Ve, ata fioti ve. Bambangi ya Yehowa kele Bakristu mpi balukwikilu na bo ke katukaka na Biblia. Ata mabundu ya nkaka ke longaka nde kuvukisa Bayuda na Palestine ke wakana ti mbikudulu ya Biblia, Bambangi ya Yehowa ke ndimaka ve dibanza yai. Bambangi ya Yehowa ke ndimaka ve nde Biblia tubilaka na ntwala mambu yai ya politiki. Ya kieleka, Biblia ke pesaka ve maboko na luyalu mosi mpi ke tubaka ve nde dikanda mosi me luta dikanda ya nkaka. Nzozulu ya Nkengi, zulunalu ya Bambangi ya Yehowa yina me zabanaka, me tubaka pwelele nde: “Ata verse mosi ve ya Biblia ke ndimaka kimvuka ya politiki ya Sionisme.”

 Mukanda mosi (Encyclopædia Britannica) ke tuba nde Sionisme kele “ngidika ya politiki yina kele ti lukanu ya kutula mpi kupesa maboko na dikanda ya Bayuda na Palestine.” Kisina na yo kele na mabundu mpi na politiki. Bambangi ya Yehowa ke longaka ve Sionisme mpi bo ke kotaka ve ata fioti na mambu ya politiki ya Sionisme.

 Kimvuka ya Bambangi ya Yehowa ke longaka kaka mambu ya Nzambi mpi bo ke pesaka ve maboko ata na konso kimvuka ya politiki. Yo yina, yo ke kotilaka ve Sionisme. Bantu mingi me zabaka nde Bambangi ya Yehowa ke kotaka ve na mambu ya politiki mpi na bansi mingi bo me ndimaka kumona mpasi na kisika ya kudikotisa na mambu ya politiki. Bambangi ya Yehowa ke ndimaka kibeni nde Kimfumu ya Nzambi mpamba ta tula ngemba na ntoto mpi ata luyalu mosi ve to kimvuka mosi ve lenda sala yo.

 Na konso kisika yina Bambangi ya Yehowa ke zingaka, bo ke zitisaka bansiku yina bamfumu na yo ke tulaka. Bo ke kolamaka ve na bamfumu ya leta mpi bo ke kudikotisaka ve na bitumba.