Chanru tinruuq xsikʼbʼal ebʼ li chaabʼil amiiw?
TZOLOM 8
Chanru tinruuq xsikʼbʼal ebʼ li chaabʼil amiiw?
«Wi yook injosqʼil, nawaj aatinak rikʼin anihaq. Wi ra inchʼool, naʼajmank chiwu naq wank ani tixkʼe xchʼool chi wabʼinkil ut tixye we naq us t-elq chixjunil. Ut naq sa saʼ inchʼool, nawaj xseeraqʼinkil re anihaq. Choʼq we, jwal aajel ru naq wanqebʼ wamiiw» (li xBrittany).
WANKEBʼ nekeʼyehok re naq ebʼ li kokʼal nekeʼraj rochbʼeen re bʼatzʼunk ut ebʼ li saaj, nekeʼraj ramiiw. Abʼan, bʼar wank li xjalanil?
Li nabʼatzʼunk aawikʼin yal nakatrochbʼeeni.
Jun li amiiw naxyuʼami ajwiʼ li chaabʼil naʼlebʼ joʼ laaʼat.
Li Santil Hu naxye ajwiʼ naq jun tzʼaqal amiiw «junelik narahok; saʼ xqʼehil junaq rahilal tatxtenqʼa joʼ junaq tzʼaqal asbʼej» (Proverbios 17:17, Li Santil Hu, Sociedad Bíblica de Guatemala, SBG). Li amiiw aʼin jalan chiru li nakaawochbʼeeni chi bʼatzʼunk naq toj kachʼinat chaq.
Li xyaalal aʼan naq, saʼ laakʼiijik t-ajmanq chaawu ebʼ li amiiw li...
1) ... teʼxyuʼami li chaabʼil naʼlebʼ.
2) ... teʼxyuʼami li naʼlebʼ li naxkʼe li Santil Hu.
3) ... tateʼxtenqʼa saʼ laayuʼam.
Joʼkan bʼiʼ, kʼoxla ma nekeʼxyuʼami ebʼ laawamiiw li naʼlebʼ aʼin. Qatzʼilaq rix chixjunqalebʼ.
Xbʼeen naʼlebʼ re xsikʼbʼal aawamiiw: Ebʼ li chaabʼil naʼlebʼ
Li taanaw. Moko chixjunil ta li naxye naq wank choʼq aawamiiw tixbʼaanu junaq li naʼlebʼ joʼ naʼajmank. Li Santil Hu naxye naq «wankebʼ amiiw nokooheʼxkʼam saʼ raaxiikʼ» (Proverbios 18:24, SBG). Abʼanan moko xkʼebʼal ta xbʼeen aʼin, abʼan kʼoxla: ma wank junaq «laawamiiw» li xbʼaanu junaq li naʼlebʼ li inkʼaʼ nakaawoybʼeni, xatxhobʼ chirix aajolom malaj xye junaq li tikʼtiʼ chaawix? Peʼyaal naq aʼin naxjukʼ li amiiwil? a Naq nokooʼaatinak chirixebʼ li amiiw, li xyaalal aʼan naq li wank xwankil aʼan li xnaʼlebʼebʼ, maawaʼ li xkʼihalil li qamiiw.
Li naru taabʼaanu. Sikʼebʼ aawamiiw li chaabʼilebʼ xnaʼlebʼ.
«Chixjunilebʼ li kristiʼaan chaabʼil nekeʼaatinak chirix li wamiiw xFiona. Nawulak raj chiwu wank joʼ aʼan ut naq chaabʼil teʼaatinaq chiwix. Jwal oxloqʼ aʼin» (li xYvette, li wank 17 chihabʼ re).
