TZOLOM 25

Ma tinruuq tawiʼ xkanabʼankil xtiqwasinkil lintzʼejwal?

«Naq wank chaq waqxaqibʼ chihabʼ we xintikibʼ xtiqwasinkil lintzʼejwal. Naq xinnaw naq aʼin moko nawulak ta chiru li Yos, naq ninbʼaanu wiʼ chik, moko sa ta nawekʼa wibʼ. Junelik ninye: “Li Yos maajunwa tinxra”» (laj Luis).

NAQ NAʼOK sa’ li xsaajilal, jun li winq qʼaxal narataw wank rikʼin junaq li ixq ut jun li ixq qʼaxal narataw wank rikʼin junaq li winq ut aʼin naxbʼaanu naq naabʼalebʼ li saaj teʼxtiqwasi li xtzʼejwal. a Maare wank junaq li kristiʼaan tixye aawe naq moko nimla maak ta aʼin, xbʼaan naq maaʼani nakaakʼe saʼ chʼaʼajkilal. Abʼan, wank xyaalal kʼaʼut moko us ta xbʼaanunkil aʼin. Kʼe reetal li kixye li apóstol Pablo: «Cheekamsi li xchaʼal leetibʼel [...] li naʼokenk saʼ [...] li xrahinkil ru li muxuk ibʼ» (Colosenses 3:⁠5, La Biblia. Traducción del Nuevo Mundo, TNM, 2019 saʼ español). Li xyaalalil aʼan naq xtiqwasinkil li xtzʼejwal inkʼaʼ naxbʼaanu naq junaq li winq tixkanabʼ xkʼoxlankil wank rikʼin junaq li ixq ut junaq li ixq rikʼin junaq li winq, qʼaxal naxbʼaanu bʼan naq traj wank rikʼin. Abʼan moko kaʼaj tawiʼ aʼin naxbʼaanu:

● Li kristiʼaan li naxtiqwasi xtzʼejwal kaʼajwiʼ naxkʼoxla ribʼ xjunes. Jun eetalil, li kristiʼaan li naxtiqwasi xtzʼejwal kaʼajwiʼ yook xsikʼbʼal naq sa trekʼa ribʼ.

● Li kristiʼaan li naxtiqwasi xtzʼejwal inkʼaʼ naroxloqʼi li xsumʼaatin ut naxsikʼ kaʼajwiʼ re naq teʼwanq saʼ wiibʼal.

● Li kristiʼaan li naxtiqwasi xtzʼejwal kaʼajwiʼ naxkʼoxla ribʼ xjunes aʼin naxbʼaanu naq inkʼaʼ chik tixyal xsahil wank saʼ wiibʼal rikʼin li xsumʼaatin.

Joʼkan naq maatiqwasi laatzʼejwal, kʼe bʼan aaqʼe re xkuybʼal aawibʼ (1 Tesalonicenses 4:​4, 5). Joʼkan bʼiʼ, kʼaru tatruuq xbʼaanunkil re xkuybʼal aawibʼ? Li Santil Hu naxye: maasikʼ malaj maawil ebʼ li kʼaʼaq re ru li truuq xbʼaanunkil naq qʼaxal taawaj wank rikʼin junaq li winq malaj junaq li ixq (Proverbios 5:8, 9). Abʼan, kʼaru nakʼulmank wi ak kʼaynaqat chi xtiqwasinkil laatzʼejwal? Maare ak xaayal xkanabʼankil ut inkʼaʼ xatruuk. Naru taakʼoxla naq maajunwa tatruuq xkanabʼankil li naʼlebʼ aʼin ut naq maajunwa tatruuq wank joʼ nawulak chiru li Yos. Aʼan naxkʼoxla chaq jun li saaj li naxkʼabʼaʼi Pedro. Aʼan naxye: «Moko sa ta nawekʼa wibʼ naq ninbʼaanu wiʼ chik. Ninkʼoxla naq li Yos maajunwa truuq xkuybʼal inmaak. Chi moko tijok ta chik ninruuk».

Wi joʼkan ajwiʼ nakaawekʼa aawibʼ, michʼinaak aachʼool. Tatruuq xjalbʼal laanaʼlebʼ. Wankebʼ kristiʼaan saaj ut cheek keʼruuk xkanabʼankil li yibʼru aj naʼlebʼ aʼin. Wi aʼan keʼruuk xkanabʼankil, laaʼat ajwiʼ tatruuq.

Kʼaru tatruuq xbʼaanunkil xbʼaan naq ra aachʼool naq xatpaltoʼk?

