Li nimla tenamit Asiria kirechani li xʼawabʼejilal li 10 chi teep re Israel. Anaqwan laj Senaquerib, li awabʼej re Asiria, kiraj ajwiʼ rechaninkil li xʼawabʼejilal li wiibʼ chi teep re Juda. Joʼkan naq, kiʼok xchapbʼal chi junjunq ebʼ li tenamit re Juda. Abʼan, li tenamit li jwal naraj aʼan Jerusalen. Li inkʼaʼ naxnaw laj Senaquerib naq li Jehobʼa yook chi kolok re.

Laj Ezequias, li awabʼej re Juda, kixkʼe naabʼal li tumin re laj Senaquerib re naq inkʼaʼ tyaloq saʼ xbʼeen Jerusalen. Usta laj Senaquerib kixkʼul li tumin, kixtaqlahebʼ laj puubʼ, li jwal kawebʼ ribʼ, chi yalok saʼ xbʼeenebʼ. Ebʼ li poyanam yookebʼ xxiw xbʼaan naq yookebʼ chaq chi nachʼok ebʼ laj Asirio. Tojaʼ naq, laj Ezequias kixye rehebʼ: «Mexxuwak. Ebʼ laj Asirio kawebʼ ribʼ, abʼan li Jehobʼa tooxkawresi chiʼus chiruhebʼ aʼan».

Laj Senaquerib kixtaqla laj Rabsaque, laj kʼehol esil, re naq tixseʼe chaq ebʼ laj Jerusalen. Laj Rabsaque kixxaqabʼ ribʼ chirix li tenamit ut kixjap re: «Li Jehobʼa inkʼaʼ naru eetenqʼankil. Meekanabʼ naq laj Ezequias texbʼalaqʼi. Maajun yos truuq eekolbʼal chiqu».

Laj Ezequias kixpatzʼ re li Jehobʼa kʼaru tento tixbʼaanu, ut li Jehobʼa kisumenk re: «Maaxuwa li raatin laj Rabsaque. Laj Senaquerib inkʼaʼ trechani li tenamit Jerusalen». Chirix chik aʼan, laj Ezequias kixkʼul wiibʼ oxibʼ li esilhu li kixtaqla chaq laj Senaquerib, li naxye: «Qʼaxtesihomaq eeribʼ. Li Jehobʼa inkʼaʼ naru eekolbʼal». Tojaʼ naq, laj Ezequias kitijok: «At Jehobʼa, bʼaanu usilal, chooʼaakol, re naq chixjunilebʼ teʼxkʼe reetal naq kaʼajwiʼ laaʼat li tzʼaqal Yos». Ut li Jehobʼa kixye re: «Li awabʼej re Asiria inkʼaʼ t-oq Jerusalen. Laaʼin tinkoloq re lintenamit».

Chʼolchʼo chiru laj Senaquerib naq chi seebʼ trechani Jerusalen. Abʼan saʼ jun qʼoqyink, li Jehobʼa kixtaqla jun  li xʼanjel saʼ xbʼeenebʼ laj puubʼ Asirio, li wank chirix li tenamit. Li anjel kixkamsi 185.000 aj puubʼ! Maajun chik aj puubʼ Asirio, li jwal kawebʼ ribʼ, kikanaak chiru li awabʼej Senaquerib, ut kisutqʼiik saʼ rochoch chi inkʼaʼ kiqʼaxok u. Chi joʼkan, li Jehobʼa kixkol laj Ezequias ut ebʼ laj Jerusalen, joʼ kixye chaq. Wi wankat raj Jerusalen, ma xaakʼojobʼ raj aachʼool chirix li Jehobʼa?