Ve. Bambangi ya Yehowa ke kwikilaka nde Nzambi muntu gangaka bima yonso. Kansi, beto ke ndimaka ve dilongi yina ke tubaka nde Nzambi gangaka bima yonso na nsungi ya bilumbu sambanu. Sambu na nki? Sambu bangindu mingi ya bantu yina ke kwikilaka nde Nzambi gangaka bima yonso na nsungi ya bilumbu sambanu ke wakanaka ve ti Biblia. Beto tadila bambandu yai zole:

1.   Ntangu yina bilumbu sambanu ya lugangu salaka. Bantu ya nkaka ke kwikilaka nde Nzambi gangaka bima yonso na nsungi ya bilumbu sambanu yina konso kilumbu vandaka ti bangunga 24. Kansi na Biblia, ngogo “kilumbu” lenda tendula nsungi mosi ya nda.​—Kuyantika 2:4; Nkunga 90:4.

2.   Bamvula yina ntoto me salaka. Bantu ya nkaka yina ke kwikilaka nde Nzambi gangaka bima yonso na nsungi ya bilumbu sambanu ke longaka nde ntoto me salaka kaka mwa mafunda ya bamvula. Kansi, Biblia ke monisa nde Nzambi gangaka ntoto mpi luyalanganu na ntwala ya bilumbu sambanu ya lugangu. (Kuyantika 1:1) Yo yina Bambangi ya Yehowa ke tulaka ve ntembe na bansosa ya bantu ya siansi yina ke monisaka nde ziku ntoto me salaka bamiliare ya bamvula.

 Ata Bambangi ya Yehowa ke kwikilaka nde Nzambi muntu gangaka bima yonso, bo ke buyaka ve mambu ya siansi. Beto ke ndimaka kibeni nde mambu ya siansi ke wakanaka ti Biblia.