Ma xaakʼe reetal saʼ li tasal hu aʼin naq chaabʼil nekeʼxyiibʼ ribʼ ebʼ laj Testiiw re li Jehobʼa naq nekeʼxik saʼebʼ li xchʼutam? Kʼaʼut oxloqʼ chiruhebʼ xyiibʼankil ut xtiqibʼankil ribʼebʼ?

Naqakʼutbʼesi naq oxloqʼ chiqu li Yos. Li Yos moko kaʼaj tawiʼ naril qatiqibʼankil (1 Samuel 16:7). Usta yaal aʼin, aajel ru naq tqakʼutbʼesi naq oxloqʼ chiru li Yos ut ebʼ li qech aj paabʼanel naq naqachʼutubʼ qibʼ chi xloqʼoninkil ru. Joʼ chanru naq naxyiibʼ ribʼ chiʼus junaq li poyanam naq naxik raatinankil junaq laj raqol aatin, joʼkan ajwiʼ naqabʼaanu laaʼo naq nokooxik saʼ li qachʼutam. Naqabʼaanu aʼin xbʼaan naq oxloqʼ chiqu li Jehobʼa, laj «raqol aatin saʼ xbʼeen chixjunil li ruuchichʼochʼ», ut oxloqʼ ajwiʼ chiqu li Rochoch (Genesis 18:25).

Naxkʼutbʼesi naq chaabʼil qanaʼlebʼ. Li Santil Hu naxye rehebʼ laj paabʼanel naq teʼxtiqibʼ ribʼ «chi chaabʼil» ut «saʼ xyaalal» (1 Timoteo 2:9, 10). Li nekeʼxtiqibʼ ribʼ chi chaabʼil ut saʼ xyaalal, inkʼaʼ nekeʼxtiqibʼ ribʼ saʼ joʼmaajoʼil, toj nekeʼxsikʼ bʼan chiʼus kʼaru teʼxkʼe chirixebʼ. Usta li Santil Hu naxkʼe qanaʼlebʼ chirix qayiibʼankil, wank naabʼal li chʼinaʼusil tʼikr naru tqakʼe chiqix. Joʼkan bʼiʼ, wi chaabʼil qayuʼam ut qabʼaanuhom, tooruuq xkʼeebʼal «xloqʼal li xkʼutum li Yos laj kolol qe» ut tooruuq ajwiʼ xnimankil «xloqʼal li Yos», aʼin naxkʼut chiqu naq moko toj aajel ta ru naq tooʼaatinaq re naq tqanima ru li Yos (Tito 2:10; 1 Pedro 2:12). Wi naqayiibʼ qibʼ chiʼus naq nokooxik saʼ li qachʼutam, us teʼril li qapaabʼal.

Naqaj naq tatwulaq saʼebʼ li qachʼutam, ut mixik aachʼool chi xkʼoxlankil kʼaru taakʼe chaawix. Moko toj aajel ta ru naq akʼaq malaj teʼxtooq laawaqʼ re naq saqaq ut chʼinaʼusaq rilbʼal.

• Ma aajel ru naq chaabʼilaq qayiibʼankil re xloqʼoninkil li Yos?

• Kʼaru li naʼlebʼ nataqlank qe naq yooko xkʼoxlankil xyiibʼankil ut xtiqibʼankil qibʼ?