Chanru tinruuq wanq choʼq ramiiw li Yos?
TZOLOM 35
Chanru tinruuq wanq choʼq ramiiw li Yos?
Laj Gabriel kixkʼe reetal naq jwal wank xwankil wank choʼq ramiiw li Yos naq kixkʼul jun li chʼaʼajkilal. Aʼan naxye: «Naq wank 12 chihabʼ we linyuwaʼ xooxkanabʼ. Saʼ jun qʼoqyink xintijok chiru li Jehobʼa re xtzʼaamankil naq tsutqʼiiq chaq linyuwaʼ».
Xbʼaan naq ra saʼ xchʼool laj Gabriel kiʼok rilbʼal xsaʼ li Santil Hu. Kixtaw jun li raqal bʼarwiʼ laj tzʼiibʼ kixye re li Jehobʼa: «Li qʼaxal xtoqʼobʼaal ru naxqʼaxtesi ribʼ rubʼel laawoq rubʼel laawuqʼ, laaʼat nakattenqʼank re li nebʼaʼyox» (Salmo 10:14, Li Santil Hu, Sociedad Bíblica de Guatemala, SBG). Aʼan kixye naq li kiril kixtochʼ xchʼool: «Naq xinyaabʼasi xinkʼe reetal naq li Jehobʼa naraj intenqʼankil ut naxjultika we naq aʼan inyuwaʼ. Ut maajun chik yuwaʼbʼej joʼ aʼan».
MA yookat xnumsinkil junaq li chʼaʼajkilal joʼ kixkʼul laj Gabriel? Maare. Abʼan li chʼolchʼooq chaawu: Aʼan naq li Jehobʼa traj naq tatwanq choʼq ramiiw. Li Santil Hu naxye: «Jilonqex chi xkʼatq li Yos, ut aʼan taajiloq chekʼatq» (Santiago 4:8, SBG). Ma xaakʼe reetal? Maakʼaʼ naxye ma naqil ru malaj inkʼaʼ. Li Jehobʼa naraj naq tatwanq choʼq ramiiw.
Re naq toowanq choʼq ramiiw li Yos, wank kʼaru tento tqabʼaanu. Jun eetalil, ma wank junaq laaʼuutzʼuʼuj? Kʼaru tento taabʼaanu wi taawaj naq tkʼiiq ut naq chaabʼilaq? Tento taakʼe saʼ junaq li naʼaj bʼarwiʼ t-atzʼumaq ut rajlal taakʼe xhaʼil. Joʼkan ajwiʼ nakʼulmank wi nakaawaj wank choʼq ramiiw li Yos. Kʼaru tento taabʼaanu?
Aajel ru tzolok
Re naq wiibʼ li kristiʼaan teʼwanq saʼ aamiiwil tento teʼaatinaq ut teʼrabʼi ribʼ chiribʼilebʼ ribʼ. Joʼkan ajwiʼ nakʼulmank rikʼin li qamiiwil rikʼin li Yos. Abʼan chanru tooruuq rabʼinkil li naxye li Jehobʼa? Rikʼin rilbʼal ut xtzolbʼal xsaʼ li Santil Hu (Salmo 1:2, 3).
Abʼan, maare inkʼaʼ nawulak chaawu tzolok. Li nawulak bʼan chaawu aʼan rilbʼal li tele, bʼatzʼunk saʼ junaq li kʼanjelobʼaal malaj wank rikʼinebʼ laawamiiw. Abʼan re naq tatwanq choʼq ramiiw li Yos tento taayal aaqʼe re xyuʼaminkil li naxye aawe saʼ li Santil Hu.
Maakʼoxla naq tattitzʼq xtzolbʼal xsaʼ li Santil Hu. Usta moko nawulak ta chaawu tzolok naru taataw rusilal. Abʼan tento taasikʼ aahoonal re rilbʼal xsaʼ li Santil Hu. Naru taabʼaanu joʼ li xLais: «Ak xaqabʼanbil chanru tinbʼaanu. Ninyaabʼasi jun tasal re li Santil Hu rajlal eqʼla». Li xMaría li wank 15 chihabʼ re naxbʼaanu aʼin: «Naq ak ok we chi wark ninyaabʼasi jun xtasal li Santil Hu».
