Tito 1:1-16
1 Laaʼin laj Pablo aj kʼanjel chiru li Yos ut xʼapóstol li Jesukriist. Linpaabʼal ut linkʼanjel joʼ apóstol naxchap ribʼ rikʼin li xpaabʼalebʼ li sikʼbʼilebʼ ru xbʼaan li Yos ut rikʼin li nawom li tzʼaqal re ru chirix li yaal li naxkʼam ribʼ rikʼin xloqʼoninkil li Yos chi anchal qachʼool.
2 Linpaabʼal chalenaq saʼ li junelik yuʼam li yookin roybʼeninkil. Li oybʼenihom aʼin, aʼan li kixyeechiʼi chaq li Yos junxil ut li Yos inkʼaʼ naru natikʼtiʼik.
3 Usta saʼ xqʼehil aʼan kixkʼe chi naweʼk li raatin saʼ xkʼabʼaʼ li chaabʼil esil, laaʼin xinxaqabʼaak re xkʼebʼal chi naweʼk aʼin joʼ chanru xinxtaqla li Yos, aj Kolol qe.
4 Li esilhu aʼin choʼq re laj Tito, li wechpaabʼanel li nawil joʼ walal:
Chiwanq taxaq aawikʼin li xnimal rusilal ut li xtuqtuukilal li Yos Yuwaʼbʼej ut li Kristo Jesús, aj Kolol qe.
5 Xatinkanabʼ aran Creta re naq taatuqubʼ ru li inkʼaʼ us li yook chi bʼaanumank ut taaxaqabʼebʼ wiibʼ oxibʼ li qas qiitzʼin joʼ cheekel winq saʼebʼ li junjunq chi tenamit joʼ chanru xinye aawe naq tento taabʼaanu:
6 li cheekel winq maakʼaʼ qʼabʼanbʼilaq wiʼ, jun ajwiʼ rixaqil twanq ut ebʼ li ralal xkʼajol wanqebʼ choʼq aj paabʼanel ut inkʼaʼ qʼabʼanbʼilaqebʼ chi xbʼeresinkil li xyuʼam saʼ joʼmajoʼil chi moko tyeemanq chirixebʼ naq inkʼaʼ nekeʼabʼink.
7 Xbʼaan naq joʼ aj kʼanjel chiru li Yos, li cheekel winq maakʼaʼ qʼabʼanbʼilaq wiʼ, moko kawaq ta xjolom chi moko tpoʼq ta saʼ junpaat, maawaʼaq aj kalajenaq chi moko aj sakʼonel chi moko qʼaxal tixrahi ta ru li tumin ut tixsikʼ li us kaʼajwiʼ choʼq re xjunes.
8 Tixkʼulebʼ bʼan chiʼus ebʼ li qas qiitzʼin, twulaq chiru xbʼaanunkil li us, tkʼoxlaq chiʼus, tiikaq xchʼool ut junelik tixloqʼoni li Yos ut tixkuy ribʼ.
9 Tento tixchap ribʼ chi kaw rikʼin li raatin li Yos li tzʼaqal yaal naq yooq chi kʼutuk, re xwaklesinkilebʼ xchʼool ebʼ li qas qiitzʼin rikʼin li kʼutum li qʼaxal chaabʼil* ut re xkʼutbʼal chiruhebʼ naq yookebʼ chi paltoʼk.
10 Xbʼaan naq wank naabʼalebʼ li winq li nekeʼxqʼet ribʼ ut yal xsahil rehebʼ naq nekeʼaatinak ut nekeʼxbʼalaqʼi li junchʼol. Wiibʼ oxibʼ rehebʼ li winq aʼin inkʼaʼ nekeʼxkanabʼ xyeebʼal naq tento xyuʼaminkil li xnaʼlebʼebʼ laj judiiy.
11 Ebʼ li winq aʼin tento xtzʼapbʼal saʼ rehebʼ xbʼaan naq aʼanebʼ ajwiʼ nekeʼxjukʼ xpaabʼal li junjunq chi junkabʼal naq nekeʼxkʼut li naʼlebʼ li moko kʼuteʼk ta naraj re xtawbʼal li us choʼq rehebʼ xjunes.
12 Jun rehebʼ li xpropeet kixye ajwiʼ: «Ebʼ laj Creta junelik nekeʼtikʼtiʼik, chanchanebʼ josqʼ aj xul, nekeʼnumwaʼak ut inkʼaʼ nekeʼraj kʼanjelak».
13 Aʼin tzʼaqal yaal. Joʼkan naq maakanabʼ xyeebʼal rehebʼ saʼ kʼaru chi naʼlebʼ yookebʼ chi paltoʼk re naq us wanqebʼ saʼebʼ li xpaabʼal
14 ut inkʼaʼ teʼxkʼe xchʼool chirix li seeraqʼinbʼil aatin li moko yaal ta li nekeʼxye ebʼ laj judiiy ut li xtaql ebʼ li winq li nekeʼxkanabʼ li yaal.
15 Chixjunil saq ru choʼq rehebʼ li qas qiitzʼin li saqebʼ ru. Abʼan maakʼaʼ saq ru choʼq rehebʼ li qas qiitzʼin li tzʼajebʼ ru ut maakʼaʼebʼ xpaabʼal xbʼaan naq tzʼaj li xkʼaʼuxebʼ ut li xchʼoolebʼ.*
16 Nekeʼxkʼe chi naweʼk chiru li komonil naq nekeʼxnaw ru li Yos, abʼan rikʼin li xbʼaanuhomebʼ nekeʼxkʼutbʼesi naq nekeʼxtzʼeqtaana xbʼaan naq maaʼusebʼ xnaʼlebʼ ut inkʼaʼ nekeʼabʼink ut moko kʼulubʼanbʼilebʼ ta chi xbʼaanunkil jalan jalanq li chaabʼil kʼanjel.
