TOJ saaj chiʼus laj Salomon naq kiʼok chi awabʼejink. Naxra li Jehobʼa ut junelik kixbʼaanu li kiyeheʼk re xbʼaan laj David, li xyuwaʼ. Li Jehobʼa naxra laj Salomon. Joʼkan naq li Jehobʼa kixye re laj Salomon naq yook chi wark: ‹Kʼaru taawaj naq tinkʼe aawe?›

Laj Salomon kixye: ‹At Jehobʼa kʼe innaʼlebʼ, re naq tin-awabʼejinq chiʼus. Toj saajin ut inkʼaʼ ninnaw xjolominkil laatenamit›.

Li Jehobʼa kiwulak chiru li kixpatzʼ laj Salomon, joʼkan naq kixye re: ‹Xaapatzʼ aanaʼlebʼ, abʼan inkʼaʼ xaapatzʼ xnajtil ru laayuʼam, chi moko aabʼihomal. Joʼkan naq tinkʼe naabʼal aanaʼlebʼ chiru yalaq ani. Joʼkan ajwiʼ tinkʼe aabʼihomal ut aaloqʼal usta inkʼaʼ xaatzʼaama chiwu›.

Moqon chik, wiibʼ li ixq keʼchalk rikʼin laj Salomon xbʼaan naq wankebʼ saʼ chʼaʼajkilal. Jun rehebʼ li ixq kixye re laj Salomon: ‹Li ixq aʼin ut laaʼin wanko saʼ jun chi ochoch. Laaʼin kiwank jun linchʼina yum ut wiibʼ kutan xyoʼlajik linyum naq kiyoʼlaak ajwiʼ jun xyum li ixq aʼin. Abʼan saʼ jun qʼoqyink li xchʼina yum li ixq aʼin, kikamk. Yookin chi wark naq kixkʼe li xkʼuulaʼal chinkʼatq ut kixkʼam linkʼuulaʼal chixkʼatq. Naq kiʼajk wu xinkʼe reetal naq li kʼuulaʼal kamenaq ut maawaʼ li we›.

Naq li jun chik ixq kirabʼi aʼin kixye: ‹Inkʼaʼ! We li yoʼyo ut re li kamenaq!› Tojaʼ naq li xbʼeen ixq kixye wiʼ chik: ‹Inkʼaʼ! Laawe aʼan li kamenaq ut li we aʼan li yoʼyo!› Ebʼ li ixq inkʼaʼ nekeʼxkʼe ribʼ saʼ aatin. Kʼaru kixbʼaanu laj Salomon rikʼin li chʼaʼajkilal aʼin?

Laj Salomon kixpatzʼ jun li chʼiichʼ ut naq ak wank rikʼin kixye: ‹Yokʼomaq saʼ wiibʼ jachal li kʼuulaʼal li yoʼyo ut qʼaxtesihomaq jun jachal re li junjunq chi ixq›.

Naq li xnaʼ li kʼuulaʼal kirabʼi aʼin kixjap re xyeebʼal: ‹Inkʼaʼ! Meekamsi li kʼuulaʼal, bʼaanumaq usilal! Kʼemaq li kʼuulaʼal re li ixq aʼin!› Abʼan li jun chik ixq kixye: ‹Inkʼaʼ! Chi moko re, chi moko we ta teekʼe, jachamaq saʼ xyi li kʼuulaʼal›.

Tojaʼ naq laj Salomon kixye: ‹Meekamsi li kʼuulaʼal! Kʼemaq li kʼuulaʼal re li xbʼeen ixq xbʼaan naq aʼan li xnaʼ li chʼinaʼal›. Laj Salomon naxnaw naq li xbʼeen ixq aʼan li naʼbʼej, xbʼaan naq naxra li kʼuulaʼal ut inkʼaʼ kiraj naq tkamsiiq. Naq li tenamit kirabʼi aʼin, keʼsahoʼk saʼ xchʼool xbʼaan naq laj Salomon wank xnaʼlebʼ.

Chiru chixjunil li chihabʼ naq kiʼawabʼejink laj Salomon, li Yos kirosobʼtesi li tenamit; kixbʼaanu naq tmoq naabʼal li triiw, li sebʼaad, li uubʼ, li iig ut naabʼal chik li tzakahemq. Chaabʼil xtiqibʼankilebʼ li qas qiitzʼin ut chaabʼil ajwiʼ ebʼ li rochoch. Joʼkan naq sahebʼ saʼ xchʼool.