Santiago 2:1-26
2 Ex wechpaabʼanel, chanru naq yookex xkʼutbʼesinkil naq nekeepaabʼ li Qaawaʼ Jesukriist li wank xloqʼal ut yookex ajwiʼ chi sikʼok u?
2 Wi saʼ leechʼutam nawulak jun li winq li wank xmatqʼabʼ chi ruqʼ ut tiqto rikʼin tertokil tʼikr ut nawulak ajwiʼ jun li nebʼaʼ li tzʼaj xtʼikr,
3 ma sa nekeeril li tiqto rikʼin tertokil tʼikr ut nekeeye re «Chunlan arin saʼ li chaabʼil naʼaj», abʼan re li nebʼaʼ nekeeye «Kanaqat chi xaqxo» malaj «Chunlan leʼ saʼ li tem li nawoksi choʼq re li woq»?
4 Wi nekeebʼaanu aʼin, ma inkʼaʼ tabʼiʼ yookex chi sikʼok u saʼ eeyanq ut chanchanex ebʼ laj raqol aatin li nekeʼnaʼlebʼak saʼ maaʼusilal?
5 Abʼihomaq ex wechpaabʼanel li raarokex inbʼaan. Ma inkʼaʼ tabʼiʼ li Yos kixsikʼebʼ ru li ilbʼilebʼ joʼ nebʼaʼ xbʼaan li ruuchichʼochʼ re naq teʼbʼihomoʼq saʼebʼ li xpaabʼal ut teʼrechani li Awabʼejilal li kixyeechiʼi rehebʼ li nekeʼrahok re?
6 Abʼanan, laaʼex xeetzʼeqtaana ebʼ li nebʼaʼ. Ma maawaʼ tabʼiʼ ebʼ li bʼihom nekeʼrahobʼtesink eere ut nekeʼjukukink eere saʼebʼ li raqlebʼaal aatin?
7 Li Yos kixkʼe eere jun li kʼabʼaʼej li oxloqʼinbʼil ru. Ma inkʼaʼ tabʼiʼ aʼanebʼ nekeʼxye li inkʼaʼ us chirix li kʼabʼaʼej aʼin?
8 Joʼkan bʼiʼ, wi laaʼex nekeeyuʼami li xchaqʼrabʼ li awabʼej joʼ naxye li xraqal li Raatin li Yos «Taara laawas aawiitzʼin joʼ naq nakaara aawibʼ», qʼaxal us nekeebʼaanu.
9 Abʼan wi inkʼaʼ nekeekanabʼ sikʼok u, yookex chi maakobʼk ut li chaqʼrabʼ tixkʼe chi xtojbʼal eemaak joʼebʼ li nekeʼqʼetok chaqʼrabʼ.
10 Xbʼaan naq, wi junaq li qas qiitzʼin naxpaabʼ chixjunil li Chaqʼrabʼ abʼan napaltoʼk saʼ jun rehebʼ li Chaqʼrabʼ, xqʼet chixjunil li Chaqʼrabʼ.
11 Xbʼaan naq li kixye «Matmuxuk sumlaak»* kixye ajwiʼ «Matkamsink». Joʼkan bʼiʼ, wi inkʼaʼ nakatmuxuk sumlaak* abʼan nakatkamsink, wank aamaak xbʼaan naq xaaqʼet li chaqʼrabʼ.
12 Meekanabʼ aatinak ut naʼlebʼak joʼ naxye li chaqʼrabʼ li nabʼeresink rehebʼ li qas qiitzʼin li moko wankebʼ ta choʼq moos xbʼaan naq li Yos traqoq aatin saʼ eebʼeen joʼ naxye li chaqʼrabʼ aʼin.
13 Xbʼaan naq li inkʼaʼ naʼuxtaanank u* inkʼaʼ t-uxtanaaq ru* naq traqmanq aatin saʼ xbʼeen. Li uxtaanank u* naqʼaxok u saʼ xbʼeen li raqok aatin.
