MA NAKAANAW kʼaru yookebʼ xxokbʼal ebʼ li qas qiitzʼin? Aʼan tzakahemq. Li tzakahemq aʼin chanchan poqs ut saq ru.

Anaqwan ebʼ laj Israel wankebʼ saʼ li chaqichʼochʼ, ak xnumeʼk tana jun po naq keʼelk chaq Egipto. Saʼ li chaqichʼochʼ raasa naʼelk li awimq. Joʼkan naq keʼok xyeebʼal: ‹Us wanko chaq Egipto xbʼaan naq aran wank naabʼal li qatzakahemq›.

Joʼkan naq li Jehobʼa kixye: ‹Tintaqla saʼ xbʼeenebʼ li tzakahemq›. Naq kisaqewk ebʼ laj Israel keʼxye: ‹Kʼaru wank chiru li chʼochʼ?›

Laj Moises kixye: ‹Aʼin li tzakahemq kixtaqla chaq li Jehobʼa choʼq eere›. MANA keʼxkʼe choʼq xkʼabʼaʼ li tzakahemq. Li xsahil li mana chanchan li wa rikʼin xyaʼal kabʼ.

Laj Moises kixye rehebʼ laj Israel: ‹Kaʼajwiʼ teexok joʼnimal tixtzaka li junjunq›. Ut aʼan keʼxbʼaanu wulaj wulaj. Li mana li kikanaak chiru chʼochʼ kijahoʼk xbʼaan li Saqʼe.

Laj Moises kixye ajwiʼ rehebʼ: ‹Maaʼani tixkʼuula li mana choʼq re xwulaj›. Abʼan, ma nakaanaw kʼaru keʼxkʼul li inkʼaʼ keʼabʼink chiru? Naq kisaqewk, li mana li keʼxkʼuula kimotzoʼink ut kichuhoʼk ru.

Abʼan li Jehobʼa kixye rehebʼ naq kaʼajwiʼ saʼ li xwaq kutan teʼxxok kaʼsut xkʼihal li mana. Xbʼaan naq saʼ xwuq li kutan li Jehobʼa inkʼaʼ kixtaqlahebʼ xtzakahemq. Naq keʼxxok li mana choʼq re li jun chik kutan inkʼaʼ kimotzoʼink, chi moko kichuhoʼk ta. Aʼin jun chik li sachbʼachʼoolej kixkʼut li Jehobʼa chiruhebʼ.

Ebʼ laj Israel keʼxtzaka li mana chiru chixjunil li chihabʼ naq keʼwank saʼ li chaqichʼochʼ.