Romanos 6:1-23
-
Akʼ li qayuʼam xbʼaan naq xkubʼsiik qahaʼ re naq toowanq saʼ junajil rikʼin li Kriist (1-11)
-
Meekanabʼ naq li maak tjolominq joʼ awabʼej saʼ xbʼeen leetibʼel (12-14)
-
Xexwank choʼq xmoos li maak abʼan anaqwan wankex choʼq xmoos li Yos (15-23)
-
Li xtojbʼal rix li maak aʼan li kamk; li maatan li naxkʼe li Yos aʼan li yuʼam (23)
-
6 Joʼkan bʼiʼ, kʼaru tqaye? Ma inkʼaʼ tqakanabʼ maakobʼk re naq tkʼutunq chiʼus li xnimal rusilal li Yos?
2 Maajoqʼe bʼiʼan! Wi ak xookamk chiru li maak, kʼaʼut toj wanko saʼ li maak chi joʼkanan?
3 Ma inkʼaʼ nekeenaw naq chiqajunilo li xkubʼsiik qahaʼ re naq toowanq wiʼ chik saʼ junajil rikʼin li Kristo Jesús, xkubʼsiik ajwiʼ qahaʼ re naq toowanq saʼ junajil rikʼin saʼ li xkamik?
4 Joʼkan naq xoomuqeʼk rochbʼeen li Kriist naq xkubʼsiik qahaʼ re naq toowanq saʼ junajil rikʼin saʼ li xkamik. Ut joʼ chanru naq li Kriist kiwaklesiik chi yoʼyo saʼ xyanqebʼ li kamenaq saʼ xkʼabʼaʼ xloqʼal li Xyuwaʼ, laaʼo ajwiʼ akʼaq li qayuʼam.
5 Wi wanko saʼ junajil rikʼin naq tookamq joʼ kikamk aʼan, wanqo ajwiʼ saʼ junajil rikʼin naq toowaklesiiq chi yoʼyo joʼ kiwaklesiik chi yoʼyo aʼan.
6 Xbʼaan naq saʼ xkʼabʼaʼ aʼan xqakanabʼ xbʼaanunkil chi junajwa li naʼlebʼ li naqabʼaanu chaq junxil re risinkil xwankil li maak saʼ li qatibʼel ut chi joʼkan tooʼelq rubʼel xwankil li maak.
7 Xbʼaan naq li nakamk kuybʼil chik li xmaak.
8 Joʼkan bʼiʼ, wi xookamk rikʼin li Kriist, naqapaabʼ ajwiʼ naq yoʼyoqo rikʼin.
9 Anaqwan naq li Kriist ak xwaklesiik chi yoʼyo saʼ xyanqebʼ li kamenaq, maajunwa chik tkamq. Naqanaw naq li kamk maakʼaʼ chik xwankil saʼ xbʼeen.
10 Joʼkan naq, aʼan jun sut ajwiʼ kikamk re xsachbʼal li maak ut maajunwa chik tkamq. Ut anaqwan yoʼyo re xbʼaanunkil li rajom li Yos.
11 Joʼkan ajwiʼ, jultikoʼk eere naq kamenaqex chaq chiru li maak, abʼan anaqwan yoʼyokex choʼq re li Yos xbʼaan li Kristo Jesús.
12 Joʼkan bʼiʼ, maajunwa chik teekanabʼ naq li maak tjolominq joʼ awabʼej saʼ xbʼeen leetibʼel li nakamk re naq inkʼaʼ teebʼaanu li naxrahi ru leetibʼel.
13 Chi moko teeyeechiʼi chik leetibʼel chiru li maak joʼ li kʼanjelobʼaal re xbʼaanunkil li inkʼaʼ us. Yeechiʼimaq bʼan eeribʼ chiru li Yos joʼebʼ li ak xeʼkamk ut anaqwan yoʼyokebʼ chik. Yeechiʼimaq leetibʼel chiru li Yos joʼ li kʼanjelobʼaal re xbʼaanunkil li us.
14 Li maak moko naru ta nawank choʼq aj echal eere xbʼaan naq moko wankex ta rubʼel xwankil li chaqʼrabʼ, wankex bʼan rubʼel xwankil li xnimal rusilal li Yos.
15 Ma naraj xyeebʼal aʼin naq toomaakobʼq xbʼaan naq wanko rubʼel xwankil li xnimal rusilal li Yos ut inkʼaʼ rubʼel xwankil li chaqʼrabʼ? Maajoqʼe bʼiʼan!
16 Ma inkʼaʼ nekeenaw naq wi nekeekʼe eeribʼ choʼq xmoos junaq li qas qiitzʼin texkanaaq choʼq xmoos ut texʼabʼinq chiru? Joʼkan naq, wi nekeekʼe eeribʼ choʼq xmoos li maak, texkamq. Abʼan wi nekeekʼe eeribʼ choʼq xmoos li Yos ut texʼabʼinq chiru, tiikaq leechʼool.
17 Naqabʼanyoxi re li Yos naq xexʼabʼink chi anchal eechʼool xbʼaan leetzolbʼal li xeekʼul, usta xexwank choʼq xmoos li maak.
18 Saʼ xkʼabʼaʼ naq xexʼelk rubʼel xwankil li maak, laaʼex chik xmoos li tiikilal.
19 Xbʼaan naq laaʼex aj maak yookin roksinkil ebʼ li aatin li nekeetaw ru. Joʼ chanru xeeyeechiʼi xchaʼal leetibʼel joʼ xmoos li tzʼaj aj naʼlebʼ ut li maaʼusilal re xbʼaanunkil li inkʼaʼ us, anaqwan yeechiʼimaq xchaʼal leetibʼel choʼq xmoos li tiikilal re xbʼaanunkil li santil bʼaanuhom.
20 Joʼkan bʼiʼ, naq wankex chaq choʼq xmoos li maak, moko minbʼil ta eeru chi xbʼaanunkil li us.
21 Naq wankex chaq choʼq xmoos li maak, kʼaru nekeeruuchi chaq? Xeebʼaanu ebʼ li naʼlebʼ li naxkʼe eexutaan anaqwan. Ebʼ li naʼlebʼ aʼin nekeʼkʼamok saʼ li kamk.
22 Abʼanan, anaqwan naq xexʼisiik rubʼel xwankil li maak ut wankex choʼq xmoos li Yos, texruuq chik chi wank chi saq ru leeyuʼam ut teetaw ajwiʼ li junelik yuʼam.
23 Xbʼaan naq li xtojbʼal rix li maak aʼan li kamk, abʼan li maatan li naxkʼe li Yos aʼan li junelik yuʼam saʼ xkʼabʼaʼ li Kristo Jesús, li Qaawaʼ.