Yal xbʼaanunkil li naʼlebʼ aʼin:
1. Taayaabʼasi Gálatas 5:22, SBG, 23.
2. Kʼoxla: «Ma nekeʼxyuʼami li wamiiw “li naruuchin li Musiqʼej”?».
3. Tzʼiibʼa xkʼabʼaʼebʼ laatzʼaqal awiiw ut, chixkʼatq tzʼiibʼa li xchaabʼil naʼlebʼebʼ.
Xkʼabʼaʼ
․․․․․
Xnaʼlebʼ
․․․․․
Jun li naʼlebʼ: Wi kaʼajwiʼ nachalk saʼ laakʼaʼuxl ebʼ li yibʼru aj naʼlebʼ, maare us raj naq tjalebʼ laawamiiw.
Xkabʼ naʼlebʼ re xsikʼbʼal aawamiiw: Li naʼlebʼ li naxkʼe li Santil Hu
Li taanaw. Wi saʼ junpaat taawaj xtawbʼal aawamiiw, maare moko us ta tat-elq. Joʼkan ajwiʼ, misach saʼ aachʼool li naʼlebʼ aʼin, li naxkʼe li Santil Hu: «Li nawank rikʼinebʼ li jip, taasachq chi junwaakaj» (Proverbios 13:20, SBG). Naq naxye «li jip» moko yook ta chi aatinak chirix junaq li kristiʼaan li moko us ta naʼelk saʼ li tzolebʼaal malaj naq moko seebʼ ta xchʼool, yook bʼan chi aatinak chirixebʼ li yibʼru xnaʼlebʼebʼ ut nekeʼxqʼet ribʼ. Peʼyaal naq inkʼaʼ nakaawaj ebʼ li amiiw joʼebʼ aʼan?
Li naru taabʼaanu. Sikʼebʼ ru chiʼus laawamiiw; ut maakʼulubʼa yalaq ani (Salmo 26:4). Aʼin moko naraj ta xyeebʼal naq taasikʼ jun chʼina chʼuut bʼarwiʼ naru teʼoq wiibʼ oxibʼ ajwiʼ. Naraj bʼan xyeebʼal naq tento taakʼe reetal chiʼus ani «li tiik xchʼool ut li inkʼaʼ us xnaʼlebʼ, li nakʼanjelak chiru li Yos ut li inkʼaʼ napaabʼank chiru» (Malaquías 3:18, SBG).
«Jwal sa inchʼool xbʼaan naq linnaʼ linyuwaʼ xineʼxtenqʼa chi xtawbʼalebʼ inchaabʼil amiiw, li wankebʼ xchihabʼ joʼ laaʼin ut kawebʼ xpaabʼal» (laj Christopher, li wank 13 chihabʼ re).
Sume ebʼ li patzʼom aʼin:
Ma naʼok aakʼaʼuxl chirix naq ebʼ laawamiiw teʼxmin aawu chi xbʼaanunkil junaq li naʼlebʼ li nakaanaw naq moko us ta?
□ Heeheʼ
□ Inkʼaʼ
Ma inkʼaʼ nakaawaj naq laanaʼ laayuwaʼ teʼxnaw ru ebʼ laawamiiw xbʼaan naq nakaakʼoxla naq inkʼaʼ teʼxkʼul ru?
□ Heeheʼ
□ Inkʼaʼ
Jun li naʼlebʼ: Wi xaaye naq joʼkan, aajel ru naq taasikʼebʼ aawamiiw li nekeʼxyuʼami li naʼlebʼ li naxkʼe li Santil Hu, maare saʼ xyanqebʼ aʼin, ebʼ li hermaan li kawebʼ xpaabʼal.
Rox naʼlebʼ re xsikʼbʼal aawamiiw: Li tateʼxtenqʼa saʼ laayuʼam
Li taanaw. Li Raatin li Yos naxye naq «ebʼ li yibʼ aj seeraqʼ nekeʼxpoʼ ru li chaabʼil naʼlebʼ» (1 Corintios 15:33, SBG). Li kixkʼul li xLauren naxkʼutbʼesi naq joʼkan nakʼulmank. «Laaʼin xwaj naq ebʼ li wechtzolom tineʼxkʼulubʼa joʼ ramiiw. Abʼan re aʼin tento tinbʼaanu li nekeʼxye we. Ut saʼ xkʼabʼaʼ naq nawekʼa naq wankin injunes, xinʼok chi naʼlebʼak joʼebʼ aʼan re naq tineʼxkʼulubʼa». Li xLauren kixkʼe reetal naq wi taabʼaanu li nekeʼxye ebʼ laawamiiw, chanchanaqat jun chʼina tzʼiʼ li naxbʼaanu li nayeeheʼk re xbʼaan laj echal re, aʼanebʼ teʼtaqlanq saʼ laayuʼam. Ma aʼan tzʼaqal li nakaawaj laaʼat?
