Tito 2:1-15
2 Abʼan laaʼat, maakanabʼ aatinak chirix li naʼlebʼ li naxchap ribʼ rikʼin li kʼutum li qʼaxal chaabʼil.*
2 Ebʼ li winq li ak cheekebʼ chik teʼxnaw xbʼeresinkil chixjunil li nekeʼxbʼaanu ut teʼoxloqʼinq, teʼkʼoxlaq chiʼus ut xaqxoqebʼ chiʼus saʼebʼ li xpaabʼal, teʼrahoq ut wanqebʼ xkuyum.
3 Joʼkan ajwiʼ, ebʼ li ixq li ak cheekebʼ chik tento teʼxkʼutbʼesi rikʼin xnaʼlebʼebʼ naq nekeʼroxloqʼi li Yos, inkʼaʼ teʼyoobʼanq aatin chirixebʼ li junchʼol chi moko semsotqebʼ ta xsaʼ xbʼaan naabʼal li bʼiin ut teʼxnaw xkʼutbʼal li us.
4 Teʼxkʼe xnaʼlebʼebʼ li ixq li qʼaxal saajebʼ re naq teʼxra li xbʼeelomebʼ ut ebʼ li xkokʼal.
5 Teʼkʼoxlaq ajwiʼ chiʼus, saqaq ru xkʼaʼuxebʼ ut xnaʼlebʼebʼ, teʼkʼanjelaq saʼ rochoch* ut teʼxkʼe ribʼ rubʼel xwankil ebʼ li xbʼeelom ut chi joʼkan inkʼaʼ tyeemanq li inkʼaʼ us chirix li raatin li Yos.
6 Joʼkan ajwiʼ, maakanabʼ xkʼebʼal xnaʼlebʼebʼ li winq li qʼaxal saajebʼ re naq teʼkʼoxlaq chiʼus
7 ut saʼ chixjunil laayuʼam kʼutbʼesi naq laaʼat jun chaabʼil eetalil. Maajalpaqi ru li xnaʼlebʼ li Yos naq tatkʼutuq,
8 taawoksi bʼan li aatin li qʼaxal chaabʼil* re naq ebʼ li junchʼol maakʼaʼ teʼruuq xyeebʼal chaawix. Ut chi joʼkan ebʼ li xikʼ nekeʼilok teʼkanaaq saʼ xutaan xbʼaan naq inkʼaʼ teʼruuq xyeebʼal li inkʼaʼ us chiqix.
9 Ebʼ li moos tento teʼxkʼe ribʼ rubʼel xwankil ebʼ li xpatron saʼ chixjunil: teʼxkʼe xqʼe chi xsahobʼresinkilebʼ xchʼool, inkʼaʼ teʼxsume
10 ut inkʼaʼ teʼrelqʼa, tento bʼan teʼxkʼutbʼesi naq nekeʼxye li yaal re naq teʼruutzʼuʼuji ru chixjunil li xkʼutum li Yos, aj Kolol qe.
11 Xbʼaan naq li xnimal rusilal li Yos kikʼutbʼesimank naq kixkʼam chaq li kolbʼa ibʼ choʼq rehebʼ li jalan jalanq chi qas qiitzʼin.
12 Aʼin naxkʼut chiqu naq tento tqatzʼeqtaana chixjunil li inkʼaʼ naxchap ribʼ rikʼin li rajom li Yos ut li naxrahi ru li ruuchichʼochʼ, tqakʼutbʼesi ajwiʼ saʼ li qayuʼam naq nokookʼoxlak chiʼus, inkʼaʼ tqakanabʼ wank saʼ xbʼehil li tiikilal ut tqakʼutbʼesi naq naqaloqʼoni li Yos chi anchal qachʼool saʼ li ruuchichʼochʼ* aʼin,
13 naq yooqo xyoʼoninkil chi sa qachʼool li oybʼenihom ut naq tkʼutbʼesimanq li xloqʼal li Yos, li nim xwankil, ut li Jesukriist, aj Kolol qe.
14 Aʼan kixkʼe li xyuʼam chiqix re qakolbʼal chiru li jalan jalanq chi maaʼusilal* ut xooxsaqobʼresi re naq tooruuq chi wank joʼ jun li tenamit li oxloqʼinbʼil xbʼaan ut tqabʼaanu li chaabʼil kʼanjel chi anchal qachʼool.
15 Maakanabʼ aatinak chirix aʼin ut kʼehok naʼlebʼ* ut saʼ xkʼabʼaʼ naq wank aawankil taakʼe chi naweʼk li inkʼaʼ us li yook chi bʼaanumank. Maakanabʼ naq junaq li qas qiitzʼin tatxtzʼeqtaana.
Xtzʼaqobʼ ebʼ li naʼlebʼ
^ Malaj «li natenqʼank».
^ Malaj «teʼril chiʼus li rochoch».
^ Malaj «li natenqʼank».
^ Taawil xchʼolobʼankil li aatin, ruuchichʼochʼ.
^ Malaj «li inkʼaʼ naxchap ribʼ rikʼin li chaqʼrabʼ».
^ Malaj «waklesink chʼool».
