Li Jehobʼa kirosobʼtesi laj Salomon rikʼin xkʼebʼal re li xnimal ru naʼlebʼ ut rikʼin xkʼebʼal re jun li nimla kʼanjel chirix xyiibʼankil li rochoch li Yos. Abʼan laj Salomon timil timil kiʼok xkanabʼankil li Yos. Wi wank aakokʼal, chʼolobʼ chiruhebʼ naq ebʼ li keʼxloqʼoni ebʼ li bʼalaqʼil yos keʼxbʼaanu naq laj Salomon tixkanabʼ li Jehobʼa. Li awabʼejilal kixjach ribʼ, ut keʼwank awabʼej maaʼusebʼ xnaʼlebʼ li keʼxbʼaanu naq li tenamit tixtzʼeqtaana li Yos ut tixloqʼoni li pechʼbʼil yos. Chiruhebʼ li kutan aʼan, naabʼalebʼ li propeet li tiikebʼ xchʼool chiru li Jehobʼa keʼtaqeek ut keʼkamsiik. Saʼ xkʼabʼaʼ li xJezabel, li awabʼej, jwal xnumtaak wiʼ chik xloqʼoninkil li bʼalaqʼil yos li kixbʼaanu li lajeebʼ chi teep. Jwal kichʼaʼajkoʼk ebʼ li kutan aʼin choʼq rehebʼ laj Israel. Usta joʼkan, toj naabʼalebʼ laj Israel li yookebʼ chi kʼanjelak chiru li Jehobʼa, joʼ li awabʼej Jehosafat ut li propeet Elias.