SAʼ LI qʼoqyink re li kutan Jueves, li Jesus ut ebʼ li xkabʼlaju chi tzolom keʼxchʼuutubʼ ribʼ saʼ jun li ochoch re xnimankil li Paswa. Naq kiraqeʼk li waʼak aʼin, laj Judas Iscariote kiʼelk chi xyeebʼal rehebʼ laj tij chanru tixqʼaxtesi li Jesus rehebʼ. Aʼin kikʼulmank naq ak kinumeʼk wiibʼ kutan naq li Jesus kiʼaatinak rikʼinebʼ li xtzolom.

Wulajaq xnimankil li Paswa naq laj Judas kixye rehebʼ laj tij: ‹Kʼaru teekʼe we wiʼ tinqʼaxtesi li Jesus eere?› Ebʼ laj tij keʼxye re: ‹Tqakʼe aawe lajeebʼ xkaʼkʼaal tumin re plaat›. Joʼkan naq laj Judas kixkʼamebʼ laj tij rikʼin li Jesus. Kʼajoʼ xyiibʼal ru kixbʼaanu laj Judas!

Li Jesus kixbʼaanu jun nimla waʼak naq keʼraqeʼk xnimankil li Paswa. Li Jesus kixkʼe rehebʼ li xtzolom, jun li kaxlan wa ut kixye: ‹Tzakamaq aʼin xbʼaan naq aʼan reetalil lintibʼel li tqʼaxtesimanq saʼ leekʼabʼaʼ›. Chirix chik aʼan kixchap jun sekʼ li bʼiin ut kixye rehebʼ: ‹Ukʼumaq aʼin, xbʼaan naq aʼan reetalil linkikʼel li thoymanq saʼ leekʼabʼaʼ›. Li waʼak aʼin, nabʼaanumank re xjultikankil li Jesus.

Ebʼ laj Israel keʼxnima li Paswa re xjultikankil naq li xʼanjel li Yos kixkamsihebʼ li xbʼeen ralal ebʼ laj Egipto. Saʼebʼ li qakutan, li Jesus naraj naq ebʼ li xtzolom teʼxjultika naq kixqʼaxtesi li xyuʼam saʼ xkʼabʼaʼebʼ. Joʼkan naq rajlal chihabʼ nabʼaanumank li waʼak aʼin.

Naq keʼraqeʼk xnimankil li waʼak aʼin, li Jesus kixye rehebʼ li xtzolom naq tento kʼojkʼooqebʼ xchʼool ut kawaqebʼ saʼebʼ li xpaabʼal, tojaʼ naq keʼbʼichank chiru li Yos. Kinumeʼk tana xtuqtuukil li qʼoqyink naq keʼraqeʼk. Chirix chik aʼan, bʼar kohebʼ?