KʼAJOʼ xrahil saʼ xchʼool laj Jose! Ebʼ li ras keʼxkʼayi rikʼinebʼ li winq li yookebʼ chi xik Egipto. Aran keʼxkʼe choʼq moos. Kʼaʼut naq keʼxkʼayi laj Jose? Xbʼaan naq ebʼ li ras keʼxkaqali.

Laj Jacob kʼajoʼ naq kixra laj Jose, joʼkan naq kixkʼe jun xchʼinaʼusil aqʼ. Naq laj Jacob kixbʼaanu aʼin, ebʼ li ralal keʼok xkaqalinkil laj Jose ut xikʼ rilbʼal. Abʼan wank jun chik xyaalal kʼaʼut xikʼ kiʼileʼk laj Jose.

Laj Jose kiwank wiibʼ xmatkʼ. Saʼebʼ li matkʼ aʼin, laj Jose kiril naq ebʼ li ras keʼxwiqʼibʼ ribʼ chiru. Naq laj Jose kixseeraqʼi li xmatkʼ rehebʼ li ras, keʼnumtaak xjosqʼil saʼ xbʼeen.

Saʼ jun kutan ebʼ li ras laj Jose, yookebʼ chaq chi rilbʼal xkarneer li xyuwaʼ. Joʼkan naq laj Jacob kixtaqla laj Jose chi rilbʼalebʼ. Naq ebʼ li ras laj Jose keʼril naq yook chaq chi chalk, keʼok xyeebʼal: ‹Qakamsihaq!› Abʼan laj Ruben kixye: ‹Inkʼaʼ, meebʼaanu aʼan!› Joʼkan naq keʼxchʼik saʼ jun li jul ut keʼok xkʼuubʼankil kʼaru teʼxbʼaanu rikʼin.

Chirix chik aʼan, yookebʼ chaq chi chalk jun chʼuut aj Ismael. Tojaʼ naq laj Juda kixye: ‹Qakʼayihaq rikʼinebʼ laj Ismael›. Joʼkan naq keʼxkʼayi laj Jose rikʼin junmay li tumin re plaat. Yiibʼru keʼxbʼaanu re laj Jose!

Abʼan, kʼaru keʼxye chaq re li xyuwaʼ? Keʼxkamsi jun li chibʼaat ut saʼ li xkikʼel keʼxtzʼa naabʼal sut li raqʼ laj Jose. Tojaʼ naq keʼxkʼam re li xyuwaʼ ut keʼxye re: ‹Xqataw aʼin; il mare aʼan li raqʼ laj Jose›.

Laj Jacob saʼ junpaat kixkʼe reetal naq aʼan li raqʼ laj Jose, joʼkan naq kixye: ‹Jun josqʼ aj xul tana kinuqʼuk re li walal!› Aʼin keʼraj li ras laj Jose naq tixkʼoxla li xyuwaʼebʼ. Kʼajoʼ naq kirahoʼk saʼ xchʼool laj Jacob! Naabʼal kutan kixyaabʼa li ralal. Abʼan laj Jose moko kamenaq ta, qilaq kʼaru kixkʼul.