MA NAKAANAW ani li kʼuulaʼal wank saʼ li eetalil? Aʼan li Jesus. Li Jesus kiyoʼlaak saʼ xnaʼajebʼ li xul. Li xMaria kixyokobʼ li xkʼuulaʼal bʼarwiʼ nekeʼwaʼak ebʼ li wakax ut ebʼ li xul. Kʼaʼut naq li xMaria ut laj Jose wankebʼ saʼ xyanqebʼ li xul aʼin? Li naʼajej aʼin, moko xnaʼaj ta junaq kʼuulaʼal. Peʼyaal?

Li xMaria ut laj Jose wankebʼ arin, xbʼaan naq laj Cesar Augusto, li awabʼej re li tenamit Roma, kixkʼe saʼ li chaqʼrabʼ naq chixjunilebʼ teʼsutqʼiiq saʼ li xtenamitebʼ bʼarwiʼ keʼyoʼlaak re naq aran teʼxtzʼiibʼa li xkʼabʼaʼebʼ. Laj Jose ut li xMaria keʼwulak saʼ li tenamit Belen xbʼaan naq aran kiyoʼlaak laj Jose. Abʼan inkʼaʼ keʼxtaw bʼar teʼkanaaq, joʼkan naq keʼkanaak saʼ xnaʼajebʼ li xul. Saʼ li qʼoqyink aʼin, kiyoʼlaak li Jesus!

Ebʼ laj kʼaakʼalenel karneer keʼrulaʼani chaq li Jesus. Naq ebʼ li winq aʼin, yookebʼ xkʼaakʼalenkil ebʼ li xkarneer, keʼkutanobʼresiik li xnaʼajebʼ. Jun li anjel kibʼaanunk re aʼin! Ebʼ laj kʼaakʼalenel karneer keʼxuwak, joʼkan naq li anjel kixye rehebʼ: ‹Mexxuwak, xinkʼam chaq eere jun li chaabʼil esil. Saʼ li qʼoqyink aʼin, kiyoʼlaak li Kriist, bʼatbʼo saʼ tʼikr ut yokyo bʼarwiʼ nekeʼwaʼak li xul. Aʼan tkoloq re li tenamit›. Chirix chik aʼan naabʼalebʼ li anjel keʼok xloqʼoninkil li Yos. Joʼkan naq, ebʼ laj kʼaakʼalenel karneer kohebʼ chi xtawbʼal li Jesus.

Kʼaʼut li Jesus moko juntaqʼeet ta qikʼin? Ani tzʼaqal li Jesus? Saʼ li xbʼeen tzolom xooʼaatinak chirix li xbʼeen Ralal li Yos. Li alalbʼej, aʼan li Jesus, li kikʼanjelak rikʼin li Jehobʼa chi xyiibʼankil chixjunil li wank saʼ choxa joʼ li wank saʼ Ruuchichʼochʼ.

Li Jehobʼa kixkʼe xyuʼam li Ralal rikʼin xMaria. Joʼkan naq li Jesus kiʼok chi kʼiik saʼ xsaʼ xMaria, joʼ nekeʼkʼiik ebʼ li kʼuulaʼal rikʼinebʼ li xnaʼ. Abʼan li kʼuulaʼal aʼin, Ralal li Yos. Kiyoʼlaak saʼ xnaʼajebʼ li xul aran Belen. Anaqwan, ma nakaanaw kʼaʼut naq ebʼ li anjel keʼsahoʼk saʼ xchʼool naq keʼxkʼe resil xyoʼlajik li Jesus?