Joʼ ak xqil, ak re naq li nekeʼxtiqwasi li xtzʼejwal moko sa ta nekeʼrekʼa ribʼ malaj joʼ naxye 2 Corintios 7:​11, Li Santil Hu, Sociedad Bíblica de Guatemala, SBG nekeʼrahoʼk xchʼool «jo’ naraj li Yos». Rekʼankil aʼin moko maak ta, xbʼaan naq truuq xbʼaanunkil naq taayal aaqʼe chi xkanabʼankil xtiqwasinkil laatzʼejwal. Abʼan wi qʼaxal wiʼ chik nanumtaak li nakaawekʼa moko us ta, xbʼaan naq truuq xchʼinankil laachʼool re naq taakanabʼ xyalbʼal aaqʼe (Proverbios 24:10).

Joʼkan bʼiʼ, ma qʼaxal nimla maak xtiqwasinkil laatzʼejwal? Li naʼlebʼ aʼin qʼaxal tzʼaj ru. Naru nokooxbʼakʼ «chi kʼanjelak chiru yalaq kʼaʼ chi maaʼusilal nawulak chiru li tzʼejwalej» ut naxbʼaanu naq moko us ta toonaʼlebʼaq (Tito 3:⁠3, SBG). Li xtiqwasinkil laatzʼejwal moko us ta abʼan moko joʼ ta li koʼbʼeetak yumbʼeetak (Judas 7). Joʼkan naq wi nakaatiqwasi laatzʼejwal maakʼoxla naq li Jehobʼa moko truuq ta xkuybʼal aamaak. Li qʼaxal wank xwankil aʼan naq taakuy aawibʼ ut naq inkʼaʼ taakanabʼ xyalbʼal aaqʼe.

Wi xaabʼaanu wiʼ chik, michʼinaak aachʼool. Wi xatpaltoʼk, aʼin moko naraj ta xyeebʼal naq yibʼru aanaʼlebʼ. Naʼlebʼa rix kʼaʼut naq xattʼaneʼk saʼ li naʼlebʼ aʼin ut kʼaru tatruuq xbʼaanunkil re naq inkʼaʼ taabʼaanu wiʼ chik.

Naʼlebʼa rix li xrahom ut li ruxtaan li Yos. Laj David kixnaw kʼaru naqekʼa naq nokoopaltoʼk ut kʼe reetal li kixtzʼiibʼa: «Joʼ junaq yuwaʼbʼej naxrahebʼ li ralal xkʼajol, joʼkan ajwiʼ li Qaawaʼ naxtoqʼobʼa ruhebʼ li nekeʼpaabʼank re. Xbʼaan naq naxnaw kʼaru okenaqo wiʼ ut wank saʼ xchʼool naq yal pojtzʼ okenaqo» (Salmo 103:​13, 14, SBG). Li Yos naxnaw naq laaʼo aj maak ut joʼkan naq yoʼon wank «chi kuyuk maak» (Salmo 86:⁠5, TNM). Abʼan, naroybʼeni naq tqakʼe qaqʼe re xjalbʼal qanaʼlebʼ. Qilaq wiibʼ oxibʼ li naʼlebʼ li tatxtenqʼa re xkanabʼankil li yibʼru aj naʼlebʼ aʼin.

Kʼe reetal rikʼin kʼaru nakaawajsi aawu. Ma nakaawil ebʼ li pelikula, li naʼlebʼ saʼ tele malaj saʼ internet li naxbʼaanu naq qʼaxal taawataw li naxrahi li tzʼejwalej? Kʼe reetal li kixtzʼaama re li Yos jun rehebʼ li kitzʼiibʼank re li Salmo: «Chakʼe taxaq naq inkʼaʼ tinkʼe reetal li maakʼaʼ naʼok wiʼ» (Salmo 119:37, SBG). b

Kʼe aachʼool chi xkʼoxlankil jalan chik li naʼlebʼ. Naru taabʼaanu li kixbʼaanu laj William: «Naq toj maajiʼ nakatxik chi wark, yaabʼasi junaq li naʼlebʼ li chalenaq saʼ li Santil Hu. Qʼaxal us naq li kʼaru yookat xkʼoxlankil naq toj maajiʼ nakatxik chi wark tixchap ribʼ rikʼin li Yos ut li Santil Hu» (Filipenses 4:⁠8).