Li naru taabʼaanu. Najtobʼresi aawibʼ rikʼinebʼ li nekeʼraj xjalbʼal laayuʼam ut nekeʼraj naq tatnaʼlebʼaq joʼebʼ aʼan. Wi laaʼat nakaabʼaanu aʼin, maare teʼwanq wiibʼ oxibʼ ajwiʼ aawamiiw, abʼan wi nakaasikʼebʼ li aawamiiw li naru tateʼxtenqʼa, chaabʼilaq laanaʼlebʼ (Romanos 12:2).
«Jun rehebʼ li wamiiw naxkʼabʼaʼi Clint. Aʼan weent naxbʼaanu rikʼin li xyeehom xbʼaanuhom ut natawok u, aʼin naxwaklesi inchʼool» (laj Jason, li wank 21 chihabʼ re).
Sume ebʼ li patzʼom aʼin:
Ma nakaajal chanru nakaatiqibʼ aawibʼ, nakat-aatinak malaj nakatnaʼlebʼak re xsahobʼresinkil xchʼoolebʼ laawamiiw?
□ Heeheʼ
□ Inkʼaʼ
Ma nakatxik chirixebʼ laawamiiw saʼ junaq li naʼajej bʼarwiʼ naru nakachʼik aawibʼ saʼ chʼaʼajkilal yal saʼ xkʼabʼaʼ naq aʼanebʼ nekeʼxik?
□ Heeheʼ
□ Inkʼaʼ
Jun li naʼlebʼ: Wi xaasume naq joʼkan saʼebʼ li patzʼom li xqil, patzʼ rehebʼ laanaʼ laayuwaʼ malaj junaq li ak cheek chik, li kaw xpaabʼal naq tatxtenqʼa chi xsikʼbʼalebʼ laawamiiw li tateʼxtenqʼa saʼ laayuʼam. Wi laaʼat aj testiiw re li Jehobʼa naru ajwiʼ taapatzʼ aatenqʼ rehebʼ li cheekel winq re laachʼuut.
TAATAW XKOMON LI NAʼLEBʼ SAʼ LI TZOLOM 9 RE LI TASAL 2
Ma xeʼxyal aawix jun sutaq malaj xʼalaak saʼ laachʼool xbʼaanunkil junaq li naʼlebʼ li nakaanaw naq moko us ta?
[Kʼe reetal]
a Chiqajunilo nokoomaakobʼk (Romanos 3:23). Joʼkan naq, wi wank jun laawamiiw li xbʼaanu junaq li naʼlebʼ li inkʼaʼ xwulak chaawu, abʼan kixpatzʼ xkuybʼal xmaak, jultika naq «li rahok kʼajoʼ xkʼihal li maak naxtzʼap ru» (1 Pedro 4:8, SBG).
LI RAQAL LI WANK XWANKIL
«Wankebʼ li qʼaxal nokooʼeʼxra ut jwal paabʼajelebʼ chiru junaq asbʼej» (Proverbios 18:24, SBG)
LI TATRUUQ XB‘AANUNKIL
Kʼe aachʼool chi xyuʼaminkil li chaabʼil naʼlebʼ. Chi joʼkan ebʼ li nekeʼxyal ajwiʼ xqʼe xbʼaanunkil aʼin teʼjiloq chaakʼatq. Ut aʼanebʼ aʼin li chaabʼil amiiw!
MA NAKAANAW?
Usta li Yos moko nasikʼok ta u, abʼan naq naxkʼulubʼa junaq li kristiʼaan choʼq ramiiw toj naxsikʼ ru (Salmo 15:1-5).
