TZOLOM 28
Kʼutbʼesi naq oxloqʼ chaawu li keʼxbʼaanu li Jehobʼa ut li Jesús chaawix
Kʼaru nakaawekʼa naq junaq laawamiiw naxkʼe junaq laamaatan? Maare nasahoʼk laachʼool ut nakaawaj xkʼutbʼesinkil re laawamiiw naq oxloqʼ chaawu li kixkʼe aawe. Li Jehobʼa ut li Jesús keʼxkʼe qe jun li maatan li qʼaxal chaabʼil ut maaʼani chik truuq xkʼebʼal qe jun li maatan joʼ aʼan. Kʼaru li maatan keʼxkʼe qe? Ut chanru tooruuq xkʼutbʼesinkil naq oxloqʼ chiqu?
1. Kʼaru tqabʼaanu re xkʼutbʼesinkil naq oxloqʼ chiqu li keʼxbʼaanu li Jehobʼa ut li Jesús chiqix?
Li Santil Hu naxye naq «chixjunil li taapaabʼanq re» tixtaw li junelik yuʼam (Juan 3:16). Chanru naqakʼutbʼesi aʼin? Rikʼin li naqabʼaanu saʼ li qayuʼam (Santiago 2:17). Naq naqakʼutbʼesi li qapaabʼal rikʼin li naqabʼaanu ut li naqaye nachaabʼiloʼk li qamiiwil rikʼin li Jehobʼa ut li Jesús (yaabʼasi Juan 14:21).
2. Joqʼe naru naqakʼutbʼesi naq naqabʼanyoxi li keʼxbʼaanu li Jehobʼa ut li Jesús choʼq qe?
Jun qʼoqyink chik ma nakamk li Jesús kixye rehebʼ li xtzolom chanru teʼxkʼutbʼesi naq oxloqʼ chiruhebʼ li xkamik. Kixye ajwiʼ rehebʼ naq teʼxchʼutubʼ ribʼ chi «xtzekankil li xloqʼlaj wa li Qaawaʼ» li nakʼabʼaʼiik ajwiʼ Xnimankil li xkamik li Jesús (1 Corintios 11:20). Li Jesús kiraj naq ebʼ li xʼapóstol ut chixjunilebʼ li tzʼaqal aj paabʼanel teʼxjultika naq kixkʼe li xyuʼam saʼ xkʼabʼaʼebʼ. Joʼkan naq kixye: «Chebʼaanu aʼin re xnimankil injultikankil» (Lucas 22:19). Naq nokoowulak chi xjultikankil li xkamik li Jesús naqakʼutbʼesi naq oxloqʼ chiqu li rahom li keʼxkʼutbʼesi li Jehobʼa ut li Jesús chiqix.
QASIKʼAQ XCHAMAL LI NAʼLEBʼ
Qatzolaq chan chik ru tooruuq xkʼutbʼesinkil naq oxloqʼ chiqu li keʼxbʼaanu li Jehobʼa ut Jesús chiqix. Joʼkan ajwiʼ tqatzol kʼaʼut aajel ru naq tqanima li xkamik li Jesukriist.
3. Kʼaru tooruuq xbʼaanunkil re xkʼutbʼesinkil naq naqabʼanyoxi li keʼxbʼaanu?
Kʼoxla naq xattʼaneʼk saʼ haʼ ut yookat chi kamk abʼan wank ani nakolok aawe. Ma tsachq raj saʼ aachʼool li kixbʼaanu li kristiʼaan aʼin choʼq aawe? Malaj taasikʼ raj chanru taabʼanyoxi re?
Wank qakʼas chiru li Jehobʼa xbʼaan naq xkol li qayuʼam. Cheeyaabʼasi 1 Juan 4:8-10 ut chexʼaatinaq chirix ebʼ li patzʼom aʼin:
-
Kʼaʼut jun loqʼlaj maatan li xkamik li Jesús?
-
Kʼaru nakaawekʼa chirix li keʼxbʼaanu li Jehobʼa ut li Jesús chaawix?
