Ve, kusambila Nzambi kele lukanu ya muntu yandi mosi. (Baroma 14:12) Bambangi ya Yehowa ke longaka bana na bo minsiku ya kele ya Biblia, kansi ntangu bana yango ke kumaka bambuta, yo ke lombaka nde konso mwana kubaka lukanu na yandi mosi kana yandi ta kuma Mbangi ya Yehowa to ve.​—Baroma 12:2; Bagalatia 6:5.

 Kaka bonso bibuti yonso, Bambangi ya Yehowa ke zolaka nde bana na bo kuvanda ti luzingu mosi ya mbote kibeni. Bo ke longaka bana na bo mambu yina bo ke monaka nde yo ta natila bana na bo mambote: kisalu ya kusala, bikalulu ya mbote, mpi malongi ya Biblia. Bambangi ya Yehowa ke ndimaka nde Biblia muntu ke sadisaka bantu na kuvanda ti luzingu ya mbote kibeni. Yo yina, bo ke longukaka Biblia ti bana na bo mpi bo ke kwendaka ti bo na balukutakanu ya dibundu sambu bana kuzaba mbote malongi ya Biblia. (Kulonga 6:6, 7) Ntangu konso mwana ta yela, yandi mosi ta baka lukanu kana yandi ta sadila malongi yina bibuti na yandi ke ndimaka to ve.

•  Keti Bambangi ya Yehowa ke botikaka bana ya fioti?

•  Keti Bambangi ya Yehowa ke kipaka diaka ve bana na bo kana bo me buya kubaka mbotika?

•  Sambu na nki Bambangi ya Yehowa ke kwendaka ti bana na bo na kisalu ya kulonga nsangu ya mbote?

•  Keti Bambangi ya Yehowa ke salaka bafeti?

•  Inki mutindu bantu yina bo me sansaka na dibuta ya Bambangi ya Yehowa ke kudiwaka?

 Ve. Biblia ke tubilaka ve ata kisika mosi nde bo fwete pesa bana ya fioti mbotika. Mu mbandu, na ntwala nde Bakristu ya mvu-nkama ya ntete kubaka mbotika, bo waka ntete nsangu, bo ‘ndimaka yo na kiese yonso,’ mpi bo balulaka ntima. (Bisalu 2:14, 22, 38, 41) Kiteso mosi, sambu muntu kubaka mbotika, yandi fwete zaba mbote mambu yina Biblia ke longaka, yandi fwete ndima yo, mpi yandi fwete baka lukanu ya kusala mambu yina Biblia ke longaka. Mwana ya fioti ta kuka ve kusala mambu yina.

 Kana bana me yala, mbala ya nkaka bo lenda baka lukanu ya kubaka mbotika. Kansi na ntwala nde bo baka mbotika, bo fwete zaba mbote sambu na nki bo ke baka lukanu yina.

 Ve. Ata Bambangi ya Yehowa ke waka mawa kana mwana na bo me pona nzila ya nkaka, bo ke landaka kuzola yandi mpi bo ke buyaka ve kuvanda diaka ti yandi ata yandi me buya kukuma Mbangi ya Yehowa.

 Beto ke nataka bana na beto na kisalu ya kulonga nsangu ya mbote sambu na bikuma mingi. a

•   Biblia ke songa bibuti nde, bo fwete longa bana na bo na mambu ya me tala Nzambi mpi bo fwete longa bo na kusambila yandi. (Baefezo 6:4) Mutindu kusonga bantu ya nkaka mambu yina beto ke ndimaka kele na kati ya mambu ya beto ke salaka sambu na kusambila Nzambi, kulonga nsangu ya mbote kele na kati ya mambu ya mfunu ya kimpeve yina bibuti fwete longa bana na bo.​—Baroma 10:9, 10; Baebreo 13:15.

•   Biblia ke siamisaka batoko na ‘kukumisa zina ya Mfumu Nzambi.’ (Nkunga 148:12, 13, Bible en Kituba Kusonga bantu ya nkaka mambu ya me tala Nzambi kele mutindu ya mbote ya kukumisa zina na yandi. b

•   Bana ke longukaka mambu mingi ntangu bo ke salaka kisalu ya kulonga ti bibuti na bo. Mu mbandu, bo ke longukaka mutindu ya kusolula ti bantu ya mutindu yonso, mpi bo ke kumaka ti bikalulu mingi ya mbote mu mbandu kuwila bantu mawa, mawete, luzitu, mpi kudipesa sambu na bantu ya nkaka. Kisalu yai ke sadisaka mpi bana na kuzaba mbote malongi ya Biblia yina me simba mambu ya bo ke ndimaka.

 Bambangi ya Yehowa ke salaka ve bafeti yina mabundu ke salaka to mpi bafeti ya nkaka ya ke sepedisaka ve Nzambi. c (2 Bakorinto 6:14-17; Baefezo 5:10) Mu mbandu, bo ke salaka ve bafeti ya lubutuku to feti ya Noele. Yo kele bafeti yina me simbama ve na Biblia.

 Ata mpidina, beto ke sepelaka kulutisa ntangu ti mabuta na beto mpi kupesa bana na beto bakado. Na mvula ya mvimba, beto ke sepelaka mpi beto ke pesanaka bakado konso ntangu yina beto me zola na kisika ya kuvingila kaka mwa ntangu mosi buna.