Seeraqʼi re junaq li kristiʼaan li yookat xnumsinkil. Maare tatxutaanaq chi aatinak rikʼin junaq li kristiʼaan chirix li chʼaʼajkilal aʼin. Abʼanan, aʼin tatxtenqʼa re xkanabʼankil xtiqwasinkil laatzʼejwal. Aʼan kixbʼaanu laj David: «Xinye re linyuwaʼ. Maajunwa tsachq saʼ inchʼool li raatin. Saʼ xkʼabʼaʼ naq chʼolchʼo chiru naq chʼaʼaj chiwu xseeraqʼinkil aʼin, kixye we: “Nakaasahobʼresi inchʼool”. Li raatin kʼajoʼ naq kixkʼojobʼ inchʼool. Joʼkan naq xinye naq tento tinjal linnaʼlebʼ.

»Usta xbʼeenwa kixyaabʼasi we wiibʼ oxibʼ li raqal re xkʼojobʼankil inchʼool, kixyaabʼasi ajwiʼ we wiibʼ oxibʼ chik li raqal li naxkʼut naq laaʼin ninnaw naq moko us ta aʼin. Moqon kixye we naq tinbʼaanu chixjunil li wank saʼ wuqʼ re naq inkʼaʼ tintiqwasi lintzʼejwal, toj reetal naq tooʼaatinaq wiʼ chik. Kixye we naq wi tintʼaneʼq wiʼ chik chi xbʼaanunkil aʼin, michʼinaak inchʼool ut naq saʼ jun sut chik tinyal inqʼe re naq qʼaxal najt tinkuy wibʼ». Chanru kitenqʼaak xbʼaan aʼin? Aʼan naxye: «Xnawbʼal naq wank ani naxkʼe xchʼool chiwix ut naraj intenqʼankil qʼaxal xinxtenqʼa». c

SAʼ LI JUN CHIK TZOLOM

Ma maakʼaʼ reekʼ wi yal bʼatzʼunk aawe naq nakatwank saʼ wiibʼal?

[Kʼe reetal]

LI RAQAL LI WANK XWANKIL

«Tzʼeqtaana chixjunil li naxik wiʼ xchʼoolebʼ li saaj al ut kʼe aachʼool chirix li tiikilal, li paabʼaal, li rahok, li tuqtuukilal, saʼ junajil rikʼinebʼ li nekeʼyaabʼank re xkʼabʼaʼ li Qaawaʼ chi saqebʼ ru li xchʼool» (2 Timoteo 2:⁠22, SBG).

LI TATRUUQ XBʼAANUNKIL

Tijon chiru li Jehobʼa Yos naq toj maajiʼ nakaarahi ru xtiqwasinkil laatzʼejwal. Tzʼaama re naq tixkʼe aawe «li xnimal ru wankilal» re naq tatruuq xkuybʼal aawibʼ (2 Corintios 4:⁠7, SBG).

MA NAKAANAW?

Li kristiʼaan li moko kaw ta saʼ xpaabʼal naxbʼaanu li kʼaru narataw li xtzʼejwal abʼan li kristiʼaan li kaw saʼ xpaabʼal naxkuy ribʼ usta wank xjunes.

BʼAANU LI NAKAAYE

Kʼaru tinruuq xbʼaanunkil re naq junelik tinkʼoxla li chaabʼil naʼlebʼ?

Kʼaru tinruuq xbʼaanunkil re naq inkʼaʼ tintʼaneʼq wiʼ chik chi xbʼaanunkil li yibʼru aj naʼlebʼ?

Kʼaru naru tinpatzʼ re linnaʼ linyuwaʼ chirix li naʼlebʼ aʼin?

UT LAAʼAT, KʼARU NAKAAKʼOXLA?

● Kʼaʼut us naq taajultika naq li Jehobʼa yoʼon wank «chi kuyuk maak»? (Salmo 86:⁠5, TNM).

● Li Yos kooxyobʼtesi re naq tqarahi ru wank saʼ wiibʼal, jun li winq rikʼin jun li ixq ut jun li ixq rikʼin jun li winq, abʼan naxye naq tento tqakuy qibʼ. Joʼkan bʼiʼ, kʼaru chʼolchʼo chiru li Yos naq tooruuq xbʼaanunkil?

[Naxye]

«Chalen naq xinkanabʼ xtiqwasinkil lintzʼejwal, saq chik ru linchʼool ut inkʼaʼ chik nawaj xtzʼajninkil ru» (li xSara).

[Jalam u]

Wi nakattʼaneʼk saʼ junaq li aanilak, nakatwakliik ut nakat-ok wiʼ chik chi aanilak. Joʼkan ajwiʼ, wi nakattʼaneʼk wiʼ chik chi xtiqwasinkil laatzʼejwal aʼin moko naraj ta xyeebʼal naq maajunwa taaqʼax ru