TASAL 9
Loqʼoni li Jehobʼa rikʼin laajunkabʼal
«Cheloqʼoni li kibʼaanunk re li choxachʼochʼ.» (Apocalipsis 14:7)
Joʼ naxkʼut li tasal hu aʼin, saʼ li Santil Hu wank naabʼal li chaabʼil naʼlebʼ li tatxtenqʼa laaʼat ut laajunkabʼal. Li Jehobʼa naraj naq sahaq saʼ leechʼool. Ut naxye ajwiʼ naq wi li xloqʼoninkil ru wank xbʼeenwa saʼ leeyuʼam, «chixjunil li nekeraj taakʼeemanq chaq eere choʼq xtzʼaqobʼ» (Mateo 6:33). Li Yos naraj wank choʼq aawamiiw. Joʼkan naq, paabʼ li naxye aawe re naq tatruuq chi wank choʼq ramiiw li Yos, xbʼaan naq oxloqʼ wank saʼ amiiwil rikʼin (Mateo 22:37, 38).
1. JILON JUNELIK RIKʼIN LI JEHOBʼA
LI NAXYE LI SANTIL HU: «Laaʼinaq leeyuwaʼ ut laaʼexaq li walal inkʼajol, chan li Qaawaʼ» (2 Corintios 6:18). Li Yos naraj wank choʼq tzʼaqal aawamiiw ut li tijok aʼan jun rehebʼ li naʼlebʼ li ttenqʼanq aawe chi jilok chixkʼatq. Joʼkan naq li Jehobʼa naxye qe: «Junelik chextijoq» (1 Tesalonicenses 5:17). Li Jehobʼa nawulak chiru naq taaseeraqʼi re li kʼaʼuxl wiʼ laachʼool ut li wank saʼ laachʼool (Filipenses 4:6). Wi nakattijok rochbʼen laajunkabʼal, teʼxkʼe reetal naq yoʼyokil Yos nakaawaatina.
Abʼan moko kaʼaj tawiʼ tattijoq chiru, tento taawabʼi ajwiʼ li naxye. Chanru tatruuq xbʼaanunkil? Taatzol xsaʼ li Raatin ut ebʼ li tasal hu li isinbʼil chaq saʼ li Santil Hu (Salmo 1:1, 2). Kʼe aachʼool chi xkʼoxlankil li yookat xtzolbʼal (Salmo 77:12, 13 [77:11, 12, Wy]). Ut re rabʼinkil li Yos aajel ru ajwiʼ naq tatxik saʼebʼ li chʼutam (Salmo 122:1-4).
Ut tatwanq ajwiʼ chixkʼatq li Jehobʼa wi nakat-aatinak chirix rikʼinebʼ li qas qiitzʼin. Wi junelik nakaabʼaanu, inkʼaʼ taakanabʼ jilok chixkʼatq (Mateo 28:19, 20).
NARU NAKAABʼAANU AʼIN:
-
Kʼe aahoonal chi tijok ut chi rilbʼal xsaʼ li Santil Hu wulaj wulaj
-
Tenqʼa laajunkabʼal re naq xbʼeenwa tixbʼaanu li xkʼanjel li Yos ut inkʼaʼ li ajsink u
2. SAHAQ LAACHʼOOL CHI LOQʼONINK JOʼ JUNKABʼAL
LI NAXYE LI SANTIL HU: «Jilonqex chi xkʼatq li Yos, ut aʼan taajiloq chekʼatq» (Santiago 4:8). Kubʼ xkutankil ut xhoonalil li tzolok re naq rajlal xamaan textzoloq saʼ junajil joʼ junkabʼal (Genesis 18:19). Abʼan moko kaʼaj tawiʼ aʼin tento xbʼaanunkil: rajlal kutan chaakʼe li Yos saʼ chixjunil li teebʼaanu ut kawresi laajunkabʼal re naq junelik wanq choʼq ramiiw li Yos. Li Santil Hu naxye: «Ebʼ li aatin aʼin [...] [chirix li Jehobʼa] seeraqʼi rehebʼ saʼ laawochoch joʼ ajwiʼ naq wanqat chiru aabʼe, naq yokyooqat malaj naq tatwakliiq» (Deuteronomio 6:6, 7). Ye aawe joʼ kixye chaq laj Josue: «Laaʼin ut linjunkabʼal tookʼanjelaq chiru li Qaawaʼ» (Josue 24:15).
NARU NAKAABʼAANU AʼIN:
-
Kubʼ xkutankil ut xhoonalil li tzolok re naq rajlal xamaan textzoloq aʼ yaal kʼaru naraj li junjunq
