Laj Abrahan ut li xSara ak naabʼal chihabʼ xsumlajikebʼ. Keʼxkanabʼ li chaabʼil ochoch saʼ li tenamit Ur ut anaqwan moko saʼ tzʼaqal ochoch ta chik wankebʼ. Abʼan li xSara inkʼaʼ nawechʼink xbʼaan naq kʼojkʼo xchʼool rikʼin li Jehobʼa.

Saʼ xkʼabʼaʼ naq li xSara naxrahi ru jun xkʼuulaʼal, kixye re laj Abrahan: «Wi li xʼAgar, linmoos, twanq xkʼuulaʼal aawikʼin, chanchanaq we». Saʼ xnumikebʼ ru li po, li xʼAgar kiwank jun xyum, aj Ismael xkʼabʼaʼ.

Naq ak xnumeʼk naabʼal chihabʼ, laj Abrahan wank 99 chihabʼ re ut li xSara 89 naq keʼwulak oxibʼ li poyanam chi rulaʼaninkilebʼ. Laj Abrahan kixbʼoqebʼ chi hilank rubʼel jun li cheʼ ut chi waʼak. Ma nakaanaw anihebʼ? Ebʼ li anjel. Aʼanebʼ keʼxye re laj Abrahan: «Saʼ jun chihabʼ, laaʼat ut laawixaqil twanq jun leekʼuulaʼal». Li xSara yook chaq chi abʼink saʼ ochoch ut, naq kirabʼi aʼin, kiseʼek saʼ xchʼool ut kixkʼoxla: «Ma twanq inkʼuulaʼal saʼ lintiixilal?».

Naq xnumeʼk jun chihabʼ, li xSara kiwank jun xkʼuulaʼal, joʼ kixye chaq li xʼanjel li Jehobʼa. Laj Abrahan kixkʼe Isaac choʼq xkʼabʼaʼ, li naraj xyeebʼal «seʼek».

 Naq laj Isaac wank tana oobʼ chihabʼ re, li xSara kiril naq laj Ismael naxseʼe li kʼuulaʼal. Li xSara kiraj xkolbʼal li xyum, joʼkan naq xkoho chi aatinak rikʼin laj Abrahan ut kixye re: «Isi saʼ ochoch li xʼAgar ut laj Ismael». Naq laj Abrahan kirabʼi aʼin, inkʼaʼ kiraj xbʼaanunkil. Abʼan li Jehobʼa naraj ajwiʼ xkolbʼal laj Isaac, joʼkan naq kixye re laj Abrahan: «Bʼaanu li naxye li xSara. Laaʼin tinʼiloq re laj Ismael. Abʼan, li waatin ttzʼaqloq ru chirix laj Isaac».