Saʼ jun qʼoqyink, laj Nabucodonosor kixmatkʼe jun li naʼlebʼ li jwal kisebʼesink re. Kixbʼoq ebʼ laj kʼehol naʼlebʼ re naq teʼxye re xyaalal li xmatkʼ, abʼan maaʼani kiruhank xchʼolobʼankil chiru. Tojaʼ naq, li awabʼej kiʼaatinak rikʼin laj Daniel.

Laj Nabucodonosor kixye re laj Daniel: «Saʼ linmatkʼ xwil jun li nimla cheʼ ut kikʼiik toj reetal kiwulak saʼ choxa. Ut nakʼutunk yalaq bʼar xjayal li Ruuchichʼochʼ. Chʼinaʼus ebʼ li xxaq ut naabʼal li ru. Ebʼ li xul nekeʼhilank rubʼel xmu, ut ebʼ li nekeʼrupupik nekeʼxyiibʼ xsok saʼebʼ li ruqʼ. Tojaʼ naq, jun li anjel kikubʼeek chaq saʼ choxa ut kixjap re chi xyeebʼal: “Tʼanomaq li cheʼ ut isihomaq ebʼ li ruqʼ! Abʼan teekanabʼ bʼayaq xtoonal ut xxeʼ. Ut teebʼakʼ rikʼin kadeen chʼiichʼ ut qʼanchʼiichʼ. Li raanm li cheʼ tjalaaq. Maawaʼaq chik raanm winq, raanm bʼan josqʼ aj xul. Ut tnumeʼq wuqubʼ chihabʼ. Chixjunilebʼ teʼxkʼe reetal naq li Yos aʼan laj Jolominel ut aʼan yaal re ani aj e tixkʼe junaq li awabʼejilal”».

Li Jehobʼa kixye re laj Daniel li xyaalal li matkʼ. Naq laj Daniel kixtaw ru li matkʼ, kixuwak. Kixye: «At awabʼej, us raj naq ebʼ li xikʼ nekeʼilok aawe teʼxkʼul aʼin, abʼan laaʼat tatkʼuluq re. Laaʼat li nimla cheʼ li xeʼxyokʼ. Taatzʼeq laaʼawabʼejilal ut taawaʼ li pim joʼebʼ li josqʼ aj xul. Abʼan, li anjel kixye naq teʼxkanabʼ bʼayaq xtoonal ut li xxeʼ. Aʼin naraj xyeebʼal naq tat-oq wiʼ chik choʼq awabʼej».

Naq xnumeʼk jun chihabʼ, laj Nabucodonosor yook rajsinkil ru saʼ xsutam li rochoch ut kiril xchʼinaʼusal li tenamit Babilonia. Tojaʼ naq kixye: «Kʼajoʼ xchʼinaʼusal li tenamit xinyiibʼ! Maaʼani naxtaw inwankil!». Naq yook xyeebʼal aʼin, jun li xyaabʼ kuxej kiʼekʼank chaq saʼ choxa ut kixye re: «Nabucodonosor! Anaqwan xaasach laaʼawabʼejilal».

Saʼ li hoonal ajwiʼ aʼin, laj Nabucodonosor kikanoʼk ru ut kiʼok chi naʼlebʼak joʼ josqʼ aj xul. Joʼkan naq, kiʼisiik saʼ rochoch joʼ awabʼej, ut xkoho saʼ pim saʼ xyanqebʼ li xul. Li rismal jwal kichamoʼk chanchan chik xxikʼ tʼiw, ut li rixiʼij jwal kikʼiik joʼ rixiʼijebʼ li xul li nekeʼrupupik.

Naq xnumeʼk wuqubʼ chihabʼ, laj Nabucodonosor xʼelk xkaanil ru, ut kikʼeheʼk wiʼ chik choʼq awabʼej re Babilonia xbʼaan li Jehobʼa. Tojaʼ naq  laj Nabucodonosor kixye: «Ninkʼe xloqʼal li Jehobʼa, li Awabʼej saʼ choxa. Naxkʼe saʼ xutaan li nekeʼxqʼetqʼeti ribʼ. Anaqwan ninnaw naq li Jehobʼa aʼan laj Jolominel ut aʼan yaal re ani aj e tixkʼe junaq li awabʼejilal».