14 Ex wechpaabʼanel, ma wank rusilal naq junaq li qas qiitzʼin tixye naq wank xpaabʼal wi maakʼaʼ xbʼaanuhom? Peʼyaal naq li xpaabʼal inkʼaʼ naru nakolok re?
15 Wi jun laj paabʼanel winq malaj jun laj paabʼanel ixq maakʼaʼ xtʼikr ut kachʼin ajwiʼ xtzekemq wank re xnumsinkil li kutan,
16 ut junaq eere tixye re «Ayu ut matkʼoxlak, nawoybʼeni naq taataw laatʼikr ut laatzekemq re xnumsinkil li kutan», abʼan maakʼaʼ ajʼe wi inkʼaʼ naxkʼe re li naʼajmank chiru!
17 Joʼkan ajwiʼ, wi li paabʼal maakʼaʼ xbʼaanuhom, kamenaq.
18 Abʼanan, jun li qas qiitzʼin naru naxye: «Laaʼat wank aapaabʼal ut laaʼin wank inbʼaanuhom. Kʼut chiwu laapaabʼal li maakʼaʼ xbʼaanuhom ut laaʼin tinkʼut chaawu linpaabʼal rikʼin linbʼaanuhom».
19 Laaʼat nakaapaabʼ naq jun ajwiʼ li Yos, peʼyaal? Qʼaxal us naq nakaapaabʼ aʼin. Abʼan ebʼ li maaʼus aj musiqʼej nekeʼxpaabʼ ajwiʼ aʼin ut nekeʼsiksotk xbʼaanebʼ xxiw.
20 At winq li maakʼaʼ aanaʼlebʼ, ma inkʼaʼ nakaakʼe reetal naq li paabʼal li maakʼaʼ xbʼaanuhom maakʼaʼ naʼok wiʼ?
21 Ma inkʼaʼ tabʼiʼ saʼ xkʼabʼaʼ li xbʼaanuhom laj Abrahán, li qayuwaʼ, kiyeemank naq tiik xchʼool naq kixyeechiʼi laj Isaac, li ralal, saʼ xnaʼaj li mayej?*
22 Joʼ xaawil, li xpaabʼal kikʼanjelak rikʼin li xbʼaanuhom ut li xpaabʼal kitzʼaqobʼresiik saʼ xkʼabʼaʼ li xbʼaanuhom.
23 Chi joʼkaʼin kitzʼaqlok ru li xraqal li Raatin li Yos li naxye: «Laj Abrahán kixpaabʼ li Jehobʼa* ut kiʼilmank naq tiik xchʼool». Ut kikʼabʼaʼiik ramiiw li Jehobʼa.*
24 Joʼ xeeril, li winq nayeemank naq tiik xchʼool saʼ xkʼabʼaʼ li xbʼaanuhom ut moko kaʼaj tawiʼ saʼ xkʼabʼaʼ li xpaabʼal.
25 Joʼkan ajwiʼ, ma inkʼaʼ tabʼiʼ kiyeemank naq tiik xchʼool li xRahab, aj yumbʼeet, saʼ xkʼabʼaʼ li xbʼaanuhom naq ak kixkʼulebʼ chiʼus ebʼ laj kʼehol esil ut kixtaqlahebʼ saʼ jalan chik bʼe?
26 Joʼkan tzʼaqal, joʼ chanru naq kamenaq li tibʼelej li maakʼaʼ xmusiqʼ,* kamenaq ajwiʼ li paabʼal li maakʼaʼ xbʼaanuhom.
Xtzʼaqobʼ ebʼ li naʼlebʼ
^ Malaj «Matmuxuk kaxaar».
^ Malaj «nakatmuxuk kaxaar».
^ Malaj «natoqʼobʼank u».
^ Malaj «ttoqʼobʼaaq ru».
^ Malaj «Li toqʼobʼank u».
^ Malaj «li altar». Taawil xchʼolobʼankil li aatin, xnaʼaj li mayej.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Li aatin saʼ griego, pnéuma. Taawil xchʼolobʼankil li aatin, musiqʼ.