Re xtikibʼankil xtzolbʼal xsaʼ li Santil Hu, il li naʼlebʼ li natawmank saʼ li perel 292. Moqon tzʼiibʼa saʼ kʼaru hoonal re li kutan taakʼe 30 kʼasal malaj minutes re xtzolbʼal xsaʼ li Santil Hu.
․․․․․
Re xtikibʼankil, xaaqabʼ jun li hoonal. Maare tchʼaʼajkoʼq chaawu rilbʼal xsaʼ li Santil Hu. Laj Jezreel li wank 11 chihabʼ re naxye: «Wank xtasal li Santil Hu li nachʼaʼajkoʼk chiwu xtawbʼal ru ut inkʼaʼ nawulak chiwu». Abʼan maakanabʼ xbʼaanunkil. Abʼan rikʼin rilbʼal xsaʼ li Santil Hu tatruuq rabʼinkil li naxye aawe li Jehobʼa. Joʼkan bʼiʼ, wi nakaayal aaqʼe taakʼe reetal naq twulaq chaawu ut naabʼal rusilal taataw.
Maakanabʼ tijok
Naru tooʼaatinaq rikʼin li Jehobʼa naq nokootijok chiru. Aʼin jun chaabʼil maatan li naxkʼe qe. Saʼ yalaq kʼaru hoonal tooruuq aatinak rikʼin li Jehobʼa. Aʼan junelik naxkʼe xchʼool chi qabʼinkil. Joʼkan naq li Santil Hu naxye aʼin: «Junelik bʼan cheqʼaxtesi saʼ roq ruqʼ li Yos leepatzʼom rikʼin tijok ut tzʼaamank, joʼwiʼ rikʼin yoxink» (Filipenses 4:6, SBG).
Joʼ naxye li raqal naru naqaye re li Jehobʼa chixjunil li qachʼaʼajkilal ut li qakʼaʼuxl. Aajel ajwiʼ ru naq toobʼanyoxinq chiru. Joʼ chanru naqabʼanyoxi rehebʼ li qamiiw li usilal li nekeʼxbʼaanu qe. Joʼkan ajwiʼ tqabʼaanu rikʼin li Jehobʼa li naxbʼaanu naabʼal li usilal choʼq qe (Salmo 106:1).
Tzʼiibʼa junjunq li naʼlebʼ li taawaj xbʼanyoxinkil re li Jehobʼa.
․․․․․
Kʼaru tatruuq xbʼaanunkil wi nakaawekʼa naq xnumtaak laaxiw ut laakʼaʼuxl? Li Santil Hu naxye: «Chaqʼaxtesi saʼ ruqʼ li Qaawaʼ li kʼaʼux wiʼ laachʼool, ut aʼan taakuutunq aawe; maajoqʼe tixkanabʼ li tiik xchʼool chi osoʼk chi junajwa» (Salmo 55:23, SBG).
Tzʼiibʼa wiibʼ oxibʼaq xkʼaʼuxl wiʼ aachʼool li taawaj xyeebʼal saʼ laatij.
․․․․․
Tzol aanaʼlebʼ rikʼin li ak xaakʼul
Wank jun chik li naʼlebʼ li tento wank saʼ laachʼool. Laj David kixye: «Yalomaq ut kʼehomaq reetal: makachʼin xchaabʼilal li Qaawaʼ» (Salmo 34:9, SBG). Naq kixtzʼiibʼa aʼin tojaʼ kixqʼax ru jun li nimla chʼaʼajkilal. Kachʼin chik ma kikamsiik xbʼaan li awabʼej Saúl. Xbʼaan aʼin xkoho xmuqbʼal ribʼ rikʼinebʼ laj filisteo li xikʼ nekeʼilok re ut saʼ junpaat keʼxnaw ru. Chʼolchʼo chiru laj David naq teʼxkamsi joʼkan naq kixbʼaanu naq look ru, chi joʼkan kiruuk elelik (1 Samuel 21:10-15).
