Ma ak xatwulak junsutaq saʼebʼ li chʼutam rehebʼ laj testiiw re li Jehobʼa? Wi toj maajiʼ, maare naq tatwulaq tchalq aaxiw. Maare nakaakʼoxla: «Kʼaru nekeʼxbʼaanu saʼebʼ li xchʼutam? Kʼaʼut jwal oxloqʼ chiruhebʼ? Ma us raj naq tinwulaq ajwiʼ laaʼin?». Saʼ li tzolom aʼin taatzol chanru naq li chʼutam truuq xchaabʼilobʼresinkil laaʼamiiwil rikʼin li Jehobʼa ut tatxtenqʼa saʼ laayuʼam.

1. Kʼaʼut nekeʼxchʼutubʼ ribʼ ebʼ laj testiiw re li Jehobʼa?

Jun rehebʼ li kitzʼiibʼank re li Santil Hu kixye: «Saʼ xchʼutamebʼ laj paabʼanel tinloqʼon aawu» (Salmo 26:12). Saʼebʼ li qakutan kʼajoʼ nasahoʼk saʼ xchʼoolebʼ laj Testiiw naq nekeʼxchʼutubʼ ribʼ. Rajlal xamaan saʼ chixjunil li Ruuchichʼochʼ ebʼ laj testiiw re li Jehobʼa nekeʼchʼutlaak re xloqʼoninkil li Jehobʼa chi bʼichank ut tijok. Chiru li chihabʼ nekeʼxchʼutubʼ ribʼ wiibʼ oxibʼ sut saʼ jun li nimla chʼutam.

2. Kʼaru taatzol saʼebʼ li qachʼutam?

Saʼebʼ li chʼutam natzʼilmank rix li Raatin li Yos ut nekeʼxchʼolobʼ chi tzʼaqal re ru li naxye (yaabʼasi Nehemías 8:8). Wi nakatwulak saʼebʼ li chʼutam taatzol xkomon aanaʼlebʼ chirix li Jehobʼa ut chirix li xninqal ru naʼlebʼ. Naq taatzol xkomon aanaʼlebʼ chirix li xrahom li Jehobʼa qʼaxal taawaj wank choʼq ramiiw. Taatzol ajwiʼ chanru li Jehobʼa tatxtenqʼa re naq sahaq laachʼool saʼ laayuʼam (Isaías 48:17, 18).

3. Chanru tateʼxtenqʼa li kristiʼaan li taanawebʼ ru saʼ li chʼutam?

Li Jehobʼa naxye qe «chiqilaq qibʼ chiqibʼil qibʼ re xkʼeebʼal xkawubʼ qachʼool chi rahok joʼwiʼ chi xbʼaanunkil li chaabʼil kʼanjel. Miqakanabʼ li qachʼutam» (Hebreos 10:24, 25). Saʼebʼ li qachʼutam taanawebʼ ru li kristiʼaan li nekeʼxra ribʼebʼ ut teʼraj xnawbʼal xkomon li naʼlebʼ chirix li Jehobʼa joʼ laaʼat. Li nekeʼxye aran naru naxwaklesi aachʼool (yaabʼasi Romanos 1:11, 12). Taanawebʼ ajwiʼ ru ebʼ li hermaan li sumsukebʼ ut li wankebʼ xjunes li sahebʼ saʼ xchʼool usta wankebʼ xchʼaʼajkilal. Aʼin yal wiibʼ oxibʼ li naʼlebʼ kʼaʼut naq li Jehobʼa naraj naq tqachʼutubʼ qibʼ.

 QASIKʼAQ XCHAMAL LI NAʼLEBʼ

4. Ebʼ li xchʼutam rehebʼ laj testiiw re li Jehobʼa

Saʼ xkutankilebʼ li apóstol, ebʼ laj paabʼanel nekeʼxchʼutubʼ ribʼ re xloqʼoninkil ru li Jehobʼa (Romanos 16:3-5). Cheeyaabʼasi Colosenses 3:16 ut chexʼaatinaq chirix li patzʼom aʼin:

• Chanru nekeʼxloqʼoni chaq ru li Jehobʼa ebʼ li xbʼeen aj paabʼanel?

1. Saʼebʼ li chʼutam nawank li seeraqʼ ut ebʼ li bʼideo. Natiklaak ut naraqeʼk rikʼin bʼichank ut tijok.

2. Wank ajwiʼ hoonal bʼarwiʼ naru taataqsi laawuqʼ re xsumenkil jun li patzʼom.

3.   Yalaq ani naru nawulak saʼebʼ li chʼutam.

4. Moko napatzʼmank ta tumin saʼebʼ li chʼutam rehebʼ laj testiiw re li Jehobʼa.

5. Yal aaqʼe re naq tatxik saʼ li chʼutam

• Kʼaʼut tento tqakʼaytesi qibʼ re xik saʼebʼ li chʼutam?

 LI AK XQATZOL

Ebʼ li chʼutam tatxtenqʼa re xtawbʼal xkomon laanaʼlebʼ chirix li Jehobʼa, xchaabʼilobʼresinkil laaʼamiiwil rikʼin ut xloqʼoninkil ru rikʼinebʼ li junchʼol.

Qajultikaq

• Kʼaʼut naraj li Jehobʼa naq toowulaq saʼebʼ li chʼutam?

• Kʼaru taatzol saʼebʼ li qachʼutam?

• Chan chik ru tatxtenqʼa wulak saʼebʼ li chʼutam?