Tito 3:1-15
3 Maakanabʼ xjultikankil rehebʼ naq teʼxkʼe ribʼ rubʼel xwankil ut teʼabʼinq chiruhebʼ li awabʼej ut ebʼ li wankebʼ xwankil. Ut t-alaaq saʼ xchʼoolebʼ xbʼaanunkil jalan jalanq li chaabʼil kʼanjel,
2 inkʼaʼ teʼaatinaq chirix xjolom ebʼ li junchʼol, maawaʼaqebʼ aj pleet chi moko kawaqebʼ ta xjolom ut junelik tuulanaqebʼ rikʼin chixjunilebʼ li qas qiitzʼin.
3 Xbʼaan naq junxil laaʼo ajwiʼ maakʼaʼ chaq qanaʼlebʼ ut inkʼaʼ nokooʼabʼink, ebʼ li qas qiitzʼin nokooʼeʼxbʼalaqʼi, wanko chaq rubʼel xwankil jalan jalanq chi naʼlebʼ li naqarahi ru ut naqasikʼ kaʼajwiʼ li naraj li qatibʼel, numtajenaq li maaʼusilal naqabʼaanu chaq, nokookaqalink, qʼaxal yibʼ chaq ru qanaʼlebʼ ut xikʼ naqil qibʼ chiqibʼil qibʼ.
4 Abʼanan, naq li rusilal ut li xrahom li Yos, aj Kolol qe, kikʼutbʼesimank chirixebʼ li qas qiitzʼin
5 aʼan xooxkol (maawaʼ xbʼaan li xchaabʼilal ru qanaʼlebʼ li xqabʼaanu chaq, xooxkol bʼan xbʼaan naq aʼan naʼuxtaanank u)* xbʼaan li chʼajobʼresink, li xooxkʼam chaq saʼ li yuʼam, ut xbʼaan li santil musiqʼej, li xooxʼakʼobʼresi.
6 Aʼan kixkʼe chi yoʼon saʼ qabʼeen li santil musiqʼej* aʼin saʼ xkʼabʼaʼ li Jesukriist, aj Kolol qe
7 ut naq ak xyeemank naq tiik qachʼool saʼ xkʼabʼaʼ xnimal rusilal aʼan, tooruuq xkʼulbʼal li junelik yuʼam joʼ yooko roybʼeninkil.
8 Tzʼaqal yaal ebʼ li aatin aʼin ut nawaj naq inkʼaʼ taakanabʼ xjultikankil li naʼlebʼ aʼin re naq li ak xeʼxpaabʼ li Yos inkʼaʼ teʼxkanabʼ xkʼebʼal xchʼool chi xbʼaanunkil li chaabʼil kʼanjel. Ebʼ li naʼlebʼ aʼin qʼaxal chaabʼil ut naxtenqʼahebʼ li qas qiitzʼin.
9 Abʼan mattzʼaqonk chirix toontil aatin chi moko li kitzʼiibʼamank chirixebʼ li xkʼabʼaʼ ebʼ li xeʼtoon chi moko tatpleetiq chirix li Chaqʼrabʼ xbʼaan naq maakʼaʼ naʼok wiʼ ut maakʼaʼ rajbʼal.
10 Ut chirix li winq li naxkʼe chi naweʼk li bʼalaqʼil kʼutum, inkʼaʼ chik taawaatina wi inkʼaʼ naʼabʼink naq ak xeekʼe xnaʼlebʼ wiibʼ sut
11 xbʼaan naq nakaanaw naq li winq aʼin ak xʼelk saʼ li bʼe ut yook chi maakobʼk ut xjunes naxkʼam chaq li maak saʼ xbʼeen.
12 Naq tintaqla aawikʼin laj Ártemas malaj laj Tíquico, bʼaanu chixjunil li wank saʼ laawuqʼ re naq tatxik chi wilbʼal aran Nicópolis xbʼaan naq ak xinkʼoxla naq aran tinnumsi li habʼalqʼe.
13 Kʼe re laj Zenas, li naxnaw chiʼus chirix li Chaqʼrabʼ, ut re laj Apolos chixjunil li t-ajmanq chiruhebʼ re naq maakʼaʼ tpaltoʼq rehebʼ saʼebʼ li xbʼihaaj.
14 Abʼan ebʼ li qechpaabʼanel tento ajwiʼ teʼxtzol xbʼaanunkil junelik li chaabʼil kʼanjel re naq teʼruuq chi tenqʼank saʼ junpaat naq t-ajmanq ru ut yooqebʼ xbʼaanunkil li chaabʼil kʼanjel.
15 Chixjunilebʼ li wankebʼ wikʼin nekeʼxtaqla xsahil laachʼool. Kʼe xsahilebʼ xchʼool chixjunilebʼ li qechpaabʼanel li nokooʼeʼxra.
Aʼ taxaq li xnimal rusilal li Yos chiwanq eerikʼin.
Xtzʼaqobʼ ebʼ li naʼlebʼ
^ Malaj «natoqʼobʼank u».
^ Li aatin saʼ griego, pnéuma. Taawil xchʼolobʼankil li aatin, musiqʼ.
