Li musiqʼej moko xeʼwank ta chi moko xeʼkamk arin saʼ Ruuchichʼochʼ
Tzʼaqal yaal naq wankebʼ li musiqʼej! Saʼ xnaʼaj li musiqʼej li inkʼaʼ naʼilmank wankebʼ li chaabʼilebʼ xnaʼlebʼ ut li maaʼusebʼ xnaʼlebʼ. Ma aʼanebʼ tawiʼ li poyanam li xeʼwank ut xeʼkamk arin saʼ Ruuchichʼochʼ?
Inkʼaʼ, moko joʼkan ta. Naq nakamk junaq, moko naxik ta saʼ xnaʼajebʼ li musiqʼej joʼ nekeʼxkʼoxla naabʼalebʼ li kristiʼaan. Chanru naqanaw aʼin? Xbʼaan naq aʼan li naxye li Santil Hu. Li Santil Hu, aʼan jun li tasal hu li naxkʼut li yaal ut chalenaq rikʼin li tzʼaqal Yos, li xkʼabʼaʼ aʼan Jehobʼa. Li Jehobʼa kixyobʼtesi ebʼ li poyanam joʼkan naq naxnaw chiʼus kʼaru nakʼulmank rikʼinebʼ naq nekeʼkamk (Salmo 83:18, TNM; 2 Timoteo 3:16).
Laj Adán kichalk saʼ li pojtzʼ ut saʼ pojtzʼ kisutqʼiik wiʼ chik
Li Santil Hu naxye naq li Yos kixyobʼtesi laj Adán, li xbʼeen winq «rikʼin xpojtzʼil li chʼochʼ» (Génesis 2:7). Kixkʼe saʼ li chʼinaʼusil naʼajej, li naxkʼabʼaʼi Edén. Wi laj Adán kirabʼi raj li xchaqʼrabʼ li Jehobʼa, maajunwa raj kikamk, toj yoʼyo raj. Abʼan laj Adán kixqʼet ribʼ chiru li xchaqʼrabʼ li Yos, joʼkan naq kiyeheʼk re: «Tatsutqʼiiq saʼ li chʼochʼ xat-elk wiʼ chaq. Xbʼaan naq pojtzʼ okenaqat chaq ut pojtzʼ tatsutqʼiiq wiʼ chik» (Génesis 3:19).
Kʼaru naraj xyeebʼal aʼin? Qakʼoxlaq, bʼar wank chaq laj Adán naq toj maajiʼ nayobʼtesiik xbʼaan li Jehobʼa? Maabʼar wank chaq. Moko aʼan ta jun li musiqʼej li toj maajiʼ nayoʼlaak. Joʼkan naq, naq li Jehobʼa kixye re laj Adán «tatsutqʼiiq wiʼ chik» saʼ li pojtzʼ, kiraj xyeebʼal re naq tkamq. Laj Adán moko kiqʼaxonk ta saʼ xnaʼajebʼ li musiqʼej. Naq laj Adán kikamk, kikanaak wiʼ chik chi maakʼaʼ xyuʼam. Li kamk aʼan xmaakʼaʼil li yuʼam.
Abʼan, kʼaru naru tqaye chirixebʼ li poyanam li ak xeʼkamk? Ma toj yoʼyokebʼ saʼ junaq chik li naʼaj? Li Santil Hu naxsume ebʼ li patzʼom aʼin.
«Chixjunilebʼ [li poyanam ut ebʼ li xul] juntaqʼeet toxeʼraqeʼq, xbʼaan naq saʼ pojtzʼ elenaqebʼ chixjunil, ut pojtzʼ teʼsutqʼiiq wiʼ chixjunilebʼ» (Eclesiastés 3:20).
«Li kamenaqebʼ maakʼaʼ nekeʼxnaw» (Eclesiastés 9:5).
«Inkʼaʼ chik nekeʼrahok chi moko xikʼ nekeʼilok, inkʼaʼ chik nekeʼkaqalink» (Eclesiastés 9:6).
«Yookat chi xik saʼ xnaʼajebʼ li kamenaq, ut aran maakʼaʼ chik kʼanjelak ut kʼuubʼank, maaʼani chik nakʼoxlak chi moko nanaʼlebʼak» (Eclesiastés 9:10).
Ebʼ li kristiʼaan saʼ «chʼochʼ teʼsutqʼiiq wiʼ: saʼ ajwiʼ li kutan aʼan taaraqeʼq chixjunil li xkʼuubʼahomebʼ» (Salmo 146:4).
Kaʼajwiʼ li yoʼyokebʼ nekeʼruuk xbʼaanunkil aʼin
Ma chʼaʼaj choʼq aawe xkʼulubʼankil li nayeemank saʼebʼ li raqal aʼin? Wi joʼkan, kʼoxla aʼin: Saʼ naabʼal ebʼ li junkabʼal li bʼeelomej aʼan li nakʼanjelak re xwenteninkil li xjunkabʼal. Naq aʼan nakamk, li xjunkabʼal nekeʼxnumsi naabʼal li chʼaʼajkilal. Wank sut li rixaqil ut li xkokʼal moko wankebʼ ta xtumin re xloqʼbʼal li tzekemq. Ut ebʼ li xikʼ nekeʼilok re li kamenaq, nekeʼxrahobʼtesi li xjunkabʼal. Kʼoxla rix aʼin: «Wi li winq aʼin yoʼyo raj saʼ xnaʼajebʼ li musiqʼej, kʼaʼut inkʼaʼ chik naxwenteni li xjunkabʼal? Kʼaʼut inkʼaʼ naxkol li xjunkabʼal chiruhebʼ li xikʼ nekeʼilok re?». Aʼin nakʼulmank xbʼaan naq yaal li naxye li Santil Hu. Li winq aʼin, moko yoʼyo ta chik. Joʼkan naq maakʼaʼ naru xbʼaanunkil (Salmo 30:10).
Ebʼ li kamenaq moko nekeʼruuk ta xtenqʼankil ebʼ li nekeʼxnumsi weʼej chi moko li nekeʼsakʼeʼk
Ma naraj xyeebʼal aʼin naq maajunwa chik teʼwanq xyuʼam ebʼ li kamenaq? Moko joʼkan ta. Moqon tooʼaatinaq chirix li wakliik wiʼ chik chi yoʼyo. Li kʼaru naxkʼut chiqu li naʼlebʼ aʼin, aʼan naq ebʼ li kamenaq inkʼaʼ nekeʼxnaw kʼaru nakaabʼaanu. Inkʼaʼ nekeʼruuk aawilbʼal, aawabʼinkil chi moko aawaatinankil. Joʼkan naq moko wank ta xyaalal naq taaxuwa ruhebʼ. Aʼanebʼ inkʼaʼ teʼruuq aatenqʼankil chi moko aarahobʼtesinkil (Eclesiastés 9:4; Isaías 26:14).
