KʼARU yookebʼ xbʼaanunkil saʼ li rochoch li awabʼej? Li awabʼej re Babilonia kixbʼaanu jun li ninqʼe. Naabʼalebʼ li poyanam, li wankebʼ xwankil saʼ li tenamit, keʼwulak saʼ li ninqʼe. Ut yookebʼ roksinkil li sekʼ re plaat ut oor. Ebʼ li sekʼ aʼin, keʼrisi chaq saʼ li Rochoch li Yos aran Jerusalen. Tojaʼ naq li ruqʼ jun li winq kiʼok chi tzʼiibʼak chiru tzʼak, joʼkan naq chixjunilebʼ keʼxuwak.

Laj Belsasar, li awabʼej, ri laj Nabucodonosor. Li awabʼej kixjap re xyeebʼal: ‹Li ani t-iloq re li tzʼiibʼanbʼil chiru tzʼak ut tixchʼolobʼ xyaalal, tixkʼul xmaatan ut aʼanaq li roxil chi taqlank saʼ li awabʼejilal›. Abʼan maajun rehebʼ laj qʼe kiruuk chi rilbʼal, chi moko keʼxtaw ta ru.

Naq li xnaʼ li awabʼej kirabʼi chixjunil aʼin kixye re: ‹Matxuwak, saʼ laaʼawabʼejilal wank jun li winq li wank xmusiqʼ ebʼ li loqʼlaj yos rikʼin. Naq laj Nabucodonosor, laayuwaʼchin, kiwank choʼq awabʼej kixkʼe laj Daniel choʼq aj jolominel saʼ xbʼeenebʼ li wankebʼ xnaʼlebʼ. Bʼoq chaq laj Daniel re naq tixchʼolobʼ chaawu li xyaalal ebʼ li tzʼiibʼ›.

Joʼkan naq keʼxkʼam laj Daniel ut li awabʼej kixkʼe li maatan re, abʼan inkʼaʼ kixkʼul. Laj Daniel kiʼok xyeebʼal kʼaʼut naq li Jehobʼa kirisi choʼq awabʼej laj Nabucodonosor. Laj Daniel kixye: ‹Laj Nabucodonosor qʼetqʼet aj winq, joʼkan li Jehobʼa kixkʼe chi xtojbʼal xmaak›.

Laj Daniel kixye re laj Belsasar: ‹Laaʼat nakaanaw chiʼus kʼaru kixkʼul laj Nabucodonosor, laayuwaʼchin, ut laaʼat qʼetqʼetat ajwiʼ. Xaawisi chaq saʼ Rochoch li Jehobʼa ebʼ li sekʼ ut xat-ukʼak chisaʼ. Xaaloqʼoni ebʼ li pechʼbʼil yos li yiibʼanbʼilebʼ rikʼin cheʼ ut pek, abʼan inkʼaʼ xaakʼe xloqʼal li tzʼaqal Yos›. Joʼkan naq li Yos kixtaqla li uqʼ aʼin re naq ttzʼiibʼaq chiru li tzʼak.

Aʼin ebʼ li aatin, chan laj Daniel: ‹MENE, MENE, TEKEL ut PARSIN›.

Laj Daniel kixye xyaalal ebʼ li aatin: ‹MENE naraj xyeebʼal naq li Yos ak kirajla xkutankil laaʼawabʼejilal ut xraqeʼk laawankil. TEKEL naraj xyeebʼal naq xatbʼiseʼk ut kitawmank naq moko us ta laanaʼlebʼ. PARSIN naraj xyeebʼal naq ak jachbʼil ru laaʼawabʼejilal ut tkʼemanq rehebʼ laj Medos ut ebʼ laj Persa›.

Toj yook ajwiʼ chi aatinak laj Daniel naq ebʼ laj Medos ut ebʼ laj Persa keʼchalk chi yalok saʼ xbʼeenebʼ laj Babilonia. Naq keʼreechani li tenamit, keʼxkamsi laj Belsasar. Chixjunil li kixchʼolobʼ laj Daniel, kikʼulmank ajwiʼ saʼ li qʼoqyink aʼan. Toj tqatzol kʼaru keʼxkʼul ebʼ laj Israel. Xbʼeenwa qilaq kʼaru kixkʼul laj Daniel.