Naq toj wankebʼ chaq Egipto, ebʼ li poyanam li chalenaqebʼ saʼ xjunkabʼal laj Jacob keʼkʼabʼaʼiik choʼq aj Israel. Naq laj Jacob ut laj Jose keʼkamk, kiʼok chi awabʼejink jun chik aj Faraon. Laj Faraon aʼin yook xxiw xbʼaan naq ebʼ laj Israel keʼok chi naabʼaloʼk chiruhebʼ laj Egipcio. Joʼkan naq kixkʼehebʼ choʼq moos. Naxminebʼ ru chi xyiibʼankil ebʼ li xan ut chi kʼanjelak chi kaw saʼ pim. Usta kʼajoʼ yookebʼ chi rahobʼtesiik xbʼaanebʼ laj Egipcio, ebʼ laj Israel jwal yookebʼ chi naabʼaloʼk. Saʼ xkʼabʼaʼ naq laj Faraon inkʼaʼ kiwulak chiru aʼin, kixtaqla xkamsinkil chixjunilebʼ li kokʼ chʼinaʼal ebʼ aj Israel li tojaʼ teʼyoʼlaaq, abʼan inkʼaʼ teʼxkamsi ebʼ li kokʼ ixqaʼal. Peʼyaal naq kʼajoʼ tana keʼxuwak ebʼ laj Israel?

Jun li ixq aj Israel Jokebed xkʼabʼaʼ kiwank jun xkʼuulaʼal kʼajoʼ xchʼinaʼusal. Re xkolbʼal li xyuʼam, kixkʼe saʼ jun li chakach ut kixmuq saʼ pim re li nimaʼ Nilo. Li xMiriam, ranabʼ li kʼuulaʼal, nachʼ kikanaak re rilbʼal kʼaru tkʼulmanq.

 Li rabʼin laj Faraon xkoho chi atink saʼ nimaʼ ut kiril li chakach. Chisaʼ wank jun li kʼuulaʼal yook chi yaabʼak, ut kiril xtoqʼobʼaal ru. Li xMiriam kixpatzʼ re: «Ma taawaj naq tinsikʼ chaq junaq ixq re naq tixtuʼresi li kʼuulaʼal choʼq aaweqaj?». Aʼan kixye naq us, ut li xMiriam xkoho xbʼoqbʼal chaq li xnaʼ. Li rabʼin laj Faraon kixye re li xJokebed: «Kʼam li kʼuulaʼal aʼin, kʼirisi choʼq wuuchil ut tatintoj».

Naq xnimank li kʼuulaʼal, li xJokebed kixkʼam rikʼin li rabʼin laj Faraon. Aʼan kixkʼabʼaʼi choʼq Moises ut xkʼirisi joʼ xyum. Laj Moises kikʼiik joʼ xyum li rabʼin laj Faraon ut kʼebʼil re chixjunil li naraj. Abʼan maajunwa kisachk saʼ xchʼool li Jehobʼa. Chʼolchʼo chiru laj Moises naq aj Israel, maawaʼ aj Egipcio, ut kixsikʼ kʼanjelak chiru li Jehobʼa.

Naq wank 40 chihabʼ re, laj Moises kiraj xtenqʼankilebʼ li rechtenamitul. Saʼ jun kutan, kiril naq jun laj Egipcio yook xsakʼbʼal jun li moos aj Israel. Naq kiril aʼin, laj Moises kixkamsi laj Egipcio naq kixsakʼ chi kaw, ut kixmuq rubʼel samahibʼ. Naq laj Faraon kixnaw aʼin, kiraj xkamsinkil laj Moises, abʼan laj Moises kiʼelelik ut xkoho Madian. Aran kichʼolaniik xbʼaan li Jehobʼa.