʼ Jesukriist.
