Li chʼinaʼusil naʼajej arin saʼ Ruuchichʼochʼ
Li Jehobʼa trisi chixjunil li rahilal li kixkʼam chaq laj Tza. Li Jehobʼa kixxaqabʼ li Jesús joʼ Awabʼej saʼ xbʼeen chixjunil li Ruuchichʼochʼ. Rubʼel li Xʼawabʼejilal tchʼinaʼusoʼq li Ruuchichʼochʼ (Daniel 7:13, 14; Lucas 23:43, Wy).
Ebʼ li raqal aʼin naxkʼut li naxyeechiʼi li Jehobʼa.
NUMTAJENAQAQ LI TZEKEMQ: «Li chʼochʼ ak xkʼehom li xloqʼlaj awimq: li qaYos yo chi qosobʼtesinkil». «Numtajenaqaq li awimq saʼ ruuchichʼochʼ, heetanqebʼ saʼ xbʼeenebʼ li loqʼlaj tzuul» (Salmo 67:7; 72:16).
MAAKʼAʼAQ CHIK LI YALOK U: «Kimqex chi rilbʼal li xbʼaanuhom li Qaawaʼ, chekaʼya li sachbʼachʼoolej xbʼaanu saʼ ruuchichʼochʼ. Aʼan xchʼanabʼank re li yalok toj saʼ xmaril li ruuchichʼochʼ» (Salmo 46:9, 10).
MAAKʼAʼAQEBʼ CHIK LI MAAʼUSEBʼ XNAʼLEBʼ: «Ebʼ laj bʼaanuhom maaʼusilal teʼsacheʼq chi junajwa, aʼut li kʼojkʼookebʼ xchʼool rikʼin li Qaawaʼ teʼreechani li chaabʼil naʼajej. Saʼ jun chʼina kʼamok maakʼaʼaqebʼ chik li inkʼaʼ usebʼ xnaʼlebʼ; us ta taasikʼebʼ saʼ li xnaʼajebʼ, abʼan maabʼar chik taatawebʼ» (Salmo 37:9, 10).
MAAKʼAʼAQ CHIK YAJEL, RAHILAL CHI MOKO KAMK: «Tojaʼ naq taatehonq xsaʼ ruhebʼ li mutzʼ ut ebʼ li tzʼapxikebʼ teʼabʼinq chik. Li yeq roq taapiskʼoq joʼ li yuk, ut ebʼ li mem teʼxjap chik re xbʼaan xsahil xchʼoolebʼ» (Isaías 35:5, 6).
«Ut aʼanaq li Yos rikʼinebʼ. Tixchaqihobʼresi chixjunil li xyaʼalebʼ ru, ut inkʼaʼ chik taawanq kamk, chi moko yaabʼak, chi moko japok e malaj rahilal, xbʼaan naq li najter ruuchichʼochʼ ak xnumeʼk» (Apocalipsis 21:3, 4).
Li Jehobʼa moko juntaqʼeet ta rikʼin laj Tza ut ebʼ li maaʼus aj musiqʼej, li Jehobʼa maajunwa natikʼtiʼik. Chixjunil li naxyeechiʼi ttzʼaqloq ru (Lucas 1:36, 37). Li Jehobʼa nakatxra ut naraj naq tatwanq saʼ li chʼinaʼusil naʼajej arin saʼ Ruuchichʼochʼ. Joʼkan bʼiʼ, sikʼ ebʼ laj testiiw re li Jehobʼa re naq taatzol li yaal li wank saʼ li Raatin li Yos. Wi nakaayuʼami li yookat xtzolbʼal, tatkoleʼq chiru li yoobʼanbʼil naʼlebʼ ut li tikʼtiʼ. Saʼ xnumikebʼ li chihabʼ, tat-elq rubʼel xwankil li maak ut li kamk. Joʼ kixye li Jesús: «Teenaw li yaal ut li yaal taaʼachʼabʼanq eere» (Juan 8:32).
Maare twulaq ajwiʼ chaawu
QʼAXAL LOQʼ LI NAXKʼUT LI SANTIL HU
Kʼaru tzʼaqal Xnimajwal Awabʼejilal li Yos?
Li Jesus kixkʼe xchʼool chi aatinak chirix li Xʼawabʼejilal li Yos chiru jalan chik li naʼlebʼ. Ebʼ li xtzolom nekeʼxtzʼaama naq tchalq li Xʼawabʼejilal li Yos.