Laj David moko kixkʼoxla ta naq kiruuk chi elelik xbʼaan xseebʼal xchʼool. Kixye bʼan naq kiʼelk chiʼubʼej xbʼaan li Jehobʼa. Joʼkan naq kixye: «Xinpatzʼok re li Qaawaʼ, ut aʼan xinxsume chaq: xinrisi saʼ chixjunil li xiw xiw wankin wiʼ» (Salmo 34:5, SBG). Joʼkan naq laj David kiruuk xyeebʼal aʼin: «Yalomaq ut kʼehomaq reetal: makachʼin xchaabʼilal li Qaawaʼ».
Kʼoxla junaq li naʼlebʼ bʼarwiʼ xaakʼe reetal naq li Jehobʼa xatxtenqʼa ut tzʼiibʼa li xkʼulmank. Moko aajel ta ru naq nimaq ru li xaakʼul maare xatxtenqʼa saʼ junaq li chʼina naʼlebʼ li moko wank ta xwankil chaawu.
․․․․․
Li junjunq tento tixchaabʼilobʼresi li ramiiwil rikʼin li Jehobʼa ut maakʼaʼ naxye wi xookʼiik saʼ jun li junkabʼal li nekeʼxloqʼoni ru li Jehobʼa. Ma yookat xchaabʼilobʼresinkil laaʼamiiwil? Malaj toj maajiʼ? Li tzolom aʼin tatxtenqʼa re rilbʼal chanru tatruuq xtikibʼankil. Li Jehobʼa tatrosobʼtesi xbʼaan naq li Santil Hu naxye: «Chextzʼaamanq ut kʼeekʼooq eere; chexsikʼoq ut teetaw» (Mateo 7:7, SBG).
TAATAW XKOMON LI NAʼLEBʼ SAʼ LI TZOLOM 38 UT 39 RE LI TASAL 1
Ma nachʼaʼajkoʼk chaawu aatinak chirix li Yos rikʼinebʼ li junchʼol? Kʼaru tatruuq xbʼaanunkil re xkolbʼal rix laapaabʼal?
LI RAQAL LI WANK XWANKIL
«Sahebʼ saʼ xchʼool li nekeʼxkʼe reetal naq naʼajmank li Yos saʼebʼ li xyuʼam» (Mateo 5:3, La Biblia. Traducción del Nuevo Mundo, 2019 saʼ español).
LI TATRUUQ XBʼAANUNKIL
Wi rajlal kutan taawil kaahibʼ perel xsaʼ li Santil Hu taachoy rilbʼal xsaʼ chiru jun chihabʼ.
MA NAKAANAW?
Laaʼat li yookat rilbʼal xsaʼ li hu aʼin ut nakaapaabʼ li naʼlebʼ li naxkʼe li Santil Hu xbʼaan naq li Jehobʼa naraj naq tatwanq choʼq ramiiw (Juan 6:44).
BʼAANU LI NAKAAYE
Aʼin tinbʼaanu re xtawbʼal rusilal xtzolbʼal li Santil Hu: ․․․․․
Aʼin tinbʼaanu re naq tinkʼaytesi wibʼ chi tijok: ․․․․․
Kʼaru nawaj xpatzʼbʼal re linnaʼ linyuwaʼ chirix li naʼlebʼ aʼin? ․․․․․
UT LAAʼAT, KʼARU NAKAAKʼOXLA?
● Kʼaru taabʼaanu re xtawbʼal rusilal xtzolbʼal xsaʼ li Santil Hu?
● Kʼaʼut naq li Jehobʼa naxkʼe xchʼool chirix li xtij ebʼ laj maak?
● Chanru tchaabʼilobʼresi laatij?