BʼAANU LI NAKAAYE
Kʼaru tinbʼaanu re naq tintaw inchaabʼil amiiw? ․․․․․
Aʼanebʼ aʼin wiibʼ oxibʼ li ak cheekebʼ chik li nawaj xnawbʼalebʼ ru chiʼus: ․․․․․
Kʼaru nawaj xpatzʼbʼal re linnaʼ linyuwaʼ chirix li naʼlebʼ aʼin? ․․․․․
UT LAAʼAT, KʼARU NAKAAKʼOXLA?
● Kʼaru li chaabʼil naʼlebʼ nawulak chaawu chirix laawamiiw? Chʼolobʼ kʼaʼut.
● Kʼaru li naʼlebʼ tento tchaabʼilobʼresi re naq tatwanq joʼ chaabʼil aamiiw?
[Naxye]
«Linnaʼ linyuwaʼ xeʼxye we naq tinkanabʼ rochbʼeeninkil wiibʼ oxibʼ li wamiiw. Saʼ xtiklajik inkʼaʼ xwaj xbʼaanunkil xbʼaan naq xinkʼoxla naq kaʼajwiʼ rikʼinebʼ aʼan sa nawekʼa wibʼ. Abʼan chaabʼil li naʼlebʼ xeʼxkʼe we ut naq xinkʼe reetal xwil naq wankebʼ naabʼal li kristiʼaan li chaabʼilebʼ xnaʼlebʼ li naru teʼwanq choʼq wamiiw» (laj Carlos).
[Kaaxukuut]
Jalan chik li tatruuq xbʼaanunkil
Aatinan rikʼinebʼ laanaʼ laayuwaʼ chirix li naʼlebʼ. Patzʼ rehebʼ chanru xnaʼlebʼebʼ li ramiiw naq toj saajebʼ chaq joʼ laaʼat. Ma xeʼxsikʼ junsutaq li moko chaabʼil amiiw ta? Kʼaʼut? Patzʼ ajwiʼ rehebʼ kʼaru naru taabʼaanu re naq inkʼaʼ taakʼul li chʼaʼajkilal aʼin.
Bʼaanu naq ebʼ laanaʼ laayuwaʼ teʼxnaw ru ebʼ laawamiiw. Wi inkʼaʼ nakaabʼaanu, kʼoxla kʼaʼut. Ma nakaakʼoxla naq wank kʼaru inkʼaʼ twulaq chiru laanaʼ laayuwaʼ? Wi joʼkan, maare us raj naq toj taasikʼ chiʼus laawamiiw.
Kʼe aachʼool chi rabʼinkilebʼ laawamiiw. Kʼutbʼesi naq oxloqʼ li naxye ut naq nakaakʼe aachʼool chirix (Filipenses 2:4).
Chattawoq u ut chatkuyuq maak. Maawoybʼeni naq ebʼ laawamiiw inkʼaʼ teʼpaltoʼq. Joʼ naxye Santiago 3:2, SBG: «Chiqajunilo naabʼal sut nokootʼaneʼk».
Kʼehebʼ xhoonal laawamiiw. Maakʼoxla naq ebʼ laawamiiw kaʼajebʼ wiʼ aawe. Wi yaal naq tzʼaqal aamiiwebʼ, tateʼxtenqʼa naq t-ajmanq chaawu (Eclesiastés 4:9, 10).
[Jalam u]
Wi taabʼaanu li nekeʼxye ebʼ laawamiiw, chanchanaqat jun chʼina tzʼiʼ li naxbʼaanu li nayeeheʼk re xbʼaan laj echal re
Maare twulaq ajwiʼ chaawu
EBʼ LI SAAJ
Li nekeʼxpatzʼ ebʼ li saaj
Ebʼ li saaj nekeʼxbʼaanu ebʼ li patzʼom li nawno chiʼus chirix li wank saʼ wiibʼal, ebʼ li amiiw, ebʼ li naʼbʼej yuwaʼbʼej, li tzolebʼaal ut naabʼal chik.
