Li Santil Hu naxkʼut naq wank wiibʼ chʼuut chi winq li nekeʼxbʼeeresi li xkʼanjel li Yos: ebʼ li cheekel winq ut ebʼ li nekeʼtenqʼank rehebʼ (Filipenses 1:1, Li Santil Hu, Wycliffe Bible Translators, [Wy]). Joʼkan naq saʼ naabʼal chi chʼuut wankebʼ wiibʼ oxibʼ rehebʼ laj kʼamol bʼe aʼin. Abʼan, kʼaru xkʼanjelebʼ laj tenqʼanel saʼ li chʼuut?

Nekeʼxtenqʼa li nekeʼjolomink re li chʼuut. Ebʼ laj tenqʼanel saʼ li chʼuut kawebʼ xpaabʼal ut nekeʼxbʼaanu chiʼus li kʼanjel. Wankebʼ saajebʼ ut wankebʼ ak tiixebʼ chik. Ebʼ laj tenqʼanel yalaq kʼaru chi kʼanjelil nekeʼxbʼaanu saʼ li chʼuut ut aʼan natenqʼank rehebʼ li cheekel winq re naq inkʼaʼ teʼxlaatzʼa ribʼ naq yooqebʼ chi kʼutuk malaj chi xbʼeeresinkil li chʼuut.

Nekeʼxbʼaanu jalan jalanq li kʼanjel. Ebʼ laj tenqʼanel saʼ li chʼuut nekeʼroksi li ulaʼ ut nekeʼxkʼe xnaʼaj. Ut wankebʼ nekeʼxkʼe xsonil li bʼich, nekeʼxjekʼi li tasal hu, nekeʼxbʼir rix li tumin, nekeʼril bʼar tpuktesimanq li chaabʼil esilal ut nekeʼtenqʼank chi xyiibʼankil ut xsaabʼesinkil li Chʼuutlebʼaal Kabʼl re naq chʼinaʼusaq. Ut maare wank sut teʼyeheʼq re naq teʼxtenqʼa li ak tiixebʼ chik. Joʼkan naq oxloqʼinbʼilebʼ ru laj tenqʼanel. Nekeʼxbʼaanu chi anchal xchʼool yalaq kʼaru chi kʼanjel li nekeʼkʼeheʼk rehebʼ (1 Timoteo 3:13).

Nekeʼxyuʼami li naxye li Santil Hu. Ebʼ laj tenqʼanel nekeʼsikʼeʼk ru xbʼaan naq nekeʼxyuʼami li naxye li Santil Hu. Naq nekeʼxnumsi junaq li kʼanjel malaj li seeraqʼ saʼ li chʼutam, nekeʼxkawresi qapaabʼal. Ut naq nekeʼkʼamok bʼe chi xpuktesinkil Raatin li Yos, nokooʼeʼxtenqʼa chi kʼanjelak chi anchal qachʼool chiru li Yos. Saʼ xkʼabʼaʼ naq chaabʼilebʼ xnaʼlebʼ, sa saʼ qachʼool ut chiqajunilo wanko saʼ junajil (Efesios 4:16). Ut maare twulaq xqʼehil naq teʼxaqabʼaaq choʼq cheekel winq saʼ li chʼuut.

• Chanruhebʼ xnaʼlebʼ laj tenqʼanel?

• Kʼaru nekeʼxbʼaanu laj tenqʼanel re naq us t-elq li kʼanjel saʼ li chʼuut?