PATZʼOM 6
Kʼaru kixye chaq li Santil Hu chirix li Sikʼbʼil Ru?
KIYEEMANK
«Laaʼat, Belén Efratá, [...] aawikʼin taaʼelq chaq li taaʼawabʼejinq re Israel.»
(Miqueas 5:2)
KITZʼAQLOK
«Li Jesus kiyoʼlaak aran Belén saʼ xteepal Judea, naq laj Herodes wan chaq chi awabʼejil. [...] Wankebʼ aj qʼe keʼchalk chaq saʼ relebʼl saqʼe, koleʼokaq Jerusalén.»
KIYEEMANK
«Nekeʼxjekʼi li waqʼ chiribʼilebʼ ribʼ ut nekeʼxbʼuuli rix linjut-aqʼ.»
(Salmo 22:19 [22:18, Wy])
KITZʼAQLOK
«Naq ak xeʼxkʼe chiru krus li Jesus, ebʼ laj puubʼ keʼxchap li xtʼikr ut kaahibʼ jachal keʼrisi [...]. Keʼxchap ajwiʼ li xjut-aqʼ [...] maakʼaʼ xbʼojbʼal, junaj ru naq kembʼil chalen taqʼa toj taqeʼq. Joʼkan naq keʼxye chiribʼilebʼ ribʼ: —Miqajachi, qabʼuuliiq bʼan rix re rilbʼal ani taakanaaq wiʼ.»
KIYEEMANK
«[Li Yos] nakolok rehebʼ chixjunil li xbʼaqelebʼ re naq maajun junaq rehebʼ taatoqeʼq.»
(Salmo 34:21 [34:20, Wy])
KITZʼAQLOK
«Naq keʼwulak wan wiʼ li Jesus, keʼril naq kamenaq chik; joʼkan naq inkʼaʼ keʼxtoq xbʼaqel li raʼ.»
KIYEEMANK
«Xtiqʼeʼ xbʼaan li qamaak.»
(Isaias 53:5)
KITZʼAQLOK
«Jun rehebʼ laj puubʼ kixkʼobʼ li xkʼatq xsaʼ rikʼin jun li jutzʼ chʼiichʼ, ut tikto kiʼelk chaq kikʼ rikʼin haʼ.»
KIYEEMANK
«[Keʼxkʼuubʼ] lintojbʼal: lajeebʼ xkaʼkʼaal chi tumin plaat.»
(Zacarias 11:12, 13)
KITZʼAQLOK
«Jun rehebʼ li Kabʼlaju, aʼ laj Judas Iskariote xkʼabʼaʼ, koho rikʼinebʼ li xbʼeenil aj tij: “Kʼaru teeraj xkʼeebʼal we ut laaʼin tinqʼaxtesi li Jesus eere?” [...]. Ebʼ aʼan keʼxsume xkʼeebʼal lajeebʼ xkaʼkʼaal chi tumin plaat re.»