Chanru tooruuq xbʼanyoxinkil li keʼxbʼaanu li Jehobʼa ut li Jesús chiqix? Cheeyaabʼasi 2 Corintios 5:15 ut 1 Juan 4:11; 5:3. Naq ak xeeyaabʼasi ebʼ li raqal chexʼaatinaq chirix li patzʼom aʼin:
-
Chanru tooruuq xkʼutbʼesinkil naq oxloqʼ chiqu li xeʼxbʼaanu?
4. Qakʼamaq qe rikʼin li Jesús
Naq naqakʼam qe rikʼin li Jesús naqakʼutbʼesi ajwiʼ naq oxloqʼ chiqu li kixbʼaanu. Cheeyaabʼasi 1 Pedro 2:21 ut chexʼaatinaq chirix li patzʼom aʼin:
-
Kʼaru taabʼaanu laaʼat re xkʼambʼal aawe rikʼin li Jesús?
Li Jesús naxra li Raatin li Yos, naxkʼe chi naweʼk li chaabʼil esil ut naxtenqʼahebʼ li junchʼol.
5. Chatwulaq chi xjultikankil li xkamik li Jesukriist
Re xnawbʼal kʼaru kibʼaanumank naq li Jesús kixxaqabʼ xnimankil li xkamik, cheeyaabʼasi Lucas 22:14, 19, 20. Moqon chexʼaatinaq chirix ebʼ li patzʼom aʼin:
-
Kʼaru kikʼulmank saʼ xnimankil xkamik li Jesús?
-
Kʼaru reetalil li kaxlanwa ut li bʼiin? (Teeril li raqal 19 ut 20).
Li Jesús naraj naq ebʼ li xtzolom jun sut chiru li chihabʼ teʼxjultika li xkamik saʼ li kutan li kikamk wiʼ. Joʼkan naq joʼ aj testiiw re li Jehobʼa jun sut chiru li chihabʼ naqachʼutubʼ qibʼ re xnimankil li xkamik li Jesús joʼ kixxaqabʼ chaq. Re xnawbʼal chanru nabʼaanumank li loqʼlaj chʼutam aʼin, cheerilaq li BʼIDEO. Moqon chexʼaatinaq chirix li patzʼom aʼin:
-
Kʼaru nabʼaanumank saʼ li qʼoqyink naq naqanima li xkamik li Jesús?
Yal eetalil li kaxlanwa ut li bʼiin. Li kaxlanwa aʼan reetalil li xyuʼam li Jesús li kixqʼaxtesi saʼ li qakʼabʼaʼ. Li bʼiin aʼan reetalil li xkikʼel.
WIIBʼ OXIBʼ NEKEʼXYE: «Re naq tookoleʼq, tzʼaqal rikʼin xpaabʼankil li Jesús».
-
Chan raj ru taawoksi Juan 3:16 ut Santiago 2:17 re xchʼolobʼankil naq wank kʼaru chik naʼajmank?
LI AK XQATZOL
Naqakʼutbʼesi naq oxloqʼ chiqu li kixbʼaanu li Jesús choʼq qe naq naqapaabʼ ut naq naqanima li xkamik.
Qajultikaq
-
Chanru naqakʼutbʼesi naq naqapaabʼ li Jesús?
-
Chanru taakʼutbʼesi naq oxloqʼ chaawu li kixbʼaanu li Jehobʼa ut li Jesús chaawix?
-
Kʼaʼut wank xwankil wulak chi xnimankil xkamik li Kriist?
SIKʼ XKOMON LI NAʼLEBʼ
Kʼaru nokoorekʼasi chi xnimankil li xkamik li Kriist.
Tzol chanru tatruuq xkʼutbʼesinkil naq nakatpaabʼank.
«Qapaabʼaq li naxyeechiʼi qe li Jehobʼa» (Laj Kʼaakʼalehom, octubre 2016)
Tzol chanru kichaabʼiloʼk li xyuʼam jun li ixq naq kixtaw ru kʼaru rusilal naxkʼam chaq li xkamik li Kriist. Saʼ li esil «Saq chik wu, yoʼyokin ut wankin saʼ tuqtuukilal».
«Li Santil Hu kixjalebʼ xyuʼam» (Laj Kʼaakʼalehom, 1 re agosto 2011)
Tzol kʼaʼut naq moko chixjunilebʼ ta nekeʼxtzeka li kaxlanwa ut nekeʼruuk li bʼiin.
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
