LI HU Apocalipsis raqik li Santil Hu ut naxkʼe roybʼeenihom ebʼ li poyanam. Li Apostol Juan kitzʼiibʼank re li tasal hu aʼin ut chisaʼ wank jalan jalanq li moy u. Ut ttzʼaqloq ru chixjunil aʼin rikʼin li Rajom li Jehobʼa.

Saʼ li xbʼeen moy u, li Jesus kixkawresi ut kixqʼus naabʼal li chʼuut. Ut saʼ li jun chik nachʼolobʼamank chanru xkʼojaribʼaal li Yos saʼ choxa ut nakʼutunk naq ebʼ li anjel yookebʼ xloqʼoninkil ru li Jehobʼa.

Naq yooq chaq chi nachʼok raqik li Rajom li Yos, li Jesukriist, li Karneer, tixkʼul jun li bʼotbʼil hu rikʼin wuqubʼ chi tzʼaplebʼ. Ut naq tixte kaahibʼ rehebʼ li tzʼaplebʼ, nekeʼelk chaq kaahibʼ li winq li wankebʼ chirix kawaay. Li xbʼeen winq aʼan li Jesus ut kʼeebʼil choʼq Awabʼej ut kʼojkʼo saʼ xbʼeen jun li saqi kawaay. Li oxibʼ chik, jalanebʼ li xbʼonol ut aʼanebʼ reetalil li yalok u, li weʼej ut li nimla yajel li wank saʼ ruuchichʼochʼ ut chixjunil aʼin chi seebʼ t-osoʼq. Naq ttemanq li xwuqt tzʼaplebʼ, t-abʼimanq wuqubʼ xyaabʼ li trompeet, li tixkʼe resil ebʼ li xraqbʼa aatin li Yos. Ut ebʼ aʼin teʼxkʼam chaq wuqubʼ chik li rahilal malaj xjosqʼil li Yos.

Chirix chik aʼan, laj Juan kiril xyoʼlajik jun li chʼinaʼal ut aʼin reetalil li xkʼojlajik li Xʼawabʼejilal li Yos saʼ choxa. Naq kitiklaak li yalok u, kiʼisiik saʼ choxa laj Tza ut ebʼ li maaʼus aj musiqʼej ut keʼkʼuteʼk chaq saʼ Ruuchichʼochʼ. Tojaʼ naq kiʼeekʼank jun kawil kuxej ut kixye: «Ra chaalel saʼ eebʼeen laaʼex li ruuchichʼochʼ». Abʼan kʼaʼut kiyeemank aʼin? Laj Tza yook xjosqʼil saʼ qabʼeen xbʼaan naq naxnaw naq ajlanbʼil kutan aj chik wank (Apocalipsis 12:12).

Naq kixkʼut ribʼ wiʼ chik li Jesus saʼ choxa chanchan jun li karneer ut chixkʼatq wank 144.000 li sikʼbʼilebʼ ru re naq «teʼawabʼejinq rochbʼeen». Saʼ li hu Apocalipsis naxchʼolobʼ naq wank ajwiʼ 144.000 li ralal xkʼajol li ixq (Apocalipsis 14:1; 20:6).

Chirix chik aʼan, li xʼawabʼejilal li ruuchichʼochʼ teʼchʼutubʼaaq saʼ li Armagedon malaj saʼ li «yalok saʼ li xnimal xkutankil li Nimajwal Yos» ut teʼyaloq re xqʼaxbʼal li Jesus ut ebʼ li xʼanjel. Chanru naraqeʼk li yalok u aʼin? Teʼosoʼq chixjunilebʼ li awabʼej ut ttzʼapeʼq laj Tza. Chiru jun mil chihabʼ, li Jesus ut li 144.000 teʼawabʼejinq saʼ xbʼeen li ruuchichʼochʼ. Naq traqeʼq li jun mil chihabʼ, laj Tza tsacheʼq chi junajwa (Apocalipsis 16:14; 20:4).

Kʼaru tixbʼaanu li awabʼejilal aʼin chiru li jun mil chihabʼ naq tjolominq saʼ xbʼeenebʼ li nekeʼabʼink? Laj Juan kixtzʼiibʼa: «[Li Jehobʼa] tixchaqihobʼresi chixjunil li xyaʼalebʼ ru, ut inkʼaʼ chik taawanq kamk, chi moko yaabʼak, chi moko japok e malaj rahilal, xbʼaan naq li najter ruuchichʼochʼ ak xnumeʼk» (Apocalipsis 21:4). Li Ruuchichʼochʼ tchʼinaʼusoʼq wiʼ chik!

Chi joʼkan, li hu Apocalipsis naraqeʼk xchʼolobʼankil li esil li wank saʼ li Santil Hu li naxye: saʼ xkʼabʼaʼ li Awabʼejilal li wank saʼ ruqʼ li Jesus, li Jehobʼa tixsantobʼresi li xkʼabʼaʼ ut tixkʼut chi junajwa naq kaʼajwiʼ li Yos wank xkʼulubʼ chi awabʼejink.

(Isinbʼil chaq saʼ Apocalipsis.)