Li Santil Hu naxye naq toowanq chi junelik saʼ li Ruuchichʼochʼ (Proverbios 2:21). Li Santil Hu kʼuubʼanbʼil rikʼin 66 chi kokʼ tasal hu ut 40 tana chi winq keʼsikʼeʼk ru xbʼaan li Yos re naq teʼxtzʼiibʼa li Santil Hu. Maare 3.500 chihabʼ anaqwan, laj Moises kitzʼiibʼank re li oobʼ chi tasal hu li natiklaak wiʼ li Santil Hu. Ut 1.900 chihabʼ anaqwan, laj Juan kitzʼiibʼank re li tasal hu li naraqeʼk wiʼ li Santil Hu. Chixjunil li wank saʼ li Santil Hu chalenaq rikʼin li Yos. Li Yos kiroksi li xsantil musiqʼej re raatinankilebʼ li keʼtzʼiibʼank re li Santil Hu (2 Samuel 23:2). Ebʼ li winq aʼin keʼxtzʼiibʼa xkʼaʼuxl li Yos ut inkʼaʼ li xkʼaʼuxebʼ. Joʼkan naq, li Jehobʼa kimusiqʼank re li Santil Hu. Chaawil 2 Timoteo 3:16 ut 2 Pedro 1:20, 21.

Chaawil li bʼideo Ani aj kʼaʼuxl wank saʼ li Santil Hu?

Li Santil Hu chalenaq rikʼin li Yos. Chʼolchʼo chiqu aʼin xbʼaan naq li Yos naxye chi tzʼaqal re ru li tkʼulmanq, ut li winq inkʼaʼ naxnaw aʼin (Josue 23:14). Kaʼajwiʼ li Nimajwal Yos naxnaw kʼaru tkʼulmanq. Chaawil Isaias 42:9 ut 46:10.

Wi junaq li tasal hu chalenaq rikʼin li Yos, peʼyaal naq tento raj chʼinaʼusaq? Kʼajoʼ xkʼihal li Santil Hu ak xjekʼimank saʼ naabʼal chi aatinobʼaal. Usta najter natzʼiibʼamank chaq li Santil Hu juntaqʼeet naxye rikʼinebʼ laj tzʼilol choxachʼochʼ. Ut maajun rehebʼ li 40 chi winq li keʼtzʼiibʼank re li Santil Hu, keʼxjalpaqi ru li naʼlebʼ li kixkʼe chisaʼ. * Saʼ li junjunq chi perel naxkʼut chanru nokooxra li Jehobʼa ut wank xwankil re xjalbʼal qanaʼlebʼ. Joʼkan naq naabʼalebʼ li qas qiitzʼin nekeʼxye naq li Santil Hu chalenaq rikʼin li Yos. Chaawil 1 Tesalonicenses 2:13.

Chaawil li bʼideo Chanru naqanaw naq yaal chixjunil li wank saʼ li Santil Hu?

Li Santil Hu naʼaatinak chirix li naraj li Yos choʼq rehebʼ li qas qiitzʼin ut aʼan jun chaabʼil esil. Naxye ajwiʼ naq chalen chaq saʼ xtiklajik, li winq kixsach jun nimla maatan: li yuʼam chi junelik saʼ li chʼinaʼusil naʼajej arin saʼ Ruuchichʼochʼ, abʼan moko kaʼaj tawiʼ aʼin ta naxye, naxye ajwiʼ chanru tchʼinaʼusoʼq wiʼ chik chixjunil. Chaawil Apocalipsis 21:4, 5.

Chisaʼ li Santil Hu wank chaqʼrabʼ, naʼlebʼ ut qʼusuk. Naxye ajwiʼ, chanru narilebʼ li Yos ebʼ li qas qiitzʼin, ut aʼan nokooxtenqʼa chi rilbʼal chanru tzʼaqal li Yos. Chi joʼkan li Santil Hu nokooxtenqʼa chi xnawbʼal ru. Naxkʼut ajwiʼ chiqu chanru tooruuq chi wank choʼq ramiiw. Chaawil Salmo 19:8, 12 (19:7, 11, Wy); Santiago 2:23, ut 4:8.

Re xtawbʼal «xyaalal li Santil Hu», li Jesus kixkʼut wiibʼ oxibʼ raqal li Santil Hu ut naq kiraqeʼk rilbʼal, kixchʼolobʼ. Joʼ chanru kixbʼaanu li Jesus joʼkan ajwiʼ kʼuubʼanbʼil li tasal hu aʼin re xtawbʼal kʼaru naxkʼut li Santil Hu. Chaawil Lucas 24:27, 45.

Chʼolchʼo chiqu naq twulaq chaawu xnawbʼal chirix li chaabʼil esil li nachalk rikʼin li Yos. Wankebʼ inkʼaʼ nekeʼwulak chiru rabʼinkil resil li Yos, ut wankebʼ nekeʼpoʼk rabʼinkil. Abʼan, maakanabʼ naq ebʼ li poyanam aʼin teʼxchʼina aachʼool. Li Santil Hu naxye ajwiʼ naq li nekeʼtzolok chirix li Yos naru nekeʼwank xyuʼam chi junelik. Chaawil Juan 17:3.