Ebʼ laj Israel keʼxkanabʼ wiʼ chik li Jehobʼa ut keʼok xloqʼoninkil ebʼ li jalanil yos. Abʼan ebʼ li yos aʼin inkʼaʼ nakolok rehebʼ chiruhebʼ laj Ammon. Chi joʼkaʼin kixkʼul li rahilal li tenamit chiru naabʼal chihabʼ. Moqon chik, keʼxye re li Jehobʼa: «Xoomaakobʼk. Chooʼaakol chiruhebʼ li xikʼ nekeʼilok qe, bʼaanu usilal». Ebʼ laj Israel keʼxpukʼi ebʼ li xyos ut keʼok wiʼ chik xloqʼoninkil li Jehobʼa. Tojaʼ naq li Jehobʼa inkʼaʼ chik kixkuy rilbʼal chanru yookebʼ chi rahobʼtesiik.

Joʼkan naq, ebʼ laj Israel keʼxsikʼ jun laj puubʼ kaw ribʼ, Jefte kixkʼabʼaʼi. Aʼan li tjolominq re li yalok saʼ xbʼeenebʼ laj Ammon. Laj Jefte kixye re li Jehobʼa: «Wi tooʼaatenqʼa chi elk chi ubʼej saʼ li yalok aʼin, tzʼaqal yaal tinye aawe naq tinkʼe aawe li t-elq chaq xbʼeenwa chinkʼulbʼal naq tinsutqʼiiq saʼ li yalok». Li Jehobʼa kirabʼi li xtij laj Jefte ut kixtenqʼa chi qʼaxok u saʼ li yalok.

 Naq laj Jefte kisutqʼiik saʼ rochoch, li rabʼin kiʼelk chaq xbʼeenwa chi xkʼulbʼal. Maakʼaʼ chik xkokʼal, jun ajwiʼ chiru. Yook chaq chi xajok ut chi wajbʼak. Ut kʼaru raj tixbʼaanu laj Jefte? Kijultikoʼk re li raatin ut kixye: «At wabʼin, kʼajoʼ narahoʼk inchʼool aabʼaan! Xinkʼe li waatin re li Jehobʼa ut, re naq tinbʼaanu li xinye, tento tatintaqla chi kʼanjelak saʼ li naʼaj re loqʼonink aran Silo». Li rabʼin kixye re: «At yuwaʼ, wi xaakʼe laawaatin re li Jehobʼa, anaqwan tento taabʼaanu. Kaʼajwiʼ ninpatzʼ aawe naq tinʼaakanabʼ chi xik saʼ tzuul chiru wiibʼ po rochbʼenebʼ li wamiiw. Chirix chik aʼan, tinxik saʼ li naʼaj re loqʼonink». Li rabʼin laj Jefte kixbʼaanu li kixye ut kikʼanjelak saʼ li naʼaj re loqʼonink saʼ chixjunil li xyuʼam. Ut ebʼ li ramiiw rajlal chihabʼ nekeʼwulak rilbʼal aran Silo.