Laj Juan yook chaq xpuktesinkil li esil aʼin: «Chi seebʼ tchalq li wank xwankil chiwu laaʼin». Naq li Jesus wank tana 30 chihabʼ re, xʼelk Galilea toj saʼ li nimaʼ Jordan. Aran laj Juan yook xkubʼsinkil xhaʼebʼ li poyanam. Li Jesus kiraj ajwiʼ naq laj Juan tkubʼsinq re xhaʼ, abʼan laj Juan kixye re: «Maawaʼ raj laaʼin tinsubʼuq aawe saʼ haʼ. Laaʼat bʼan tatsubʼuq we saʼ haʼ». Li Jesus kixye re: «Li Jehobʼa naraj naq laaʼat tatsubʼuq we saʼ haʼ». Joʼkan naq, keʼxchʼik ribʼ saʼ li nimaʼ Jordan, ut laj Juan kixsubʼ saʼ haʼ chixjunil li xjunxaqalil li Jesus.

Naq li Jesus kiʼelk saʼ haʼ, kitijok chiru li Jehobʼa. Saʼ li hoonal aʼin, kitehonk li choxa, ut li xsantil musiqʼej li Yos kikubʼeek saʼ xbʼeen joʼ jun mukuy. Tojaʼ naq li Jehobʼa kiʼaatinak chaq saʼ choxa: «Laaʼat li walal li jwal ninra. Saʼ aabʼeen wank li wosobʼtesihom».

Chi joʼkaʼin, li Jesus kixkʼul li xsantil musiqʼej li Jehobʼa ut, chalen chaq li hoonal aʼin, kikanaak choʼq li Kriist malaj li Sikʼbʼil Ru. Anaqwan truuq chik xbʼaanunkil li kʼanjel li kikʼeheʼk re xbʼaan li Jehobʼa arin saʼ ruuchichʼochʼ.

Ak xsubʼeʼk saʼ haʼ naq xkoho saʼ li chaqichʼochʼ ut aran kiwank 40 kutan. Naq xsutqʼiik chaq, xkoho rilbʼal laj Juan. Naq kiril naq li Jesus yook chaq chi nachʼok, kixye: «Aʼin li Xkarneer li Yos li trisi xmaak li ruuchichʼochʼ». Kixye aʼin re xtenqʼankilebʼ li poyanam re naq teʼxkʼe reetal naq li Jesus aʼan li Sikʼbʼil Ru. Ma nakaanaw li kixkʼul li Jesus naq wank chaq saʼ li chaqichʼochʼ? Qilaq aʼin.