Laaʼex «aj tzolonelex raj chik» (Heb. 5:12). Kʼoxla li maatan aʼin! Li Jehobʼa, li xnimal ru aj Tzolonel re li choxachʼochʼ, nokooxbʼoq re naq tqakʼut chiruhebʼ li junchʼol li naqanaw chirix. Xkʼutbʼal li yaal chirix li Jehobʼa saʼ li junkabʼal, saʼ li chʼuut malaj saʼ li puktesink jwal oxloqʼ chiqu ut aʼan ajwiʼ jun nimla kʼanjel. Abʼan, chanru tooruuq chi kʼutuk chiʼus?

Tqataw li xsumenkil li patzʼom aʼin rikʼin li kixtzʼiibʼa li Apostol Pablo re laj Timoteo: «Kʼe aachʼool chi rilbʼal xsaʼ li Santil Hu saʼ li komonil, joʼwiʼ chi kʼehok naʼlebʼ ut chi xtzolbʼalebʼ». Ut kixye ajwiʼ: «Wi joʼkan taabʼaanu, taakol aawibʼ laaʼat joʼebʼ ajwiʼ li teʼabʼinq aawe» (1 Tim. 4:13, 16). Li esil li naqakʼut naxkolebʼ xyuʼam ebʼ li qas qiitzʼin. Joʼkan naq aajel ru naq tqakʼe qachʼool xtzolbʼal chiʼus ilok ru hu ut kʼutuk. Li hu aʼin tatxtenqʼa chi xbʼaanunkil. Qilaq chanru kʼubʼanbʼil:

Li Jehobʼa aʼan li Xnimal ru aj Tzolonel (Is. 30:20). Rikʼin li hu aʼin, tatruuq xtzolbʼal chiʼus chanru taayaabʼasi ebʼ li hu ut chanru tatkʼutuq, abʼan misachk saʼ laachʼool naq li esil nachalk rikʼin li Jehobʼa ut aʼan nakʼamok chaq rehebʼ li poyanam (Juan 6:44). Joʼkan naq, kokʼaj xsaʼ taapatzʼ re li xsantil musiqʼej. Junelik taawoksi li Raatin li Yos naq naruhank. Kʼutbʼesi naq re li Jehobʼa li yookat xkʼutbʼal ut maawaʼ aawe. Bʼaanu chixjunil li naʼajmank re naq teʼruuq xraabʼal li Jehobʼa chi anchalebʼ xchʼool.

Li Yos xatxbʼoq re naq taakʼe chi naweʼk jun li nimla esil li maajunwa kipuktesimank saʼ li Ruuchichʼochʼ. Naqanaw naq tatruuq xbʼaanunkil aʼin wi chʼolchʼo chaawu naq li Yos tixkʼe xkawilal aachʼool (1 Ped. 4:11).

Leerech aj kʼanjel saʼ li kʼanjel re kʼutuk,

Li Nekeʼjolomink re Xmolam li Jehobʼa