MA NAKAANAW ru li tasal hu li yook rilbʼal li chʼina ixqaʼal ut ebʼ li ramiiw? Aʼan li tasal hu li yookat chi rilbʼal anaqwan... Resil Xyuʼamebʼ li Winq ut Ixq saʼ li Santil Hu. Ut yookebʼ ajwiʼ rilbʼal li tzolom li yookat rilbʼal... ‹Twanq qayuʼam chi junelik!›

Ma nakaanaw kʼaru yookebʼ xtzolbʼal? Yookebʼ xtzolbʼal chirix li Jehobʼa ut chirix li Jesus, re naq teʼwanq xyuʼam chi junelik. Li Santil Hu naxye: ‹Aʼin li bʼe re li junelik yuʼam. Tzolon chirix li tzʼaqal Yos ut chirix li Jesus›.

Chanru tqanaw ru li Jehobʼa ut li Jesus? Rikʼin rilbʼal xsaʼ chixjunil li hu Resil Xyuʼamebʼ li Winq ut Ixq saʼ li Santil Hu. Li tasal hu aʼin naʼaatinak chirix li Jehobʼa ut li Jesus. Ut naʼaatinak ajwiʼ chirix li keʼxbʼaanu chaq ut li teʼxbʼaanu moqon. Abʼan moko kaʼaj tawiʼ li tasal hu aʼin, natenqʼank qe xnawbʼal ru li Yos ut li Jesus.

Ma nakaawil li tasal hu li wank chiru chʼochʼ? Aʼan li Santil Hu. Ye re junaq aakomon malaj aawamiiw re naq tril xsaʼ li Santil Hu li naxchʼolobʼ li tasal hu aʼin. Kaʼajwiʼ li Santil Hu naxye qe kʼaru tento tqabʼaanu re xloqʼoninkil ru li Jehobʼa joʼ naraj aʼan ut re naq twanq qayuʼam chi junelik. Joʼkan naq tento tqatzol xsaʼ li Santil Hu wulaj wulaj.

Usta naqanaw naabʼal chirix li Jehobʼa ut li Jesus ut chirix li naʼlebʼ li nekeʼxkʼe qe. Chixjunil aʼin, moko tzʼaqal ta re naq twanq qayuʼam chi junelik. Ma nakaanaw kʼaru chik tento tqabʼaanu?

Tento tqayuʼami li yooko xtzolbʼal. Ma jultik aawe ani laj Judas Iscariote? Aʼan jun rehebʼ li 12 chi apostol li kixsikʼebʼ ru li Jesus. Laj Judas kixtzol chiʼus ani li Jehobʼa ut li Jesus. Abʼan kʼaru kixkʼul? Saʼ xnumikebʼ ru li kutan, laj Judas kixjal xnaʼlebʼ ut kixkʼayi li Jesus rikʼin 30 tumin re plaat. Joʼkan naq laj Judas moko twanq ta xyuʼam chi junelik.

Ma jultik aawe naq saʼ li tzolom 69 xooʼaatinak chirix laj Guehazi? Li winq aʼin, kixrahi ru li tʼikr ut li tumin li maawaʼ re. Joʼkan naq kitikʼtiʼik, re naq tkʼeheʼq re chixjunil aʼin, abʼan li Yos kixkʼe chi xtojbʼal xmaak. Joʼkan ajwiʼ tqakʼul laaʼo, wi inkʼaʼ naqapaabʼ li xchaqʼrabʼ li Yos.

Saʼ li qʼe kutan naabʼalebʼ li qas qiitzʼin junelik keʼkʼanjelak saʼ tiikilal chiru li Jehobʼa. Us raj naq joʼkan ajwiʼ tqabʼaanu laaʼo. Saʼ li tzolom 55, xqatzol chirix laj chʼina Samuel, aʼan jun chaabʼil eetalil choʼq qe. Laj Samuel wank kaahibʼ malaj oobʼ chihabʼ re, naq kiʼok chi kʼanjelak saʼ Rochoch li Jehobʼa. Joʼkan naq, usta saajat chiʼus, naru tatkʼanjelaq ajwiʼ chiru li Yos.

Chiqajunilo naqaj xbʼaanunkil li kixbʼaanu li Jesus. Saʼ li tzolom 87 xqatzol naq li Jesus wank chaq saʼ Rochoch li Yos usta toj kachʼin ak yook chi aatinak chirix li Jehobʼa, li Xyuwaʼ. Us raj tqakʼam qe rikʼin li Jesus. Joʼkan naq aatinaqo chirix li Jehobʼa ut li Jesus rikʼinebʼ li qas qiitzʼin. Wi joʼkan tqabʼaanu, naru tqataw qayuʼam chi junelik saʼ li Sahilal Naʼajej arin saʼ Ruuchichʼochʼ.