LI JUKUBʼ kisubʼeʼk saʼ haʼ ut kiʼok chi jukʼeʼk! Joʼkan naq wank keʼxkʼut ribʼ saʼ li palaw. Ut wankebʼ ak keʼelk chaq saʼ li haʼ. Ma wank laj Pablo saʼ xyanqebʼ? Qilaq kʼaru kixkʼul chaq laj Pablo.

Jultik aawe naq laj Pablo kiwank chaq wiibʼ chihabʼ saʼ tzʼalam aran Cesarea. Chirix chik aʼan, keʼxkʼe laj Pablo ut ebʼ li ak wankebʼ saʼ tzʼalam, saʼ jun li jukubʼ xbʼaan naq keʼkʼameʼk Roma. Nachʼ wankebʼ saʼ li naʼaj Creta naq kichalk jun li kaqsut-iqʼ saʼ xbʼeenebʼ. Joʼkan naq inkʼaʼ chik keʼru xbʼeeresinkil li jukubʼ. Inkʼaʼ chik keʼril ru li Saqʼe chi moko ebʼ li chahim. Chi joʼkan keʼxnumsi naabʼal li kutan. Ebʼ li wankebʼ saʼ li jukubʼ, keʼxkʼoxla naq inkʼaʼ teʼkoleʼq.

Tojaʼ naq kiwakliik laj Pablo ut kixye: ‹Kaʼajwiʼ li jukubʼ tsachq, maajun eere tkamq. Xbʼaan naq saʼ li qʼoqyink jun li xʼanjel li Yos kixye we: Matxuwak, Pablo! Tatwulaq rikʼin laj Cesar, li awabʼej re Roma. Li Yos tixkolebʼ li yookebʼ chi xik aawochbʼeen›.

Tuqtu qʼoqyink ut ak kinumeʼk 14 kutan, chalen chaq xtiklajik li kaqsut-iqʼ. Ebʼ li yookebʼ xchʼeebʼal li jukubʼ keʼxkʼe reetal naq moko cham ta li haʼ. Joʼkan naq keʼxkut jun li chʼiichʼ saʼ haʼ re naq li jukubʼ inkʼaʼ tixsakʼ ribʼ rikʼinebʼ li pek. Naq kisaqewk keʼril naq wank jun jachal li naʼaj chaqi ru. Joʼkan naq keʼxkʼe xchʼool chi xkʼambʼal li jukubʼ saʼ li naʼaj aʼan.

Ak nachʼ wankebʼ chire li naʼaj, naq li jukubʼ kixsakʼ ribʼ chiru li samahibʼ ut aran kikanaak chi tʼiltʼo. Li xkawil roq li palaw kiʼok riiqankil li jukubʼ ut kiʼok chi jukʼeʼk. Jun laj puubʼ li yook chi jolomink rehebʼ kixye: ‹Li nekeenaw numxik, ayuqex saʼ li naʼaj chaqi ru. Ut li inkʼaʼ nekeenaw numxik chapamaq jun perel xtzʼalam cheʼul li jukubʼ ut teekʼe eeribʼ saʼ xbʼeen›. Chi joʼkan keʼkoleʼk chixjunilebʼ li 276 li yookebʼ chi xik saʼ li jukubʼ. Aʼan tzʼaqal kixye li anjel re laj Pablo.

Li naʼajej bʼarwiʼ keʼkoleʼk, Malta xkʼabʼaʼ. Ebʼ li wankebʼ saʼ li naʼaj Malta chaabʼilebʼ xchʼool keʼxtenqʼa li keʼwulak saʼ li jukubʼ. Naq kichaabʼiloʼk li kutan, keʼxkʼam laj Pablo saʼ jun chik li jukubʼ saʼ li tenamit Roma.