Sambu na Nki Bambangi ya Yehowa Ke Bingaka Ve Kisika na Bo ya Balukutakanu Nde Nzo-Nzambi?
Na Biblia, ngogo ya Kigreki yina bo ke balulaka bantangu ya nkaka nde “nzo-nzambi” ke tendula kimvuka ya bantu yina ke sambilaka Nzambi, kansi yo ke tendula ve nzo yina bo ke vukanaka.
2Mu mbandu: Ntangu ntumwa Polo tindilaka bankwelani yai Akilasi ti Prisila mbote, yandi tubaka diaka nde: “Beno pesa nzo-nzambi yina ke vukanaka na nzo na bo mbote.” (Baroma 16:5, Contemporary English Version) Polo zolaka ve kutuba nde bo pesa nzo yina bo vandaka kusadila balukutakanu mbote. Kansi, yandi tindaka mbote na yandi na bantu disongidila na dibundu yina vandaka kuvukana na nzo yina. a
Yo yina, beto ke bingaka kisika yina beto ke sambilaka nde “Nzo ya Kimfumu” na kisika ya kubinga yo nzo-nzambi.
Sambu na nki beno ke bingaka kisika yina beno ke vukanaka “Nzo ya Kimfumu ya Bambangi ya Yehowa”?
Yo me fwana nde beto binga yo mutindu yai sambu:
Nzo kele kisika yina bantu ke vukanaka.
Beto ke vukanaka sambu na kusambila Yehowa, Nzambi yina Biblia ke tubilaka, mpi sambu na kutuba mambu na yandi.—Nkunga 83:18; Yezaya 43:12.
Beto ke vukanaka mpi sambu na kulonguka mambu ya me tala Kimfumu ya Nzambi yina Yezu vandaka kutubila mbala na mbala.—Matayo 6:9, 10; 24:14; Luka 4:43.
Beto ke lomba nge na kukwenda kutala Nzo ya Kimfumu yina kele pene-pene ti kisika yina nge ke zingaka mpi kumona nge mosi mutindu Bambangi ya Yehowa ke salaka balukutakanu na bo.
a Mukanda ya 1 Bakorinto 16:19; ya Bakolosai 4:15; mpi ya Filemoni 2 ke sadila mpi bangogo ya kiteso mosi.
Nge Lenda Sepela Mpi Ti
BALUKUTAKANU
Inki Mambu Ke Salamaka na Nzo ya Kimfumu?
Kota na kati mpi tala nge mosi mutindu yo kele.
BANGIUFULA YINA BANTU KE YULAKA MINGI
Inki Mutindu Mambu Ke Salamaka na Mabundu ya Bambangi ya Yehowa?
Longuka mutindu beto ke bakaka lutwadisu mpi bantuma na nzila ya ngidika yai.
MAMBU YA ME TALA BETO
Vukana na lukutakanu mosi
Sosa kuzaba mutindu balukutakanu na beto ke salamaka. Sosa kisika mosi ya kele pene-pene ti beno yina balukutakanu na beto ke salamaka.