Chiqajunilo nawulak chiqu xsikʼbʼal kʼaru tqakʼe chiqix ut maare inkʼaʼ nawulak chiqu naq wanq ani tyehoq qe kʼaru tqakʼe chiqix. Wank li naʼlebʼ saʼ li Santil Hu li naru nokooxtenqʼa re naq tqatiqibʼ qibʼ chiʼus ut re naq tqasahobʼresi xchʼool li Jehobʼa. Qatzʼilaq rix junjunq rehebʼ li naʼlebʼ aʼin.

1. Kʼaru xnaʼlebʼ li Santil Hu tooxtenqʼa chi xyiibʼankil qibʼ chiʼus?

Jun laj paabʼanel tento tixtiqibʼ ribʼ saʼ xyaalal ut saqaq ru li xjunxaqalil joʼ xkʼulubʼ li naxpaabʼ li Yos (1 Timoteo 2:9, 10). Qatzʼilaq rix kaahibʼ li naʼlebʼ li naqatzol. 1) Tento naq chaabʼilaq ru li qatʼikr. Maare aawilom naq saʼ xchʼutamebʼ laj Testiiw jalan jalanq nekeʼxtiqibʼ ribʼ abʼan li xtʼikrebʼ ut chanru nekeʼxtʼeʼ li rismal naxkʼutbʼesi naq nekeʼroxloqʼi li Jehobʼa. 2) Xtiqibʼankil qibʼ saʼ xyaalal naraj xyeebʼal naq inkʼaʼ naqoksi li tʼikr li tixbʼaanu naq ebʼ li junchʼol teʼxkʼoxla jun li tzʼaj aj naʼlebʼ chiqix malaj yal re naq tooʼileʼq. 3) Naqakʼutbʼesi naq wank qanaʼlebʼ naq inkʼaʼ naqatiqibʼ qibʼ malaj naqayiibʼ li qismal joʼ nekeʼxyoobʼ xbʼaanunkil li kristiʼaan. 4) Li qayiibʼankil ut li qatiqibʼankil tixkʼut chiruhebʼ li junchʼol naq naqaloqʼoni ru li tzʼaqal Yos (1 Corintios 10:31).

2. Kʼaʼut us naq tqakʼoxla ebʼ li qech aj paabʼanel naq tqatiqibʼ qibʼ?

Yaal naq laaʼo naqasikʼ kʼaru tqakʼe chiqix. Abʼan tento tqakʼoxla ma inkʼaʼ tawiʼ tixchʼaʼajki ebʼ li junchʼol. Joʼkan naq naqayal qaqʼe re naq inkʼaʼ tqatochʼ xchʼool junaq li qas qiitzʼin. Ut naqayuʼami li naʼlebʼ aʼin: «Li junjunq saʼ qayanq chixyalaq xqʼe re kʼulubʼaak xbʼaanebʼ li ras riitzʼin rikʼin xbʼaanunkil li us ut re xkabʼlankil ru li xyuʼam» (yaabʼasi Romanos 15:1, 2).

3. Chanru nekeʼtenqʼaak ebʼ li kristiʼaan chi xloqʼoninkil ru li Jehobʼa naq nekeʼril chanru naqatiqibʼ qibʼ?

Junelik naqayal qaqʼe re naq chaabʼil tqatiqibʼ qibʼ, abʼan weent naqabʼaanu naq nokooxik saʼebʼ li chʼutam ut saʼ li puktesink. Inkʼaʼ naqaj naq ebʼ li kristiʼaan teʼxik xchʼool chirix chanru nokooʼilok ut inkʼaʼ chik teʼrabʼi li esil li naqakʼam rehebʼ. Naqaj bʼan naq ebʼ li junchʼol teʼxnaw li yaal ut «taakʼeheʼq xloqʼal li xkʼutum li Yos laj Kolol qe» (Tito 2:10).

 QASIKʼAQ XCHAMAL LI NAʼLEBʼ

4. Naq saʼ xyaalal naqatiqibʼ ut naqayiibʼ qibʼ naqakʼutbʼesi naq oxloqʼ chiqu li Jehobʼa

Kʼaʼut wank xwankil chiqu chanru naqayiibʼ ut naqatiqibʼ qibʼ? Cheeyaabʼasi Salmo 47:3 ut chexʼaatinaq chirix ebʼ li patzʼom aʼin:

• Wi inkʼaʼ nasach saʼ qachʼool naq nokookʼanjelak chiru li Jehobʼa, chanru tqatiqibʼ qibʼ?

• Ma aajel ru naq tqakʼoxla chiʼus chanru naqatiqibʼ qibʼ naq nokooxik saʼebʼ li chʼutam ut saʼ li puktesink? Kʼaʼut nakaaye chi joʼkan?

 5. Kʼaru ttenqʼanq qe re naq tqatiqibʼ ut tqayiibʼ qibʼ chiʼus

Cheerilaq li BʼIDEO.

Maakʼaʼ naxye ma li qatʼikr terto xtzʼaq malaj inkʼaʼ, li aajel ru aʼan naq saqaq ut chaabʼilaq ru aʼ yaal bʼar tooxik. Cheeyaabʼasi 1 Corintios 10:24 ut 1 Timoteo 2:9, 10. Moqon chexʼaatinaq chirix kʼaʼut inkʼaʼ tqoksi li tʼikr...

• ... li tzʼaj ru malaj pojpo nakanaak chiqix.

• ... li tixbʼaanu naq ebʼ li junchʼol teʼxkʼoxla junaq li tzʼaj aj naʼlebʼ saʼ qabʼeen xbʼaan naq laatzʼ ru.

Usta ebʼ li tzʼaqal aj paabʼanel moko wanko ta chik rubʼel li Xchaqʼrabʼ laj Moisés, abʼan aʼin nokooxtenqʼa chi rilbʼal kʼaru naxkʼoxla li Jehobʼa. Cheeyaabʼasi Deuteronomio 22:5 ut chexʼaatinaq chirix li patzʼom aʼin:

• Kʼaʼut naq moko us ta naq ebʼ li ixq teʼxyiibʼ ribʼ joʼ winq ut ebʼ li winq joʼ ixq?

Cheeyaabʼasi 1 Corintios 10:32, 33 ut 1 Juan 2:15, 16 ut chexʼaatinaq chirix ebʼ li patzʼom aʼin:

• Ma tqakʼe xwankil wi ebʼ li kristiʼaan malaj li qechpaabʼanel inkʼaʼ nawulak chiruhebʼ chanru naqatiqibʼ ut naqayiibʼ qibʼ? Kʼaʼut?

• Chanru nekeʼxtiqibʼ ut nekeʼxyiibʼ ribʼ li kristiʼaan saʼ laateep?

• Ma nakaakʼoxla naq xkʼulubʼebʼ laj paabʼanel xtiqibʼankil ribʼ chi joʼkan? Kʼaʼut nakaaye aʼan?

 LI AK XQATZOL

Naqoxloqʼi li Jehobʼa ut ebʼ li junchʼol naq naqasikʼ chiʼus chanru naqatiqibʼ ut naqayiibʼ qibʼ.

Qajultikaq

• Kʼaʼut wank xwankil chiru li Jehobʼa chanru naqatiqibʼ ut naqayiibʼ qibʼ?

• Kʼaru junjunq li xnaʼlebʼ li Santil Hu tooxtenqʼa naq tqatiqibʼ ut tqayiibʼ qibʼ?

• Chanru naxchʼaʼajki malaj naxtenqʼa li qatiqibʼankil ut qayiibʼankil li nekeʼxkʼoxla ebʼ li junchʼol chirix li tzʼaqal paabʼal?