[Naxye]
«Naq toj kachʼinin chaq jun ajwiʼ li tij ninye. Anaqwan ninye re li Jehobʼa li xinkʼul chiru li kutan. Saʼ xkʼabʼaʼ naq moko juntaqʼeet ta li junjunq chi kutan moko jun ta chik li tij ninye re li Jehobʼa». (Eva).
[Kaaxukuut ut li jalam u]
Tzʼil xsaʼ Laasantil Hu
1. Sikʼ junaq li naʼlebʼ li nawulak chaawu. Re xtawbʼal ru chiʼus patzʼ aatenqʼ re li Jehobʼa.
2. Kʼe aahoonal re rilbʼal xsaʼ. Aʼin naraj xyeebʼal naq moko taawil ta saʼ lookil. Kʼoxla naq wankat aran: Yal rilbʼal li yook chi kʼulmank, rabʼinkil ebʼ li xyaabʼ kuxej, rutzʼbʼal ebʼ li bʼook, xyalbʼal xsahil li tzekemq... Re naq chi joʼkan taawekʼa naq yookat xyuʼaminkil li yookat xyaabʼasinkil.
3. Kʼoxla rix li tojeʼ xaayaabʼasi. Naq tatraqeʼq rilbʼal xsaʼ, kʼoxla ebʼ li patzʼom aʼin:
● Kʼaʼut kixkʼe li Jehobʼa aʼin saʼ li Raatin?
● Rikʼin anihebʼ naru tinkʼam we ut rikʼin anihebʼ inkʼaʼ?
● Kʼaru li naʼlebʼ li nintzol naru tinyuʼami rajlal kutan?
● Kʼaru naxkʼut chiwu aʼin chirix li Jehobʼa ut chirix chanru nanaʼlebʼak?
4. Tijon chiru li Jehobʼa. Ye re li Jehobʼa li xaatzol ut chanru nakaakʼoxla xyuʼaminkil. Misach saʼ laachʼool xbʼanyoxinkil re, naq kixkʼe aawe li Santil Hu.
[Jalam u]
«Lochlookil xam laawaatin choʼq we laaʼin: aʼan nakutanobʼresink re linbʼe» (Salmo 119:105, Li Santil Hu, Sociedad Bíblica de Guatemala, SBG).
[Kaaxukuut ut li jalam u]
Chʼolchʼooq chaawu li wank xwankil
Ma junelik nakaaye naq laatzʼ aawu ut maakʼaʼ aahoonal re tijok ut rilbʼal xsaʼ li Santil Hu? Li ttenqʼanq aawe aʼan xtusbʼal ru li tento taabʼaanu xbʼeenwa.
Yal xbʼaanunkil aʼin: Sikʼ junaq li kubʼeet ut bʼutʼ chi pek. Chirix chik aʼan nujtesi chi samahibʼ. Anaqwan nujenaq chik laakubʼeet chi pek ut samahibʼ.
Anaqwan isi li pek ut li samahibʼ, chirix chik aʼan kʼe xbʼeenwa li samahibʼ ut moqon li pek saʼ li kubʼeet. Peʼyaal naq inkʼaʼ chik kiʼok chixjunil li pek? Xkʼulmank aʼin xbʼaan naq xbʼeenwa xkʼemank li samahibʼ.
Li xaatzol? Wi xbʼeenwa nakaakʼe saʼ laayuʼam rajsinkil aawu inkʼaʼ chik twanq aahoonal re xloqʼoninkil ru li Jehobʼa. Joʼkan naq wank xyaalal li naxye qe li Santil Hu: Qasikʼaq «li qʼaxal chaabʼil» (Filipenses 1:10, SBG). Wi nakaayuʼami li naʼlebʼ aʼin wanq aahoonal re kʼanjelak chiru li Jehobʼa joʼ ajwiʼ re rajsinkil aawu. Misach saʼ laachʼool, li ttenqʼanq aawe aʼan xkʼebʼal xbʼeenwa li wank xwankil.
[Jalam u]
Li qamiiwil rikʼin li Yos chanchan jun li uutzʼuʼuj li tento tqil re naq taakʼiiq