Ebʼ li xbʼeenil aj tij keʼxkʼam li Jesus saʼ rochoch li ruuchil awabʼej. Aran laj Pilato kixpatzʼ rehebʼ: «Chirix kʼaru nekeejit wiʼ li winq aʼin?». Ebʼ aʼan keʼxye re: «Naxye naq awabʼej!». Laj Pilato kixpatzʼ re li Jesus: «Ma laaʼat xʼawabʼej ebʼ laj Judiiy?». Li Jesus kixye re: «Linʼawabʼejilal moko re ta li ruuchichʼochʼ aʼin».

Moqon, laj Pilato kixtaqla li Jesus rikʼin laj Herodes, li ruuchil awabʼej saʼ xteepal Galilea, re rilbʼal ma wank xmaak. Laj Herodes kiril naq li Jesus maakʼaʼ xmaak ut kixtaqla wiʼ chik rikʼin laj Pilato. Ut laj Pilato kixye rehebʼ li poyanam: «Chi moko laj Herodes chi moko laaʼin xqataw xmaak. Tinkanabʼ chi xik». Abʼan, ebʼ li poyanam nekeʼxjap rehebʼ chi xyeebʼal: «Kamsi! Kamsi!». Ebʼ laj puubʼ keʼrapok re chi tzʼuum, keʼxchuubʼa ut keʼxsakʼ. Keʼxsut chi kʼix li xjolom ut keʼxseʼe, tojaʼ naq, keʼxye re: «Sahaq taxaq saʼ laachʼool, awabʼej rehebʼ laj Judiiy!». Laj Pilato kixye wiʼ chik rehebʼ li poyanam: «Laaʼin inkʼaʼ nawil naq li winq aʼin wank ta xmaak». Abʼan, ebʼ aʼan nekeʼxjap rehebʼ: «Kʼe chiru li cheʼ!». Joʼkan naq, laj Pilato kixqʼaxtesi li Jesus re naq teʼxkamsi.

Tojaʼ naq, keʼxkʼam li Jesus saʼ jun li naʼaj li naxkʼabʼaʼi Golgota. Keʼxtʼoj chiru cheʼ ut keʼxkanabʼ chi tʼuytʼu aran. Li Jesus kitijok chiru li Jehobʼa: «At Inyuwaʼ, kuyebʼ xmaak xbʼaan naq inkʼaʼ nekeʼxnaw li nekeʼxbʼaanu». Ebʼ li poyanam yookebʼ chaq xseʼenkil li Jesus rikʼin xyeebʼal re: «Wi laaʼat Ralal li Yos, kubʼen chaq chiru cheʼ ut kol aawibʼ!».

Jun rehebʼ laj elqʼ li tʼuytʼu chixkʼatq li Jesus, kixye re: «Chinaajultika naq tat-oq saʼ Laaʼawabʼejilal». Li Jesus kixye re: «Tatwanq wikʼin naq tchʼinaʼusoʼq li Ruuchichʼochʼ». Ewu, kimoyk chiru oxibʼ hoonal. Wiibʼ oxibʼ rehebʼ li tzolom keʼkanaak chi xaqxo chixkʼatq li cheʼ bʼarwiʼ tʼuytʼu li Jesus, joʼ ajwiʼ li xMaria, li xnaʼ li Jesus. Li Jesus kixye re laj Juan naq tril li xMaria chanchan tawiʼ tzʼaqal xnaʼ.

Tojaʼ naq, li Jesus kixye: «Ak xtzʼaqlok ru!». Kixxulubʼ xjolom ut jun sut aj chik kixjiqʼ xchʼool. Saʼ li hoonal ajwiʼ aʼin, kiwank jun nimla hiik. Li nimla tʼikr re li rochoch li Yos li nakʼehok re xyanq li Saant rikʼin li Qʼaxal  saant kipejeʼk saʼ xyi. Naq kikʼulmank aʼin, jun xjolomil aj puubʼ kixye: «Yaal tzʼaqal naq li winq aʼin Ralal li Yos».