Kachʼin chik ma li Paswa re li chihabʼ 32 naq ebʼ li Apostol xeʼsutqʼiik chaq chi puktesink. Ebʼ li Apostol lubʼlukebʼ, joʼkan naq li Jesus kixkʼamebʼ Betsaida saʼ jun li jukubʼ re naq teʼhilanq. Abʼan naq yookebʼ chi nachʼok chire li palaw, li Jesus kixkʼe reetal naq chi mil keʼtaqenk re toj aran. Li Jesus kiraj wank xjunes rikʼin ebʼ li Xʼapostol, usta joʼkan, kixkʼulebʼ li poyanam chi anchal xchʼool. Kixbʼanebʼ li yaj ut kiʼok xkʼutbʼal chiruhebʼ naabʼal li naʼlebʼ. Kiroksi chixjunil li kutan re aatinak rikʼinebʼ chirix li Xʼawabʼejilal li Yos. Naq xʼewuuk, ebʼ li Apostol keʼxye re: «Maare teʼtzʼokaaq ebʼ li poyanam. Ye rehebʼ naq xikaqebʼ re naq teʼwaʼaq chaq bʼayaq».

Abʼan li Jesus kixye rehebʼ: «Moko aajel ta ru naq teʼxik. Laaʼex bʼan kʼehomaqebʼ chi waʼak». Ebʼ li Apostol keʼxpatzʼ re: «Ma taawaj naq tqaloqʼebʼ xwa?». Laj Felipe, jun rehebʼ li Xʼapostol, kixye: «Usta naabʼalaq raj qatumin, inkʼaʼ tooruuq xloqʼbʼalebʼ xwa chixjunilebʼ».

Li Jesus kixpatzʼ rehebʼ: «Joʼnimal li tzakahemq wank?». Laj Andres kixye re: «Kaʼajwiʼ oobʼ chi wa ut wiibʼ kokʼ kar. Abʼan jwal kachʼin choʼq re chixjunilebʼ aʼin». Li Jesus kixye: «Kʼamomaq chaq we ebʼ li wa ut ebʼ li kar». Chirix chik aʼan, kixye rehebʼ li poyanam naq teʼkʼojlaaq chiru pachʼayaʼ saʼ chʼuutal re mero siʼeent ut re junq siʼeent. Tojaʼ naq kixchap ebʼ li wa ut ebʼ li kokʼ kar, kiʼilok saʼ choxa ut kitijok. Chirix chik aʼan kixkʼe li tzakahemq rehebʼ li Apostol re naq teʼxjekʼi re chixjunilebʼ.  Li 5.000 chi winq li wankebʼ aran, joʼ ajwiʼ ixq ut kokʼal, keʼwaʼak toj reetal keʼkʼojlaak xchʼool. Naq xeʼraqeʼk, ebʼ li Apostol keʼxxok chixjunil li kirelaʼink re naq maakʼaʼ ttzʼeqmanq. Keʼxnujtesi 12 chakach! Peʼyaal naq jun sachbʼachʼoolej aʼin?

Chixjunilebʼ sachsokebʼ xchʼool chi rilbʼal aʼin joʼkan naq xeʼraj xkʼebʼal li Jesus choʼq awabʼej. Abʼan li Jehobʼa inkʼaʼ kiraj naq t-oq choʼq awabʼej xbʼaan naq toj maajiʼ nawulak xhoonalil, ut li Jesus naxnaw chaq aʼin. Tojaʼ naq kixchaqʼrabʼi ebʼ li poyanam ut kixye rehebʼ li Xʼapostol naq xikaqebʼ saʼ junpakʼal li palaw re Galilea. Ebʼ li Xʼapostol xkohebʼ saʼ jukubʼ, ut li Jesus kitaqeʼk xjunes saʼ tzuul. Kʼaʼut? Xbʼaan naq kiraj xhoonal re tijok chiru li Xyuwaʼ. Li Jesus junelik kixsikʼ xhoonal re tijok usta jwal laatzʼ chaq ru.